- Мәдениет
- 01 Мамыр, 2014
Қаһарман қыз Алтыншаш немесе ақын аузынан естiген аңыз
Сарбас Ақтаев
Жиырма жыл бұрынғы бір көрініс күні бүгінге дейін көз алдымнан кетпейді. Хан Кененің бас батыры Ақжолтай Ағыбайдың 200 жылдығы аталып өтіп жатқан кез еді. Сарыарқаның сауыры сынды Ағадыр тұсындағы Жуантөбе тауының баурайында тойға тігілген ақшаңқан үйлер тұтас бір ауыл сияқты. Көшелей тігілген сол үйлердің шет жағына келіп, кенеттен бір тікұшақ қонды да, одан түскен қазақтың тұңғыш ғарышкері, әуе күштерін басқаратын Тоқтар Әубәкіров құрметті қонақтар отырған ақбоз ордаға келіп кірді.
«Ассалаумағалейкүм, тойларыңыз тойға ұлассын!» деп жарқылдай күліп кірген генералды бүйір тұста отырған бір ақсақал атып тұрып, қаусыра құшақтады да: «Армысың айналайын, сайып қыраным! Қазақ даласынан ғарышқа тұңғыш ұшқан төл перзентіне Горбачев жұлдызын қимағанымен, халқың сені қастерлеп, жарық жұлдызы санайды» деп бетінен сүйді. Қарапайым ауыл қартының намысқойлығына таңғалып, сұңғылалығына тәнті болып едім сонда. Дыбыстан жылдам ұшатын әскери ұшақтың алғаш сынауын қазақ азаматына қимай, оны кеменің қармасына әкеліп қондырғанда да меңді патша Михаил Кеңес Одағының Батыры атағын әрең бергенін де білетін болып шыққан қария қайран қалдырды.
Сонау бір Ұлы Отан соғысының от-жалынында шығыс халықтары арасынан ерліктің небір ерең үлгісін қазақтардан артық көрсеткен жұрт жоқ еді. Алайда біразының еңбегі әділ бағаланбай, ресми батыр деген атақты көпшілігі ала алмаған-ды. Үш жүзден астам дұшпанды жер жастандырған Сүлейменов сияқты сан боздаққа сол атақ берілмеді. Тіпті Мәскеуді жау құрсауынан қорғап қалған 28 батырды баулыған Бауыржан Момышұлына да Кремль оны қимаған. Жаужүрек қыр ұландарының жанқиярлық ерлігі түгел еленген болса, Кеңес Одағы Батыры атағын алған қазақтардың саны қазіргіден әлдеқайда артық болар еді-ау. Әттең, дейсің де, іштен тынасың. Сондай қаһармандардың бірі осы Алтыншаш Нұрғожинова.
Бұл әңгімені маған белгiлi ақын Бақытжан Қанапиянов айтып берген едi. Оның қайда барса да, қайда болса да елiмiздiң тарихына қатысты дүниелердi қатерден тыс қалдырмай жинай жүретiн жақсы бiр әдетi бар. Анау бiр алапат жылдары Чернобыль апатынан зардап шеккен украин ағайындарға көмек бере барғандар арасында болып та ол екi халықтың өзара тарихи байланыстары туралы бiраз деректер алып қайтқан. Әсiресе, Ұлы Отан соғысы жылдары украин жерiн қандыбалақ фашист басқыншыларынан азат ету жолында қазақ азаматтары көрсеткен қаһармандық қимылдарға көбiрек зер салған. Мұрағат материалдарын аудара қарап, ақтара зерделеп, кiтапханалардағы көне газет тiгiндiлерiн парақтап, талай тың деректер де тапқан.
Бiрде ол Украина Жазушылар одағының кiтапханасынан 1944 жылы дивизиялық «Патриот Родины» газетiнде жарияланған бiр өлеңге тап болады. Тақырыбы бiрден елең еткiзедi. «Фашистiң екi танкiсiнiң күлiн көкке ұшырған комсомолка Алтыншаш Нұрғожинованың рухына» деген тақырыптың өзi елең еткiзiп, зер сала оқып, жазып та алады. Аттың жалы, атанның қомында сияқты майдан даласында асығыс жазылғанына қарамастан, жырдың мазмұны бiрден баурай жөнеледi.
