Ұлт бірлігінің ұйытқысы

Берекелі елдің іргесі бекем. Кешегі батырлар мен әулиелер мекені аталған жер жаннаты – Жетісу дәл қазір тұрақтылық пен татулықтың тал бесігіне айналған. Оған Алматы облысындағы Қазақстан халқы Ассамблеясының қосып отырған үлесі зор. Бүгінде киелі Жетісу жеріне жүзден аса ұлт пен ұлыс ірге тепкен. Оларға облыс орталығы Талдықорғандағы Достық үйі құрамындағы 70-тен аса этно-мәдени бірлестік өкілдері барлық қолдауды кеңінен сезінеді десек, артық болмас. 

Атап айтқанда, Достық үйіндегі ұйымдастырылған әртүрлі ­іс-­ша­ралар ұлттар арасындағы тату­лықты нығайтып, береке-бірлікті бекемдеп, достық қарым-қа­тынасты қалыптастыруға, әр ұлттың мәдениетін сақтауға көмек­тесуді мақсат етеді. Сонымен бірге этнос өкілдерінің мемлекеттік тілді үйренуіне қолайлы жағдай жасап, мемлекетті құраушы қазақ халқының салт-дәстүрін, әдет-ғұрпын, төл мәдениеті мен тағы­лымды тарихын білуге қол ұшын беруге бағытталған.
Берекесі мен бірлігі жарасқан Достық үйінің сәнді ғимараты 2008 жылы қолданысқа берілген. Облыстық ҚХА-ның «Достық үйі» коммуналдық мекемесі 2015 жылы «Алматы облысы әкімінің аппараты» мемлекеттік мекемесінің «Достық үйі – Қоғамдық келісім орталығы» болып қайта құрылды. Ондағы мамандардың мәліметінше, бүгінде ғимаратта ортақ шаңырақ аясында 20-дан астам этно-мәдени бірлестіктердің кеңесі, облыстық ҚХА хатшылығы, медиация кабинеттері мен «Ұлағат» ақсақалдар кеңесі, «Бірлік» жастар қауымдастығы нәтижелі жұмыс атқаруда. Аналар, Қоғамдық келісім кеңестері мен жетекші журналистер, «Парасат» тіл жанашырлары клубы және тілдерді оқыту орталығының жұмысына жетісулықтар риза.
Алматы облыстық ҚХА жанын­дағы ғылыми сараптамалық топ облыстық ҚХА құрылымының консультативті-талдау органы. Топ құрамында қарым-қатынас салаларын зерттеумен айналысатын заңгерлер, этнологтар мен тарихшылар, философтар және психологтар жұмыс істейді. Аталған топтың қызметі – ҚХА-ның Қазақстан қоғамындағы ынтымақты нығайтудағы саяси және азаматтық институт есебіндегі маңызын күшейтуге ықпалдасу мен жалпыұлттық ынтымаққа қол жеткізу. Сондай-ақ мұндағы негізгі міндеттер облыстық ҚХА қызметіне мемлекеттік, этносаяси бағыттағы өзекті мәселелерде ғылыми-сарап­та­малық қолдау көрсету және кон­фессияаралық қатынастардағы ғылыми-зерттеу жұмыстарын үйлестіру.
2011 жылы Қазақстан Республика­сында «Медиация туралы» Заң қабылданып, Елбасы Қазақстан халқы Ассамблеясына осы институтты ­дамытуды жүктеген болатын. Аталған тапсырмаға сәйкес, әр өңірде медиация орталықтары өз жұмысын жалғастыруда. Мәселен, қазір ­Алматы облысында 60-тан астам медиация кабинеті ашылып, 283 кәсіби емес және 25 кәсіби ­медиатор жұмыс жүргізуде. Облыстық ассамблеяның ұйымдастыруымен «Медиация негіздері» тақырыбында шеберлік ­сыныптары, «Этносаралық медиативтік біліктілік» және «Даулар мен жанжалдарды реттеуге арналған медиация негіздері» атты семинар-тренингтер жиі өткізіліп тұрады. Осыған дейін аймақтағы 17 аудан, 3 қалада және Достық үйінде облыстың ҚХА жанында 21 медиация кабинеті ашылса, бұған қоса аймақтағы соттар жанында тағы 47 медиация кабинеті жұмыс істейді. Олар түрлі жанжалдарды дер кезінде шешуге барын салады. Мысалы, 2019 жылы ­жалпы медиаторлар­дың атсалысуымен 1300-ден аса жанжал оң шешімін ­тапса, оның 571-сі кәсіби, 758 жанжал кәсіби емес медиаторлардың көме­гіне жүгінген. Бұл бұрынғы жылдың қорытындысымен салыстырғанда 300-дей дау-дамай көп қаралып, және ­50-ден астам іс-шара артық өткізілгенін көрсетеді.
Алматы облыстық Қоғамдық келісім кеңесінің төрағасы ­Оралбек Жақияновтың айтуынша, қазір аймақтағы қоғамдық келісім кеңестерінің саны 420-дан ­асады. Оның ішінде, 1 облыстық, 20 аудан­дық және қалалық, қал­ған­дары ауылдық деңгейде және ірі кәсіпорындарда жұмыс істейді. Солардың өнімді жұмысы нәти­жесінде облыс аумағындағы қоғамдық келісім кеңестері бүгінгі күнге дейін 100 мыңға жуық адамды қамтыған әртүрлі деңгейдегі 1893 іс-шара өткізген. Осы мезгілде 2181 өзекті мәселе қаралып, оң шешімін тапқан.
Қорытып айтқанда, өңірдегі Достық үйі – Қоғамдық келісім орта­лығы тарапынан атқарылған әрбір іс ұлт бірлігінің ұйытқысы. Сон­дықтан мұндай игілікті жұ­мыстар бұдан былай да өз жал­ғасын таба бермек.

Айдын КӘЛІМХАН
Алматы облысы

Оқи отырыңыз... Авторлық мақалалар

Пікір қалдыру

Сіздің E-mail-ңыз жарияланбайды.