«Ұлттық өнер» факультеті ашылды

Елбасы Н.Ә.Назарбаевтың «Ұлы даланың жеті қыры» атты бағдарламалық мақаласын іске асыру аясында Т.Жүргенов атындағы Қазақ ұлттық өнер академиясында елімізде тұңғыш рет «Ұлттық өнер» факультеті ашылды. Жаңа факультеттің ашылу салтанатына Қазақстанның Халық артисі Сара Тыныштығұлова, Қазақстанның еңбек сіңірген қайраткері Пернебек Момынов, Құрманғазы атындағы Қазақ мемлекеттік академиялық ұлт аспаптар оркестрінің директоры Нұрғиса Дәуешов, «Отырар сазы» оркестрінің көркемдік жетекшісі Дінзухра Тілендиева, мәдениет және өнер қайраткерлері, Ұлттық университеттің ұстаздары және өнерсүйер жұртшылық қатысты.

Іс-шараны Т.Жүргенов атындағы Қазақ ұлттық өнер академиясының ректоры Асхат Маемиров құттықтау сөзбен ашты.
– Бүгінгі шараны біздің ұланғайыр мемлекетіміздің мәдени кеңістігінде, рухани өміріндегі ерекше бір елеулі оқиға деп санаймын. Елбасы Н.Назарбаевтың «Ұлы даланың жеті қыры» мақаласында ұлт өнері мен мәдениет жолдарын ұлықтаудың бүкіл тетіктері көрсетілген. Сол көтерілген мақсат-міндеттерді жүзеге асыру үшін осы факультетті ашу қажеттілігі туындады. Алдағы уақытта білім ұясы қабырғасынан түлеген жас мамандар ұлттық өнерімізді дәріптеу бағытында жаңа қырынан көрінетіні сөзсіз, – деді А.Маемиров.
Қазақстанның еңбек сіңірген қайраткері, Т.Жүргенов атындағы Қазақ ұлттық өнер академиясының профессоры Пернебек­ Момынов: «Ақан, Біржандардың өнерін жалғайтын дарын­ды жастардың санын арттырып, қазақ өнерінің жұлдызын жарқырата беретініне сенім мол» деп, жүрекжарды лебізін білдірді.
Жаңа факультеттің тұсаукесер рәсімінен кейін қонақтар салтанатты шараға орай ұйымдастырылған ұлттық киім және зергерлік бұйымдар көрмесін тамашалады. Алтынмен апталып, күміспен күптелген, түрлі бағалы тастармен көмкерілген айбалта, ер-тұрман, хан белбеуі, сәукеле, сақина-білезік және басқа әшекей бұйымдардың бәрі де теңдесі жоқ туындылар. Сондай-ақ университет студенттері – темірден түйін түйген болашақ қолөнер мамандары қонақтардың көз алдында неше түрлі әшекей бұйымдар жасаса, атақты шебер Сәуле Бапанованың шәкірттері өрмек құрып, гобелен тоқыды.
Факультеттің ашылу рәсімі бұдан кейін сахнада жалғасты. Әйгілі әнші, «Дәстүрлі музыкалық өнер» кафедрасының меңгерушісі Рамазан Стамғазиев Ақан серінің өзі ұстаған домбырасымен «Базарың құтты болсын, ардақты, елім!» деп, әуелетіп ән салды. Академияның фольклорлық оркестрі, би ансамблі және жас таланттары ән мен күйден шашу шашты.

Дина ИМАМБАЕВА

Оқи отырыңыз... Авторлық мақалалар

Пікір қалдыру

Сіздің E-mail-ңыз жарияланбайды.