Келген едiм өмiрге Украинада гүл атқан,
Днепрдiң жағасы қымбат маған жұмақтан.
Айнала егiн кешкiлiк сыңсып, толқып жырақтан,
Тебiрентетiн әуенi күй боп кiрiп құлақтан.
Туғандаймын қазiр мен Қазақстан қырында,
Тұрғандаймын сол қыздай самалды өрiп бұрымға.
Серпiп тастап сағымды жарқ-жұрқ
еткен жанары
Қарсы алдымнан жымиып қарағандай болады.
Отырғандай қарт ақын жыр селдетiп кешқұрым,
Домбыраның сазынан асырмастан ешбiр үн.
Кенет кеттi елестеп әлгi ару қыз айқабақ,
Жау оғынан жасқанбай қарсы атылған
«алға-лап».
Күн туар-ау тау қалғып, тыным табар төңiрек,
Соғыс өртi сап болып ел жыламас еңiреп.
Жапырақтар жамырап гүл шашқанда айнала,
Тұрса ғой ол жымиып, саясында жай ғана.
– Тағдырлар тоғыспай тұрмайды екен ғой, – дейдi ақын. – Соғыстан кейiн дүниеге келген бiздерге ол кезеңнiң көп сәтi күңгiрт. О күндердi бiз жалаңаяқ жар кешiп, қызылаяқ қан кешiп, оқ пен оттың ортасынан оралған ардагер ағалардың естелiктерiнен, майдангер ақындардың өлеңдерiнен бiлемiз ғой. Жауынгер жыршы Жұмағали Саинның бiр өзiнде бiр дастанның оқиғасы бар «Есiмде Айдар өзенi» не тұрады!
Сұлу Айдар, сырлы Айдар,
Украина жерiнде.
Ақының бар, ұлың бар
Мен қазақтың елiнде, – деп едi ғой жарықтық. Украин партизандарының арасында ата жауымен айқасқан ақын «Өткердiм сенде көп айлар, қалдырдым сенде көп ойлар» деп торқалы топырағында ерлiктiң өшпес iзiн қалдырған елдi ұдайы еске алуы да тегiн емес. Бауырлас халықтың елi мен жерiн азат ету жолында қасықтай қанын, шыбындай жанын аямай айқасқан сол ағалар бiр қаракөз қарындасының Отан үшiн омырауын оққа тосып, екi бiрдей темiр тажалдың күлiн көкке ұшырып опат болғанын кезiнде естiмеген де, бiлмеген де шығар. Соны ендi бiр украин жiгiтiнiң оттың басында, оқтың астында жазған өлеңi еске салып отыр. Бұл бiр жағынан қанқұйлы қас дұшпанмен украин жерiнде арыстандай айқасып, жорық жолдарын жыр жолдарымен өрнектеген ақын ағаларымыздың еңбегiне орай сыйға сыйы, жырға жыры сияқты өлең. Осыны қазақ оқырмандарының қатерiне жеткiзсек деп едiм...
Ақын iнiм осылай бiраз шалқып барып тоқтаған едi. Бұл сексенiншi жылдардың аяғы болатын. Сол сапардан оралысымен Бақытжан бiрден-ақ белгiсiз батырдың ата-анасын, ағайын-туғандарын табуға талпынды. Алайда Алматыда кiмге жолығып, кiмнен сұраса да, қаһарман қыздың өмiрi жайында бiлетiн тiрi пенде табылмады. Сондықтан ол өлеңнiң авторын iздеуге кiрiстi. Өлеңнiң авторы жас сержант Михаил Левченконың өлi-тiрiсiн, кейiнгi тағдыр-талайын бiлгелi талай жерге сұрау салды. Ақыры, оған Чернобыль АЭС-i үшiншi энергоблогының шатырында өзiмен тiзе қосып жүрген украин ақыны Анатолий Славута-Логвиненко көмектестi. Ол кезiнде Бақытжанның апатқа ұшыраған атом электр стансасына арналған «Припять үстiндегi ләйлек» атты жинағын украин тiлiне аударған қаламдасы болатын.
