- Білім және ғылым
- 21 Мамыр, 2015
Кітап – рухани байлық негізі
Әл-Фараби атындағы ҚазҰУ-да бірнеше жылдан бері «100 кітап» жобасы жұмыс істеп келеді. Бұл жобаға сәйкес барлық мамандық саласындағы студенттер әлемдік деңгейдегі әдебиеттер тізіміне енген кітаптарды оқиды.
Осылайша студент жастардың басым көпшілігі классикалық шығармалармен тереңірек танысып, рухани-адамгершілік құндылықтарды игеруге, кәсіби біліктіліктерін қалыптастырып, әлемдік ой қазынасының қайнарынан сусындауда.
Кітап оқу – өмірде кездесетін көптеген шешуі қиын мәселелерге жауап табуға септесетіні сөзсіз. Әрбір қаламгер өз шығармасында оқырманын тың бастамаларға бастап, ізгілікке тәрбиелейтіні анық. Бір айта кетерлігі, «100 кітап» тізіміне енген қазақ әдебиетінің туындылары да сан алуан. Аталмыш жоба университет студенттерін тың бастамаларға бастап отыр. Мәселен, оқу орнының механика-математика факультетінің магистранттары еліміздегі ақын-жазушы әйелдердің өмірі мен шығармашылығына арналған дөңгелек үстел өткізіп, қазақтың белгілі ақын қыздарының шығармашылығы мен өмірі жайында пікір алмасты. Шарада олардың туындыларынан үзінділер оқылды. Университет қабырғасында өткізілетін мұндай шаралар жастар бойында кітап оқу мәдениетін қалыптастырып қана қоймай, ұлттық әдебиетіміздің өкілдерін танып-білуге үлкен жол ашады.
Н.ЛОМАЧЕНКО,
Ш.ҒҰМАРОВА
3437 рет
көрсетілді0
пікір