- Білім және ғылым
- 09 Сәуір, 2015
ҚАЗАҚ ХАНДЫҒЫНА АРНАЛДЫ
Алматы қаласындағы Түрксіб аудандық әкімшілігі, аудандық «Қазақ тілі» бірлестігі, «Аяжан» білім беру колледжі, №26 кітапхана ұжымы бірлесіп №76 жалпы білім беретін орта мектепте Қазақ хандығының 550 жылдығына арналған «Ұлы Дала: тарихты тарқатқан тұлғалар» атты әдеби-сазды кеш өткізді.
«Қазақ хандығының құрылу тарихы», «Қазақ хандығының алғашқы астаналары» деген тақырыптарда баяндамалар жасалды. Кеш қонақтары «Қазақ хандығының құрылу тарихы» монографиясының авторы, тарих ғылымының докторы, профессор, Ұлттық Ғылым академиясының мүше-корреспонденті Берекет Кәрібаев, әл-Фараби атындағы Қазақ ұлттық университетінің доценті, тарих ғылымының кандидаты Едіге Ноянов, «Аяжан» білім беру колледжінің директоры, аудандық «Қазақ тілі» бірлестігінің төрайымы Күлдарихан Құрымбаева, аудандық мәдениет және тілдерді дамыту бөлімінің бас маманы Лаура Мақашева, колледж директорының тәрбие ісі жөніндегі орынбасары Айсұлу Қалымбетова өз сөздерінде бай тарихымыздың бүгінгі жастарды елдік, патриоттық рухта тәрбиелеудегі рөліне ерекше көңіл аударды. Колледж студенті Мақпал Қабдолованың баяндамасында Қазақ мемлекеттілігінің құрылу тарихын білу әрбір қазақстандық жастың міндеті екендігі айтылды.
Құрманғазы атындағы мемлекеттік академиялық қазақ халық аспаптар оркестрінің, «Соловушки» ансамблінің және №76 мектептің «Әдем-ай» әншілер тобы мүшелерінің өнері қуанышқа кенелтті. Дәулеткерейдің «Көрұғлы», Махамбеттің «Жұмыр қылыш» күйлері өнерпаздар орындауында кеш мазмұнын байыта түсті.
№26 кітапхана меңгерушісі Светлана Апсалықова «Қазақ хандығына 550 жыл» атты кітап көрмесіне шолу жасай отырып, кеш қонақтарын сақ, сармат, ғұн, үйсін, қаңлы және тағы басқа ежелгі мемлекеттер жайлы әдебиеттермен, М.Дулати, Ш.Уәлиханов, Л.Гумилев, М.Қозыбаев сынды атақты тарихшылардың зерттеулерімен, Қазақ хандығының құрылуы мен атақты хандарымызға қатысты тарихи деректермен таныстырды.
А.РАХМЕТХАН
2623 рет
көрсетілді0
пікір