- Тіл
- 24 Желтоқсан, 2015
Ажар Астанада бақ сынайды
Мемлекет басшысы «Жаңа әлемдегi жаңа Қазақстан» атты Қазақстан халқына Жолдауында: «Қазақстан халқы бүкiл әлемде үш тiлдi пайдаланатын жоғары бiлiмдi ел ретiнде танылуға тиiс. Бұлар: қазақ тiлi – мемлекеттiк тiл, орыс тiлi – ұлтаралық қатынас тiлi және ағылшын тiлi – жаһандық экономикаға ойдағыдай кiрiгутiлi» деген болатын.
Үштұғырлы тiл – дамыған мемлекет құрудың алғышарттарының бiрi, ол өмiрлiк қажеттiлiктен туындаған игiлiктi идея екенi белгiлi. «Тiлдердiң үштұғырлығы», дәлiрек айтқанда, үш тiлдi: қазақ, орыс және ағылшын тiлдерiн Қазақстан азаматтарының бiрдей меңгеруiн меңзегенiмен, бұның түпкi негiзi, көздеген мақсаты – мемлекеттiк қазақ тiлiнiң халықаралық қолданыстағы орыс, ағылшын тiлдерiмен тең қолданылатын биiкке жеткiзу, қазақ тiлiн әлемдiк тiлдер қатарына қосу үшiн нақты ұмтылыс жасау. Қандай мемлекет болмасын, оның ең әуелi мән берiп, ұлықтайтын тiлi, әрине, мемлекеттiк тiл. Елбасы Нұрсұлтан Назарбаев «Қазақстан – 2050: қалыптасқан мемлекеттің жаңа саяси бағыты» атты Жолдауында «Біз ел иесі ретінде биік бола білсек, өзгелерге сыйлы боламыз» дей келе: «Қазақ тілі – біздің рухани негізіміз. Біздің міндетіміз – оны барлық салада белсенді пайдалана отырып дамыту. Қазақ тілін кеңінен қолдану жөніндегі кешенді шараларды жүзеге асыруды жалғастыру керек. Біз алдағы уақытта да мемлекеттік тілді дамыту жөніндегі кешенді шараларды жүзеге асыруды табандылықпен жалғастыра береміз. Кез келген тіл өзге тілмен қарым-қатынасқа түскенде ғана өсіп, өркен жаятынын әрдайым есте сақтаған жөн» деген болатын. Тіл білу байлық. Әсіресе, өркениеттік өрелік алға шығып, жаһанданудың лебі есіп тұрғанда көп тілді игергенге ешкімнің таласы бола қоймайтыны анық. Сондықтан қазақ, орыс және ағылшын тілдерін жетік меңгерген ұрпақ қалыптастырып, бәсекеге қабілетті болу мақсатында мемлекетіміз арнайы қаржы бөліп, түрлі іс-шаралар ұйымдастырып келеді. Алматы облысының тілдерді дамыту жөніндегі басқармасы Талдықорған қаласында «Тіл шебері – 2015» атты облыстық байқауын ұйымдастырды. Тіл шебері облыстық байқауының негізгі мақсаты - тілдерді дамыту мен қолданудың мемелекеттік бағдарламасын жүзеге асыру, Елбасының «Қазақстан – 2030» Стратегиялық бағдарламасы, «Мәңгілік Ел» идеясы, «100 нақты қадам» тапсырмалараның міндеттерін орындау мақсатында, қазіргі уақытта елімізге адал қызмет етіп жатқан мемелекеттік қызметкерлердің ішінде де, осы үш тілді жетік меңгерген жастардың бар екенін дәлелдеу. Байқауға 20 мен 25 жас аралығындағы мемлекеттік қызметкер қатысып, облыстың әр өңірінен барған үш тілді меңгерген мемлекеттік қызметкерлердің ішінен бас жүлдені қаламыздың білім бөлімінің бас маманы Ажар Қалиева жеңіп алды. Байқау жеңімпазына қыркүйек айында Астана қаласында өтетін республикалық байқауға жолдама берілді. Біз Ажарды құттықтай отырып, алда тұрған биік белестеріне тек сәттілік пен жеңіс тілейміз.Бибігүл ШӘЙКЕНОВА, Қапшағай қалалық мәдениет және тілдерді дамыту бөлімінің басшысы
2083 рет
көрсетілді0
пікір