- Ақпарат
- 10 Сәуір, 2014
«Артиндустрияның» таңғажайыптары
Алматыдағы ҚР Мемлекеттік орталық мұражайында Орталық Азиядағы Халықаралық көркемсурет және дизайнерлік өнер саласындағы ең ірі «Артиндустрия» атты көрме-жәрмеңке болып өтті. Шараны ҚР Мемлекеттік орталық мұражайы мен «Шығармашылық маусым» компаниясы бірлесіп ұйымдастырды. Көрменің ашылу салтанатында аталмыш мұражайдың орынбасары Бейбітғали Қақабаев «Артиндустрия» көрмесі Орталық Азия мемлекеттері бойынша ең ірі жәрмеңке екендігін, жыл сайынғы дәстүрлі жобаға қатысушылар, шеберлер, шығармашылық адамдар мен ұйымдар көбейіп келе жатқандығын айтты. Белгілі фотограф Таймас Нұртаев «Артиндустрия» жобасының тақырыбы жылдан-жылға кеңейе түсіп келе жатқандығын тілге тиек етті. Ал елімізге танымал фотограф Александр Ерғазин көрменің қарапайым халық үшін тәрбиелік маңызы зор екендігін атап өтті.
Мұражайға кіргенімізде есіктен төрге дейін жабдықталған қолөнер туындылары көзімізге жылы ұшырады. Киізден сырып, оюланып жасалған сырмақ, текемет, тұскиіз секілді төсеніштерге көз тоқтатпау мүмкін емес. Ал қола, жез, қыштан жасалған табақтар бөлек орналасыпты. Халық тұрмысында ерте кезден пайдаланып келе жатқан ежелгі жиһаздар, яғни сан алуан пішіндегі сандықтар еріксіз көз тартады. Тіпті әртүрлі сәнді қобдишалар ұлттық нақыштағы ою-өрнектермен көмкерілген. Ал ерте заманнан күні бүгінге дейін өзінің қадір-қасиетін жоймай, қол өнерінің озық үлгісі ретінде ғана емес, ыңғайлы, берік, сәнділігімен пайдаланудан қалмай келе жатқан қазақтың ұлттық киімдері көздің жауын алады. Айыр қалпақтар, бөріктер, күртелер, малақайлар, тақиялар, тымақтар, шапан, шекпен, камзолдар, байпақ, мәсі, жаулықтар көрмеге келушілердің қызығушылығын тудырары анық. Қазақ халқының дәстүрлі мәдениетін тануда осындай бұйымдардың маңызы зор. Металдан, сүйектен, тұяқтан, мүйізден жасалған қасықтар, шақшалар, шүмектерге бейжай қарай алмадық.
– Өзім Өзбекстанның Бұхара қаласынан келдім. Жиырма жылдан бері әртүрлі бұйым жасаумен айналысып келемін. Мамандығым суретші. Көптеген ортаазиялық көрме-жәрмеңкелерге қатысып келемін. Диплом, сертификаттарым бар, – деді суретші-шебер Гауһар Сайдова.
Көрмеге қойылған қолөнер жұмыстары жоғары сапасымен, өзіндік орындалу шеберлігімен және төлтумалығымен ерекшеленді. Өнер көрмесінде Қазақстан қолөнер шеберлерімен қатар Ресей, Сербия және Орта Азия елдерінің қолөнер саласындағы 300-ден астам шығармашылық иелерінің туындылары қойылған. Сәндік-қолданбалы өнердің әртүрлі жанрлары қамтылған. Мәселен, көрмеге суретші-қуыршақ жасаушылардың интерьерлік және коллекциялық қуыршақтары, пластиктен, киізден, әйнектен әзірленген авторлық жұмыстар, бейнелеу өнерінің туындылары, графика, кескіндеме, сурет, мүсін, сәндік өрнектер және т.б. бұйымдар келушілерді өзіне баурады. Сонымен қатар шарада қазақстандық және ресейлік суретшілердің, шығармашылық пен қолөнерге қажетті материалдар, құралдар шығаратын фирмалардың оқу форумдары, тұсаукесерлері, шеберлік сабақтары жұмыс істеді.
«Артиндустрия» көрмесінің ерекшелігі мұнда қазіргі заманға лайықталған қолөнер тундыларын көруге, оларды жасап, үйренуге, сатып алуға да болады екен. Қазіргі таңда адамдардың жоғарғы талғамына сай әсем заттардың барлығын, аксесуарлар, интерьерге қажетті заттар,әшекей бұйымдарды осындай көрмелерден кездестіруге болады. Бүгінде көптеген талғамы жоғары замандастарымыз үйлерін арнайы дизайнердің көмегімен жабдықтауды әдетке айналдырған. Демек, артиндустрия артта қалмақ емес.
«Артиндустрия» көрмесі аясында шеберлік сағаттары, концерт, әртүрлі ұтыс ойындары өткізілді.
Нұрлан ҚҰМАР
5536 рет
көрсетілді0
пікір