«Махаббат – мәңгі ертегі» немесе «Менің күнәлі періштем»

d0bad0b8d0bdd0be« – Сәлеметсіз бе, бұл «Махаббат бекеті» ме? Менің атым — Гүлназ…»
Тура осылай басталатын көркемфильм есіңізде ме? Жәудір көз Гүлназ бен Оралдың арасындағы сезімнен сыр шертетін романтикаға толы осы туындыны білмейтін жан жоқ. Режиссер Талғат Теменовтің осы фильмі талай жүректерге сезім сыйлап кетті. Оянбай жатқан жүректерге от берді. Сол кинотуындыда қойылған үлкен сұрақ жақында ғана жарыққа шыққан Т.Теменовтің «Менің күнәлі періштем» фильмінде тағы да ортаға тасталды. Ару Айша кімді таңдамақ? Бала күнінен бірге келе жатқан асқақ арманына апаратын ауқатты әрі бала-шағасы бар егде еркекті ме, әлде жүрек лүпілінің әмірімен көңілі қалаған Азаматын таңдай ма? 
Ару Айшаның арманы – Париж сахнасында ән салу, талантына күллі Францияны тәнті ету. Бұл жолда ол бәрін құрбан етуге бар. Тіпті асқақ арманына қол жеткізуде оған Асхат Бабаевич атты «сиқырлы кілт» те кезіге кетеді.
Ал Асхат Бабаевич кім? Дүниенің құнын ақшамен бағалайтын Бабаевичті бірден жазғыра жөнелуге де болмас. Жауыздың да жаны сұлулыққа ынтық. Еліктейін ерке сұлу еліктіріп барады. Тіпті оның өзінің перзентіне татитыны да жадына кіріп шығар емес. Оның жолында бар байлығын ысырап етуге бар. Өкініштісі сол, өз дәуренінің өткенін ұқпай, жанын сала ышқынады. Көріктісін күшпен қайтарғысы келеді. Онысынан түк шықпайды.
Азамат ше? Ақымақтау һәм аңғалдау ғұмыр кешкен балаң жігіт Азамат ару Айшаны көргенде «ақылынан адасады». Дәлірек айтсақ, бұл сезім оның санасына ой салады. Арлы азаматқа айналып сала береді. Сөйтіп, ессіздеу жүрген ерке Айшаны да өзіне еліктіріп алды.
Міне, осынау үш кейіпкердің арасында оқиға өрбиді. Бір қарағанда таныс сюжет. Сол Баян сұлу, Қозы Көрпеш және қатыгез Қодар. Бірақ бұл – заманауи нұсқа. Әлі күнге «асарын асап, жасарын жасап алса» да баласындай балауса қыздарға ынтызар боп жүрген ашкөз шалдар, жылы-жұмсаққа күмп беру үшін, кешегі «шал сипаған етімді құрт жесін» дейтін арулар аманатынан аттап жүрген қыздарымыз бүгін де бар. Талай қаракөздің жаттың жетегінде кетуі де осы өмірдің мәнін пендеуи парықпен бағалаудан болып жатқандай. Қорқынышты құбылыс…
Махаббат – мәңгілік ұғым. Қатыгездікті қайдам, махаббат мейірімді оятады. Оған фильм кейіпкерлері өмірлерінің күрт өзгеруін алыңыз. Байлықтан басқаны көрмей қалған бойжеткеннің сезімтал сұлуға айналуы, ақшалы банкирдің баладай бақытқа бөленуі, ұрлық-қарлықпен оңай олжаға қарық болған бозбаланың адал азаматқа айналуы – бәрі-бәрі осы махаббаттың әсерінен. Егер осы тұрғыда бағаласақ, фильм осы мақсатының үдесінен табылды.
Пенделер кейде өз шындығын мойындауға шорқақ. Режиссер осы өмір шындығын көркем картинамен көз алдымызға тосты. Жылдар жылжып, жылғалардан су аққан сайын уақыт адамды өзгертіп барады. Адам сезімге сенбейді, бала ертегіге елітпейді. Сезім сейілген жерде романтика қалмайды. Махаббат болмаған жерге мейірім де жоламайды. Жоғалтып алған романтиканы осы фильм арқылы режиссер қайтта оралтты. Сағындырды. Ынтық етті.
