Татами шеберлері жарады

Францияның астанасы Парижде дзюдодан дәстүрлі «Үлкен дулыға» «Grand Slam» турнирі өтті. Дүбірлі додаға әлемнің 100 елінен 633 спортшы бақ сынады. Қазақ елінің атынан 15 дзюдошы татами төріне шығып белдесті.

Доданың алғашқы күні аса жеңіл салмақ болып саналатын 60 келіде сынға түскен Елдос Сметов күміс медальді иеленді. Финалда ол Күн шығыс елінен келген ­Наохисо Такатоға есе жіберді. Әйелдер арасында Рио Олимпиадасының қола жүлдегері ­Отгонцецег Галбадрах қола жүлдені олжалады. Ауыр салмақ, яғни 90 келіде белдескен Ислам Бозбаев неміс Эдуард Триппел, молдовалық Юрий ­Мокану, жапониялық Шойхиро Мукай және израильдік Ли Кошманды қапы қалдырып финалға дейін шықты. Алайда ақтық сында ол кореялық дзюдошы Донгхан Гвакқа ұтылды.
Осылайша ол күміс жүлдені олжалап, ел құрамасына үшінші медальға толықтырды. Екі күнге созылған беделді турнирдің нәтижесінде ерлер арасында Наохисо Такато (Жапония, 60 келі), Денис Виеру (Молдова, 66 келі), Сойши Хашимото (Жапония, 73 келі), Доменик ­Рессел (Германия, 81 келі), Донгхан Гвак (Оңтүстік Корея, 90 келі), Варлам Липартелиани (Грузия, 100 келі), Ким Сунгмин (Оңтүстік Корея,100 келіден жоғары). Әйелдер арасында Ами Кондо (Жапония, 48 келі), Аи Шишиме (Жапония, 52 келі), ­Криста ­Дегучи (Канада, 57 келі), Кларисс ­Агбегненоу (Франция, 63 келі), Юко Оно (Жапония, 70 келі), Маделеине Малонга (Франция, 78 келі ), Идалис Ортис (Куба, 78 келіден жоғары) топжарды.
Сонымен, сарапқа салынған 14 алтын­нан 5 алтынды олжалаған Жапония құра­масы дзюдоның отаны екендігін растап жалпы­командалық есепте көш бастады.

Нұрлан ҚҰМАР

Оқи отырыңыз... Авторлық мақалалар

Пікір қалдыру

Сіздің E-mail-ңыз жарияланбайды.