- Әдебиет
- 27 Ақпан, 2014
«Қазақ елі» пәні болашақ үшін керек
Былтыр оқу жылының басында, нақтырақ айтқанда, 3-қыркүйекте Қазақстан Республикасының Президенті Нұрсұлтан Назарбаев Астана қаласының №64 мектеп-лицейінде өткізген патриотизм сабағында мектептерге «Қазақ елі» пәнін енгізу қажеттілігін атап көрсеткен еді. Осы пәннің маңыздылығына көңіл бөлген қазақ зиялылары бұл идеяны қолдау керектігін айтып, баспасөз беттерінде мақалалар жазып, алқалы жиындарда биік мінберлерден пікір білдірді. Елбасы идеясының маңыздылығына алғашқылардың бірі болып Абай атындағы Қазақ ұлттық педагогикалық университетінің ректоры Серік Пірәлиев те үн қатты.
«Елбасы көтерген осынау өзекті мәселенің бір кілті – бүгінгі жастарымыздың бойына отаншылдық сезімін қалыптастырып, оларды патриотизмге тәрбиелеу деп түсінеміз. «Мәңгілік ел» болуды көздеген Президент Нұрсұлтан Назарбаевтың маңызы өте терең бастамасын көкірек көзі ояу жанның бәрі қолдауы тиіс. Көптеген зерттеушілер заңды құбылыс ретінде атап көрсетіп отырғандай, бұл мәселе теориялық және қолданбалы мәні зор, өз алдына жеке ғылыми пәннің зерттеу нысанына айналуы тиіс. Президенттің жалпы білім беретін орта мектептердің оқу үрдісіне «Қазақ елі» пәнін енгізу қажеттілігі туралы ұсынысын осы тұрғыдан қабылдауымыз керек. Бірақ бүгінгі күні мұндай пәнді тек мектептерде ғана емес, сонымен қатар Қазақстанның жоғары және арнаулы кәсіптік оқу орындарына да енгізу артық болмас еді» деген Серік Жайлауұлы ортаға тың идея тастап, бастама көтерген болатын.
Сөйтіп, Қазақстанның барлық жоғары және арнаулы орта оқу орындарында «Қазақ елі» пәнін міндетті пән ретінде енгізудің аса маңыздылығы мен көкейкестілігі еліміздегі қарқынды түрде өтіп жатқан жаһандану және дүниежүзілік білім беру кеңістігіне ену үдерістерімен байланысты да ерекше маңызға ие болып тұрғанына жан-жақты тоқталған еді.
Әдетте, идея айту мен бастама көтеру бар да, оны іске асыру және оның алғышарттарын жүйелеп, нақтылау бар. Бұл тұрғыдан алғанда Абай атындағы ҚазҰПУ ректоры С.Пірәлиев сөздің ғана емес, сонымен бірге істің де адамы екенін дәлелдеді. Бұдан екі ай уақыт бұрын Тұжырымдама дайындау мақсатында арнайы жұмысшы тобын құрып, оған тікелей өзі басшылық жасады. Сөйтіп, «Қазақ елі» жобасы – жаңа заман талабы» Тұжырымдамасы әзірленді. Осыған байланысты 2013 жылғы 12-желтоқсанда университетте осы жобаны талқылауға арналған дөңгелек үстел өткізіліп, оған жобаны әзірлеген мамандар, еліміздің түкпір-түкпірінен келген жоғары оқу орындарының оқытушылары мен профессорлары және өзге де зиялы қауым өкілдері қатысты.
Дөңгелек үстелде алғашқылардың бірі болып сөз алған философия ғылымдарының докторы, әл-Фараби атындағы Қазақ ұлттық университетінің профессоры және осы жобаны дайындауға қатысқан Ж.Молдабеков «Қазақ елі: тарихи кезеңі, ұғымдық түсінігі, әдістемелік деңгейі» деген тұжырымдамалық ойларын ортаға салып, «Қазақ елі» пәнін енгізудің бірқатар қиыншылықтары бар екенін тілге тиек етті. Мәселен, бұл жұмысты атқаруда бірлескен ізденіс пен кәсіби көзқарас керек екенін айтты, өз ұсыныстарымен бөлісті.
Қазақстан Республикасының Тарихшылар ассоциациясының президенті, әлеуметтік ғылымдар академиясының академигі, тарих ғылымдарының докторы, профессор М.Қойгелдиев «Қазақ елі» идеясының тарихына талдау жасады:
– Біздің түсінігімізде «Қазақ елі» идеясының өмірге келуі – XIV-XV ғасырларға, яғни қазақ ұлтының дербес этникалық құрылым ретінде қалыптасу кезеңіне тұспа-тұс келеді. Оның өмірлік шынайы фактіге айналуы ұлттық аумақтық және экономикалық тұтастығының, мәдени және тілдік ерекшеліктерінің орнығуына негіз болды, – деді.
Абай атындағы ҚазҰПУ-дың ұлттық тәрбие және өзін-өзі тану кафедрасының профессорлары Қорлан Жампейісова мен Айман Берікханова «Қазақ елі» жобасын жүзеге асыру Тұжырымдамасының тұсаукесер рәсімін өткізді.
Дөңгелек үстел жұмысын қорытындылаған университет ректоры Серік Пірәлиев талқылау барысында айтылған ұсыныстардың бәрін жинақтап, тағы бір мәрте сараптағаннан кейін Тұжырымдамаға енгізу керектігін ескертіп және осы мәселеге байланысты еліміздегі жоғары оқу орындарының да маман-ғалымдарын бірлесе жұмыс істеуге шақырды. «Қазақ елі» пәнінің жобасына байланысты және бұл мәселенің жүзеге асуын қадағалап, бақылап отыратын үйлестіру кеңесін құру керектігін ұсыныс ретінде ортаға салды. «Әрбір азамат «Менің елім», «Менің Қазақстаным» деген мақтанышпен кеуде керіп, елі үшін бәйгеге бас тігетін өз мемлекетінің шынайы патриоты дәрежесіне көтерілген кезге жеткенде ғана біз нағыз «Қазақ елі – Мәңгілік ел» болып бой көтереміз. Сондықтан да бүгінгі талқылауға ұсынылған жобамыз жүзеге асуы үшін бәріңіз де атсалысыңыздар, бағдарлама жасаңыздар. Кітаптар, оқулықтар жазыңыздар. Бұл идеяның сәтті жүзеге асуы өздеріңізге байланысты. Сіздерден қолдау күтеміз» деді университет басшысы.
Есенәлі ЕРАЛЫ,
Абай атындағы ҚазҰПУ-дың
баспасөз орталығының қызметкері
5531 рет
көрсетілді32
пікір