Мәңгі тілі қазақтың

Дидарындай жас қыздың, жас жігіттің,
Нышаны ма, атқан таң жақсы үміттің?!
Жал-құйрығы төгілген Арғымақ жыл,
Тұсау жібін кесуде Жақсылықтың!

Жаңалыққа тілемес сәттілік кім?
Даналыққа ұласса мәңгілік күн …
Дәстүрлі бұл Жолдауы Елбасының,
Бар әлемге жеткізді жаңғырығын!

Әрбір жолы іштегі сырыңды ұққан,
Жан-жүрек пен сезімді шымырлатқан,
Бұл Жолдауда –
Ұлы Отан тағдыры бар,
Жүгі де бар артатын мың сан батпан.

Бұл Жолдаудың тінінде – нәрлі сыры.
Әрбір ұлттың тілінде – арлы үні.
Мәңгі тілі қазақтың …
Мәңгі жасап,
Мөлдір шыққа ұласар таңғы нұры!

Ғажабы мың сан ұлтты ұйыстырған,
Бір шаңырақ астына сыйыстырған …
Жолдауы бұл –
Бірлік пен Ынтымақтың,
Ата жолын заманмен қиыстырған!

Жолдауы бұл – ең биік Парасаттың,
Кең байтағым, осы ғой дара салтың!
Құдай ісі,
сонан соң адамдық іс, –
Жетім-жесір, ғаріпке қарасатын!

Бұл Жолдауда дамудың мәні де бар
Іскер, ойлы шешімдер, мәміле бар.
Білім, ғылым жолымен өркендеудің,
Жеміс жаяр келешек дәні де бар!

Нұрлы күн бар,
Жазира жарқын таң бар,
Жігер рухы жастардың жарқыл қағар!
Дарқан, жомарт мінезді дала көңіл,
Қазағымның мейірі еш сарқылмаған!

Жылқы тектес жаралған қайран бабам,
Жүйрік ат пен құс баптап, сайрандаған.
Елдік,
Ерлік дәстүрді тең ұстаған,
Бабаларға мен мәңгі қайран қалам!
Бұл Жолдауда жас ұрпақ тағдыры бар,
Ұлы адамның ұлы ойы,
жан нұры бар.
Даладайын шалқыған шалқар сезім,
Теңіздейін толқыған сан сыры бар!

Мәңгілік ел
Желбірер көк байрағы,
Табыстары таусылмас таңдантады.
Бұл Жолдаудың авторы — Қазақ елі,
Мекенжайы – тәуелсіз кең байтағы!

Ибрагим Бекмаханұлы

Оқи отырыңыз... Авторлық мақалалар

Пікір қалдыру

Сіздің E-mail-ңыз жарияланбайды.