- Мәдениет
- 25 Ақпан, 2016
«Әсем сазды, сырлы үнді әндер-ай»
Биыл композитор, Қазақстанға еңбек сіңірген өнер қайраткері Кеңес Дүйсекеев мерейлі 70 жасқа толып отыр. Осыған орай жуырда облыстық Сақтаған Бәйішев атындағы әмбебап-ғылыми кітапханасының ұйымдастыруымен және қаламыздағы Ахмет Жұбанов атындағы музыкалық колледжінің қолдауымен «Әсем сазды, сырлы үнді әндер-ай» тақырыбында музыкалық шара өткізілді. Ән өнерінің көкжиегінде айрықша жұлдыз болып жарқырап жүрген Кеңес Дүйсекеевтің әндері тыңдармандарына кеңінен танымал. Өнер қайраткері К.Дүйсекеевтің 70 жас мерейтойының қарсаңында композитордың туындыларын насихаттап, оның өмірі мен шығармашылығын оқырмандарға таныстыруды мақсат еттік. Кешке мәдениет қызметкерлері, өнер мамандары, А.Жұбанов атындағы музыкалық колледждің оқытушылары мен студенттері, кітапхана оқырмандары, кітапхана жанынан құрылған «Өнерпаз» клубының мүшелері қатысты. Шара барысында «Туған жер әуендері» тақырыбында әдебиет көрмесіне библиографиялық шолу жасалды. «Құрмет» орденінің иегері, «Ақтөбе облысының Құрметті азаматы Ғ.Байдербес композитордың Ақтөбе жеріне жиі келетінін, жалпы патриоттық әндері арқылы жастарды елін, жерін сүюге тәрбиелеудегі рөлі зор екенін тілге тиек етті. Кеш барысында Роза Рымбаева, Нағима Есқалиева, Мақпал Жүнісова, Ақжол Мейірбеков, Нұрлан Өнербаев сынды белгілі әншілеріміз орындап жүрген композитордың «Домбыра туралы баллада», «Қарағым-ай», «Сәлем саған туған жер», «Өкінбе сен» әндерін аталмыш колледждің СКД-3 тобының студенттері Е.Саинов, Е.Ғайниденов, Ә.Айжігітов, Т.Дүйсенбаев тарту етті. Шараны С.Бәйішев атындағы Ақтөбе облыстық әмбебап ғылыми кітапханасының директоры Н.Жұмағұл қорытындылап, қатысушыларға алғыс айтты.
Ақерке САҒИДОЛЛАҚЫЗЫ, С.Бәйішев атындағы Ақтөбе облыстық әмбебап ғылыми кітапханасының Өнер әдебиеттері бөлімінің меңгерушісі Ақтөбе
2953 рет
көрсетілді0
пікір