Бақса, Михаил Александрович Левченко қазiр Одесса университетiнiң профессоры, филология ғылымдарының докторы екен. Полтава топырағында дүниеге келген ол соғысты қатардағы жауынгер болып бастап, сержант шенiмен аяқтапты. Полктiң барлаушысы, Төртiншi Украин майданының дивизиялық газетiнiң әдеби қызметкерi болған екен. Сұрау сап өзiн iздеп жүргенiн бiле сала ол бiрден үн қатып жауап жазыпты. Михаил Александровичтiң қазақ ақынына жолдаған хатының ұзын-ұрғасы мынандай.
«Менiң өлеңiм Алтыншаш Нұрғожинованың өзiм көзбен көрiп, куәсi болған ересен ерлiгiнiң iзi суымай жатып жазылған едi. Мәселе былай болған. Ол кезде мен «Патриот Родины» газетiнiң қатардағы қызметкерi едiм. Майданда материал жинап жүрiп бiр топ солдаттармен және офицерлермен бiрге немiс фашистерiнiң қоршауында қалып қойдым. Менiңше, бұл Котовица маңында болса керек. Жағдай тым қиын едi. Кенет жауынгерлердiң арасынан қаршадай бiр қазақ қызы шыға келдi де, қорғаныс ұйымдастырып алға ұмтылды. Гранатамен жаудың бiр танкiсiн отқа орады. Орнынан тұрып, «алға» деп iлгерi ұмтылғанда, тасадан екiншi темiр тажал шыға келгенi ғой. Әлгi қыз жай-күйге қарамастан, соған қарсы ұмтылды. Өзi де мерт болды, жолдастарына да жол ашты. Бұл осы батальонның комсоргы Алтыншаш Нұрғожинова екен. Өлгеннен кейiн оны Кеңес Одағының Батыры атағына ұсынды. Кейiн қарулас достары Мәскеуде болып, қыздың туған-туысқандарын тауып алып, менiң өлеңiмдi көрсетiптi. Олар менi қонаққа шақырды. Алайда жағдай болмай, бара алмай қалдым. Сонымен байланыс үзiлдi. Жылдар жылжып, уақыт зулап, ол бiр отты оқиғаның кейбiр тетiктерiн жадымыздан өшiрiп те тастады ғой. Алайда бiр менiң ғана емес, ондаған, жүздеген жолдастарының өмiрiн аман сақтап қалған қаһарман қазақ қызының бейнесi көз алдымда тұрады да қояды. Алматыға арнайы қонаққа шақырғаның үшiн мың да бiр рахмет саған, Бақытжан! Бiрде ондағы бiр ғылыми конференцияға қатысқаным бар едi. Астаналарыңды аралап, халқыңның қонақжайлығына дән разы болғанмын. Хат жазып тұр. lздеу салған iсiңе хал-қадерiнше көмек берермiн. Сау бол, бауырым. Өзiңнiң М.Левченкоң».
Хатты алғаннан кейiн Бақытжан өзi жинаған кейбiр деректердi келтiре отырып, республиканың орыс тiлiндегi жастар газетiне шағын мақала жариялады. Оған кейбiр қазақ қаламгерлерi де атсалысты. Бiрақ Алтыншаш туралы айтарлықтай тың деректер қолға түспедi. Оқырманы көбiрек қой деп «Казправдаға» да жазып едi, одан да ойдағыдай нәтиже шықпады. Дегенмен, тақ-тұқ деректер табылмай қойған жоқ. Қарулы күштер министрлiгiнiң мұрағатындағы деректерге қарағанда, Алтыншаштың қысқа да нұсқа ғұмыры былай өрiледi.
