- Руханият
- 07 Мамыр, 2014
Сарбаздар сап түзейді
Қазақстан жауынгерлері 14-сәуірден бастап Астанадағы «Қазақ елі» ескерткіші алдындағы алаңда болатын әскери шеруге қызу дайындалып жатыр. Шеру 7-мамырдағы Отан қорғаушылар күніне орай өткізіледі. Еліміздің абыройын асқақтататын осынау шараға 2 мыңға жуық жаяу әскер қатысқалы отыр.
Олардың төрттен үшін Қазақстан Қарулы Күштерінің жауынгерлері құрайды. Әскери салтанаттың ажарын кіргізу үшін, Астанаға басқа өңірлерден 250-ге жуық соғыс техникасы жеткізілген. Сонымен қатар 56 ұшақ пен тікұшақ сарбаздар сап түзеген алаңның аспанында самғамақ. Әскери колоннаны басқаруға 566 адамнан құралған экипаждар, жүргізушілер, механиктер, десанттар тобы құрылды. Олар әскери шеру кезінде өздері отырған көліктер мен техникалардың тұтқасы мен тізгінін ұстайды. Бұл әскери шерудің бұрынғылардан ерекшелігі – оған жаңа заманауи техникалар қатыстырылып, көпшілікке таныстырылады. Қорғаныс министрлігінің хабарлауынша олардың арасында отандық өндіріс орындары шығарған әскери техникалар да бар.
Күнделікті әскери дайындық 4-5 сағатқа созылады. 200 адамнан құралған оркестрдің сүйемелдеуімен жауынгерлердің сап түзеуі, жүріс-тұрысы, аяқ алысы жіті бақылауға алынып, сарбаздар шашау шығармайтындай дайындыққа келтірілді.
Тәуелсіз Қазақстан армиясының қуат-күшін, айбынын паш ететін бұл салтанатты шараға Қорғаныс министрлігінің, Ішкі істер министрлігінің, Төтенше жағдайлар министрлігінің, Ұлттық қауіпсіздік комитеті Шекара қызметінің және Республикалық Ұланның құрылымдары қатысады. Әскери шерудің айбатын асыру үшін еліміздің әр түкпіріндегі бөлімшелерден кең жауырынды, ұзын бойлы, қимыл-қозғалысы ширақ жігіттер іріктелген. Сонымен бірге әскери шеруге қатысу үшін дене даярлығы мен моральдық-психологиялық рухы мықты сексен бес қыз-келіншек таңдап алынған.
Әскери шеру Қорғаныс министрлігінің 2014 жылға арналған бюджеті есебінен қаржыландырылып отыр. Ал салтанатты шеру болатын күні Астана қаласының бірқатар көшелеріндегі көлік қозғалысы тоқтайтыны алдын ала хабарланды.
Әскери шеру Кеңес өкіметі 1945 жылы неміс әскерін толық талқандағаннан соң жыл сайын өткізілетін тұрақты дәстүрге айналды. Сонымен бірге мұндай шеру ірі-ірі әскери жаттығулардан кейін де өткізіледі. Қазақстандағы ірі көлемдегі тұңғыш әскери шеру 1992 жылдың 7-мамырында болды. Алғашқы әскери шеруді Қазақстанның тұңғыш Қорғаныс министрі, Халық Қаһарманы, Кеңес Одағының Батыры Сағадат Нұрмағамбетов қабылдады. Ал ең ірі әскери шеру былтыр өткен болатын. 2013 жылдың 7-мамырындағы әскери шерудің орны ретінде Отардағы 40-ыншы әскери база полигоны таңдалып, оған 7 мыңға жуық жауынгер, 500-ден аса әскери техника және 86 ұшақ пен тікұшақ жұмылдырылды. Оны тамашалауға алыс-жақын елдерден көптеген қонақтар келген еді.
Жауынгерлердің саны да, әскери техникалардың саны да өткен жылғыдан аз. Десек те, жоғарыда айтқандай әскери техникаларымыздың сапасы жақсарды. Оған қоса жауынгерлеріміздің де рухы көтерілді деп ойлаймыз. Өйткені сарбаздардың көбі тәуелсіздікпен құрдас және тәуелсіздік алғаннан кейін өмірге келген буындар. Сондықтан бүгінгі жауынгерлердің алымы да, қарымы да бұрынғылардан әлдеқайда жоғары.
Бейбіт Нәлібаев
19773 рет
көрсетілді2
пікір