- Тарих
- 10 Қараша, 2016
Қазан жүрек Қайдауыл
Қазақ теміржолы бойымен шығыстан батысқа қарай жол тартсаңыз, Шалқар станциясынан өткеннен кейін көп ұзамай Қайдауыл батыр бекеті алдыңыздан шығады. Тәуелсіздіктің ширек ғасыры бізге алды-артымызды бағамдауға, тарихымызды түгендеуге жол ашып бергендей. Шынында да, біздің бүгінгі биігіміздің бастауы біздің ата-бабаларымыз ғұмыр кешкен сонау замандарға жетелемей ме?! Осы тұрғыдан келгенде Сырым Датұлы бастаған ұлт-азаттық қозғалысының аса көрнекті қайраткерлерінің бірі, Шекті ішіндегі Қырғыз руынан шыққан, ел-халқының тәуелсіздігі үшін күрескен тарихи тұлға Қайдауыл батыр Едігеұлының 250 жылдық мерейтойының аталып өтуі бір жағынан тағылым да іспетті.
Аудандық мәдениет үйінде батыр мерейтойына арналған ғылыми-теориялық конференцияға халық көп жиналды. Қазақстан Республикасының Мәдениет қайраткері, Қазақстан халқы ассамблеясы «Бірлік» ақсақалдар кеңесінің төрағасы Еркін Құрманбеков шараны жүргізіп, ел Тәуелсіздігінің 25 жылдығы тұсындағы бұл жиынның маңыздылығын атап көрсетті. Аудан әкімінің орынбасары Дариға Қарашолақова осындай батыр бабаларымыздың жасаған ерліктері жас ұрпаққа өшпес өнеге екенін айтып, патриоттық-тәрбие берудегі жұмыстардың алда да жалғасатынын жеткізді. Жиында Астанадан арнайы келген академик Өмірзақ Озғанбаев Қайдауыл батырдың ерлігі туралы ауқымды баяндама жасады. — Қайдауыл батыр туралы айтқанда жұртшылық оны заманының мықтысы, дүлдүл батыры, ақыл иесі, дұшпаны мен жауларын күшпен де, ақылмен де жеңе білген тарихи тұлға ретінде еске алады. Бұл кісі есімінің ел аузында сақталып, ерлік істерінің ұрпақтан-ұрпаққа беріліп, бүгінгі күнге дейін жетуінде біле білген адамға үлкен мән жатыр. Әдетте жазу-сызуы қалыптасқанға дейінгі бүкіл тарихы ауызекі айтылып, ердің де, ездің де қам-қарекеті жүздеген жылдар бойы халық санасында өшпестей болып сақталатындықтан, батыр бабамыздың ел бостандығы жолында халқына сіңірген еңбегінің ұмытылмауы табиғи жағдай деп түсінеміз. Оның үстіне Қайдауылдың ерлік істері жаугершілікпен, Отан қорғаумен астасып жатқандықтан, халықтың оған деген сүйіспеншілігі еселене түседі емес пе,— деді ол. Көтібар батыр Сырым Датұлы бастаған ұлт-азаттық қозғалысына жәрдем беруге 800 жауынгерден тұратын қолды бастап майданға аттанғанда Қайдауыл батыр елге бас-көз болуды ойластырып, біраз жасақтарымен ел ішінде қала береді. Осындай ұрымтал сәтті пайдаланған түрікмендер Шекті, Жетірудың Табын, Тама, Адай ауылдарына шапқыншылық жасайды. Шайқас басталады. Қайдауыл батыр дұшпанның батырларын жекпе-жекке шақырып, жан алып, жан беріскен айқаста түрікменнің жеті батырын жеңеді. Жекпе-жектегі жеңістен мерейлері тасыған қазақ шебі түрікмендерді талқандап, қалдықтарын Үстірттен әрі қуып тастаған екен. Осы оқиғаны Шектінің Қырғыз руынан шыққан Толыбай жыршы былай деп жырға қосқан: «Аруағы асып күркіреп, Айдынға шықты Қайдауыл, Жекпе-жекті айқаста, Қанын судай ағызып, Түсірді жеті батырын, Қаһарлы теке-жәуміттің». Бұдан Қайдауыл батырдың жүрек жұтқан теңдессіз ерлігі айқын көрініп тұр. Қайдауыл батыр 1766-1839 жылдар аралығында өмір сүрген. Көтібар, Арыстан батырлардың замандасы. Борсық құмынан Ор өзеніне дейінгі аралықты жайлаған Шектінің батыры. 1789 жылы башқұрттармен болған шайқаста еліне төнген жауды талқандаған. 1783-1797 жылы Сырым Датұлымен бірге патша өкіметінің отарлау саясатына қарсы күрескен. Ақбұлақ, Жем, Калмыково әскери бекіністерінде ерекше жеңіске жеткен. 1839 жылы казактар мен башқұрттардан құралған патша өкіметі әскерлерімен болған шайқаста қаза табады. Оның бейіті қазіргі Шалқар ауданында орналасқан. 