«Гвардия лейтенанты Алтыншаш Өскенбайқызы Нұрғожинова 1924 жылы Мәскеу қаласында дүниеге келген. 1941 жылдың тамызынан Қызыл армия қатарында. Әскерге Мәскеу қаласының Сталин аудандық әскери комисариаты арқылы шақырылған. Комсомол ұйымдастырушыларының алты айлық курсын тәмамдаған соң Орталық, Воронеж және Украин майдандарында жаумен шайқасқан. Алғаш 8-гвардиялық дивизияның бiрiншi батальонының комсоргы болады. 1942 жылғы желтоқсанда жараланып, госпитальға түседi. Госпитальдан шыққаннан кейiн бiрiншi танк армиясының 24-іншi жеке механикаландырылған құрамының санитарлық бөлiмiнде медбике болып iстейдi. 1943 жылғы қарашада қайтадан жараланады. Ауыр жарақаттан жазылып шығысымен 1944 жылдың наурызында 237-атқыштар дивизиясының 835-атқыштар полкiнiң бiрiншi батальонына комсорг болып барады. Ең ақырында 1944 жылғы шiлдеде 70-атқыштар дивизиясының 207-атқыштар полкiнiң екiншi батальонына комсорг болады (Мiне, М.Левченко қызмет еткен батальон осы). 1944 жылғы 2-қазанда қаза тапты. Польшадағы Краков воеводствосының Лугмян ауданындағы «Гуто-Полянск» елдi мекенiнiң терiстiк-батыс жағына жерлендi. Өлгеннен кейiн «Қызыл Жұлдыз» орденiмен марапатталды». КСРО Қорғаныс министрлiгiнiң мұрағатындағы картотекаға жазылған қысқаша қасаң дерек осы.
Қазақтың қаһарман қызы Алтыншаш Нұрғожинованың ғұмырнамасы қысқаша осындай. Ой көзiн жете жiберiп қарар болсақ, осының өзiнде қаншама қажыр-қайрат, жалын-қуат жатыр десеңiзшi. Он жетi жасында соғысқа өзi тiленiп барған қаршадай қыз алапат шайқастың күллi от-жалынын бастан-аяқ кешiп өткен. Бiр емес үш рет жараланса да, қайсар қыз қас дұшпанын жер жастандырмай тыным таппасқа белiн бекем буған.
Солай бола тұра, қаһарманның ерлiк жолы күнi бүгiнге дейiн елдестерiне де, жерлестерiне де кеңiнен мәлiм болмай келгенi қынжылтады. Бiр украин ақынының сонау сұрапыл тұстағы жалғыз жыры болмаса, оның есiмiн ешкiм еске де алмайтындай түрi бар. Рас, сұрау салынып, iздестiру жұмыстары iлгерiлi-кейiндi жүрiп жатыр. Тағы бiр қынжыларлығы, Польшада шыққан екi томдық атақты «Память» деген кiтапта өз жерiнде жатқан жерлесiмiздiң есiмi болмай шықты. Ал оның өзi соғысқа дейiн ата-анасымен бiрге тұрған Мәскеудiң Үлкен Полянасындағы №19 үйдiң үшiншi пәтерiнде қазiр мүлдем басқа адамдар тұрады екен. Тым құрығанда Алтыншаштың шағын суретi де қолға түспей қойды. Суретi болса батыр қыздың бет-бейнесiн көрiп, көңiлдi бiр демдер едiк қой.
Қалай айтқанмен, ешкiм де, ештеңе де iз-түссiз кетуге тиiс емес. Кiм бiлсiн, Алтыншаштың туған-туыстары басқа жаққа көшiп кеткен болар. Әлде кешегi саптыаяқтан су iшiп, сабынан қарауыл қарап, екi көздiң бiрiн бiрiне аңдытып қойған зар заманнан запы болған жандар ма екен? Не 37-нiң зұлматына ұшырап әбден зәрезап болып, бас көтеруге жүрексiнiп жүр ме? Әйтеуiр, Алтыншаштың туғандары тегiн жандар болмасқа керек. Мәскеуде тұрғанына қарағанда, не Алаш ардагерлерiнiң, не алғашқы қазақ оқығандарының бiр жақындары болуға тиiс. Ата-анасы өмiрден өтсе де, ағайын-туғаны, жақын-жұраты бар шығар. Солар үн қатып, жауап жазса, қаһарман қыздың өмiр жолын айшықтай түсер деген ойдамыз.