«Менің күнәлі періштем». Атауы қызық. Періштенің күнәлі болғанын естіп пе едіңіз. Фильм режиссері: «Рас, періште күнәсіз болады деген ұғым бар. Бірақ бүгінгі заманда барлық адам күнәлі, барлық адам өзінше періште. Сондықтан бұл картина әр адамның өзі туралы» дейді. Ұққанымыз – бұл өмірде әркім өз әрекетін ақтап алғысы келеді. Ұры қолының сұғанақтығын да әлдебір себеппен ақтап бағады. Қысқасы, әркім өзінше періште. Режиссер осыны айтқысы келді-ау деп топшыладық.
Талғат Теменовтің қай туындысын алалық, тұнып тұрған табиғи сұлулық. Мөлдір әлем. Демек, режиссердің жаны да көркемдікке ынтық. Ол кейіпкерлерінен да осыны күтеді. Жәудір жанарлар, отты жүректер. Тіпті туған жердің табиғатын түсірген сәтті алыңызшы. Сарқыраманың осындай сұлулығын сөзбен суреттеу бөлек те, оның Құдайдың өзі жаратқан сұлулығын камераның көзімен көрсету – бір бөлек дүние.
Қала берді, тісқаққан режиссер кейіпкерлерін студия төңірегінен іздеген емес. Сөзді режиссердің өзі алсын. «Мен үшін актер мен актрисаның өнер жолында жүруі міндетті емес. Оның жоғары білімі бар ма, жоқ па, ол да мені ешқашан қызықтырған емес. Мәселен, осы фильмде басты рөлдегі – Айшаның рөлін сомдаған қызды мен бұрын танымаймын. Экономикалық колледжді бітірген қыз-ау деймін. Мен үшін бұл рөлге оның табиғатының тура келуі және оны мен ойлағандай сомдай алуы маңызды болды. Ал Азамат рөлін ойнайтын жігіт әу баста мүлдем басқа жігіт болған. Барлық киім-кешек те сол тұлғалы жігітке лайықталып тігіліп, даяр тұрған да еді. Түсіруге бір күн қалғанда мен келдім де, «Я меняю актера!» дедім. Бәрі аң-таң. Бұл жерде шешім қабылдайтын – мен. Мен өз актерімді таптым. Оның тіпті өз өмірінің де кинодағы кейіпкерінің тағдырына ұқсас тұстары бар екен. Жанары отты! Мен іздеген актердің осы екеніне көзім жетті» дейді режиссер. Басты рөлдерді бұған дейін киноға түспеген жас әртістер – Данияр Қанатқалиев (Азамат) пен Құралай Анарбекова (Айша) ойнайды. Ал бай кәсіпкер Асхат Бабаевичтің рөлін – Қазақстанның еңбек сіңірген әртісі Мұрат Ахманов сомдайды. Фильмге сонымен қатар әлемге танымал актер Жерар Депардье түскен. «Түсірілімдер Алматы қаласының, еліміздің және Францияның ең әсем, көрікті деген жерлерінде жасалды. Туынды – қазақ халқының жақсы дәстүрлерін көрсететін, әдемілікті, махаббатты, достықты, адамгершілікті, кісілік пен кішілікті, сезімталдықты паш ететін фильм. Мұнда еш жағымсыз кейіпкер жоқ. Менің ойымша, бұл көрермен көңілінен шығатын фильм болады. Тіпті «Махаббат бекеті» фильмінен асып түсетін танымалдылыққа ие болады», – деді Талғат Теменов.
Байлық һәм бақыт. Осы екі ұғымды таразыға салған туындының жалпы құны – 2,5 миллион АҚШ доллары. Жастар жанын жаттың мәдениеті жаулап барады дейміз. Күдер үзбеңіз. Міне, қазақ жастар киносының жаңа жауһары жарық көрді. Айтпақшы, алмағайып заманда өз бақытынан адасқан Айша ақыры Азаматына қосылады! Ендеше, романтика мен шым-шытырық оқиға толы кинотуынды көргіңіз келсе, қыркүйек айында кинотеатрға келіңіз, көзайым болыңыз!

Динара ІЗТІЛЕУ

Оқи отырыңыз... Авторлық мақалалар

Пікір қалдыру

Сіздің E-mail-ңыз жарияланбайды.