1996 жылы батырдың 230 жылдық мерейтойы атап өтіліп, ас берілді. Конференция кезінде Қайдауыл батыр Едігеұлының осындай ерліктері туралы көп әңгіме айтылды. Батыс Қазақстан инновациялық-технологиялық университетінің профессоры, тарих ғылымының кандидаты Самат Құрманалин, Жүсіп Баласағұн атындағы Қырғыз ұлттық университетінің аға оқытушысы Шекербек Сазықұлов көптеген танымдық деректерді ғылыми тұжырымдап жеткізді. Шалқар қаласындағы дене шынықтыру-сауықтыру кешенінде аталған шара аясында ұйымдастырылған ұлттық ойын-сайыстары — қазақша күрес, қол күресі, гір көтеру, тоғызқұмалақ көпшіліктің қызығушылығын тудырды. Тарих ғылымының кандидаты, профессор Зәкіратдин Байдосов, еңбек ардагері, «Шалқар ауданының Құрметті азаматы» Оразбай Әділбаев, батырдың ұрпағы Дәулетжан Елеусізов жиналған қауымды батыр бабаның 250 жылдық мерейтойымен құттықтап, жарысқа қатысушыларға сәттілік тіледі. Жарыс қорытындысы бойынша қазақ күресінен 70 келі салмақ дәрежесінде Жасұлан Жұмағұлов, түйе палуан сайысында Нұржан Иса, қол күресінен Саламат Мұхамбетжанов, гір тасын көтеруден Манат Емжаров басты жүлдені жеңіп алды. Сонымен қатар тоғызқұмалақтан Нұрхан Мұстафин, Нұрлыайым Таласбаева, Азат Нағашыбай, Ақмоншақ Нағашыбай бірінші орынды иеленіп, ұйымдастыру алқасының Мақтау қағазы және ақшалай сыйлықтарымен марапатталды. Қайдауыл станциясы маңындағы батыр кесенесі осыдан жиырма жыл бұрын батыр ұрпақтары Дәулетжан Елеусізов пен Ілескен Ізбановтың бастамасымен, Төлеуғазы Балниязовтың жобалауымен бой көтерген болатын. Таяуда оның сыртқы келбеті қайта жаңғыртылып, айбындана түсті. Қайдауыл батыр Едігеұлының ұрпағы Жайлан Қалмұханов осыдан отыз жылдан астам уақыт бұрын баба зиратына арнайы барып, басына белгі қойған екен. Енді сол кесене басында батыр ұрпақтарының бірі Ғалым Дәулеталин, қырғызстандық қонақ Абасбек Усубалиев сөз алып, шалқарлық Үбайдулла Елеусізов бабаға арнауын оқыды. Мәтей Қоқанұлы атындағы мешіттің бас имамы Нұрлыбек Тәкеев батыр рухына құран бағыштады. Қайдауыл станциясы вокзалы алаңында Қайдауыл батыр Едігеұлына орнатылған ескерткіш-бюстінің салтанатты ашылуы ерекше толқынысты жағдайда өтті. Аудан әкімі Бауыржан Қаниев, қырғызстандық азаматтар Алтымыш Құлматов, Шекербек Сазықұлов, «Қазақстан темір жолы-жүк тасымалы» АҚ Ақтөбе бөлімшесі филиалы ардагерлер ұйымының төрағасы Бошық Қуатов, Қауылжыр ауылдық ардагерлер ұйымының төрағасы Жанділдә Нұрмағанбетов бірінен кейін бірі сөз алып, тебіреністі лебіздерін білдірді. Баба ұрпағы Ақжарқын Әбдірейімқызы батырға арнауын оқыды. Атап өтер жайт, бюст жұмыстарын жүргізген — Қырғызстан көркем академиясының оқытушысы, елге белгілі мүсінші Алмаз Үкеев. Ол Қырғыз еліндегі белгілі көптеген тарихи тұлғалардың мүсіндерін жасаған азамат екен. Биіктігі 1,12 метр болатын, қоламен қапталған бюст бас-аяғы 25 күнде сапалы жасалған. ...Бір кездері сайын даланы дүбірлетіп, бір-біріне серік болып ел қорғаған Көтібар, одан тараған Есет-Дәрібай, Қарағұл, Әзберген, Қайдауыл сынды ерлер бүгінгі күні де ел айбыны секілді. Шалқарда өткен шара осы ойымыздың айғағы іспетті болды. Қаратаудан келген Тасыран жырау заманында: Шектіден шыққан екен екі үлек, Дүмпіген жаратылысы туған бөлек. Көтібар — алмас қылыш ел тірегі, Қайдауыл сағы сынбас, қазан жүрек, — деп жырлаған екен. Қазан жүрек Қайдауылдың өшпес ерлігі, халық сүйіспеншілігіне бөленген алып тұлғасы алғы күндерде де тәуелсіз еліміздің жас буынын жақсы істерге жетелеуде үлгі бола беретіні сөзсіз.
Жанғабыл ҚАБАҚБАЕВ
Ақтөбе облысы Шалқар ауданы
5784 рет
көрсетілді0
пікір