«Altyn dombyra»

24-25 qyrkúıek kúnderi Atyraý qalasynda Qazaqstan Respýblıkasynyń halyq artısi, «Qurmet» ordeniniń ıegeri, profesor Ázıdolla Esqalıev atyndaǵy V Halyqaralyq «Altyn dombyra» kúı baıqaýy ótedi. Bıylǵy kúı saıysy kúıshiniń týǵanyna 85 jyl tolýyna arnalyp otyr.
Ázıdolla Esqalıev – Qazaqstan Respýblıkasynyń halyq artısi, Búkilodaqtyq jáne Dúnıejúzilik festıválderdiń laýreaty, kúıshi, sazger. Áıgili akademık, qazaq kásibı mýzykasynyń negizin salýshy Ahmet Jubanovtan tálim-tárbıe alyp, kúı anasy Dınany kórip, oryndaýshylyq sheberligin shyńdaǵan. Elimizdiń mádenıeti men óneriniń damýyna ushan-teńiz úles qosqan ónerpaz 50 jyldan astam ýaqyt boıy qajyrly eńbegimen, tarlan talantymen, óreli ónerimen halyqtyń ystyq yqylasyna bólendi. Á.Esqalıev 1958 jyly konservatorıany bitirgennen keıin uzaq jyldar boıy Jambyl atyndaǵy Memlekettik fılarmonıada, «Qazaqkonsert» birlestiginde, Qurmanǵazy atyndaǵy ulttyq konservatorıada, Qurmanǵazy atyndaǵy akademıalyq halyq aspaptar orkestrinde tabysty eńbek etti.
Oblystyq halyq shyǵarmashylyǵy jáne mádenı demalys qyzmetterin uıymdastyrý ǵylymı-ádistemelik ortalyǵy uıymdastyryp otyrǵan bul baıqaýdyń maqsaty – ult ónerin, mádenı murasyn nasıhattaý, ony damytýda urpaqtar sabaqtastyǵyn qamtamasyz etý. Osy baǵytta áıgili kúıshiniń oryndaýshylyq sheberligin, onyń ishinde batystyń tókpe kúılerin jetkizýdegi ereksheligin ónersúıer jurtshylyqqa, óskeleń urpaqqa dáripteý kózdeledi. Aıta keterligi, baıqaýǵa memlekettik resmı ataǵy joq jáne respýblıkalyq baıqaýlarda birinshi oryn alǵan­dardan basqa, 16 jastan joǵary mýzykalyq ar­naıy oqý oryndarynyń stýdentteri men oqýshylary, ká­sibı mýzykanttar jáne talantty oryndaýshylar qatysa alady.

Dana HALYQ

Оқи отырыңыз... Авторлық мақалалар

Пікір қалдыру

Сіздің E-mail-ңыз жарияланбайды.