Мiне, Ұлы Жеңiстiң 70 жылдығын торқалы той етiп атап өткелi қызу әзiрлiк жасап жатырмыз. Есiмi елге аян ардагерлерге қошемет көрсетемiз. Баяғы барға қанағат, жоққа салауат дейтiн дағдымыз. Әйтеуiр, бертін қазақтың қаһарман қыздарының тобын үшiншi болып даңқты ұшқыш Хиуаз Доспанова толықтырды. Оның баяғыда берiлетiн батыр атағы алпыс жылдан кейiн келiп иесiн әрең тапты. Ал Алтыншаш Нұрғожиновадай әлi лайықты атағын ала алмай жүрген белгiсiз батырлар баршылық шығар. Қанды-қасап соғыстың көген түбiндегi көнекөз куәгерi, Алтыншаш жасаған ересен ерлiктi өз көзiмен көрген М.Левчкенконың айтуына қарағанда, ол сол кездiң өзiнде-ақ Кеңес Одағының Батыры атағына ұсынылған екен. Ол атақ «Қызыл жұлдыз» орденiмен алмастырылыпты. Бұның таңданарлық ештеңесi жоқ. Ондайға бiздiң етiмiз үйренiп кеткен. Рейхстагқа тұңғыш жеңiс туын тiккен Рақымжан Қошқарбаевтың да батыр атағы кезiнде дәл осы орденмен алмастырылған жоқ па едi!? Отан ортақ болғанмен, Орталықтың ала қойды бөле қырқып, ұсақ ұлт өкiлдерiнiң ерен ерлiгiн елеусiз қалдыруға тырысқанын несiне жасырамыз. Бұл да сондай бiр солақайлықтың кесiрi де. Әйтпесе, Әлия, Мәншүк, Хиуаз сияқты қаһарман қазақ қыздарының қатарын Алтыншаш толықтыра түссе, нұр үстiне нұр емес пе?!
Бүгiнде саяз ойлап, таяз жүзетiн кейбiреулер «Отан үшiн!» деп жау дзотының аузын омырауымен жауып, танкiге қарсы атылып, опат болған сол бiр жүрек жұтқан ағалары мен апаларының ерлiгiн есерлiк, жанкештiлiгiн ерсiлiк санайтын сыңай танытады. Тiптi бұл бiр бастан орыс пен немiстiң арасындағы соғыс, оған қазақтың қандай қатысы бар деп соғатындар да бар. Ал сол Ресеймен iргелес өзiнiң туған жерi – Қазақ елi жатқанын, орыс орманын алған дұшпанның қазақ қорғанын да талқандайтынын ескермейдi. Осы орайда өзi де сыбағалы атағын кезiнде ала алмаған Қазақстанның Халық қаһарманы Қасым Қайсеновтың мына сөзiн еске ала кеткен артық болмас. «Жоқ ағайын, жаланың да жаласы, жамандаудың да жамандау шегi болу керек қой!» деп жазған еді ол «Қазақ әдебиетi» газетiнде. – Шындықтан аттамайық. Жетпiс жылдай Кеңес Одағы құрамында болған кезеңiнде жаман болсын, жақсы болсын, өз тарихымызды өшiруден, шындықты бұрмалаудан аулақ болайық. Кеңес халқының бұл жанқиярлық ерлiгiн жоққа шығару – тарихқа қиянат».
Ал ол ерлiк тарихын Алтыншаш Нұрғожинова сияқты саңлақтар қасықтай қанымен жазып кеткенi айдан анық.
4349 рет
көрсетілді0
пікір