- Ақпарат
- 14 Желтоқсан, 2017
Ерлікті ту еткен естелік
Тәуелсіздік – тәу етер асқақ ұғым. «Тәуелсіздік» деген сөзді естігенде, 1986 жылғы Желтоқсан көтерілісінің бірден еске түсуі таңғаларлық нәрсе емес. Себебі, дәл осы қазақ жастарының жаппай бас көтеруінен кейін 1991 жылы 16 желтоқсанда Қазақ елі тұңғыш рет Тәуелсіз Қазақстан Республикасы болып жарияланды. Бабаларымыз сан ғасырлар бойы аңсаған арманына қол жеткізді. Сондықтан да тарихымызда Желтоқсан құбылысының алатын орны ерекше.
Алматы қаласындағы №4 оқушылар үйінде (Алмалы ауданы) Желтоқсан қаһармандарын еске алу мақсатында «Желтоқсан – Тәуелсіздік таңы» атты мерекелік кеш ұйымдастырылды. Кешке Желтоқсан күрескерлері – «Құрмет» орденінің иегері Жансая Сәбитова мен қайраткер-ақын, Бүкіл түркі дүниесі ақындары фестивалінің лауреаты Болат Шарахымбай құрметті қонақ ретінде шақырылып, №24, 36, 136 мектеп оқушылары көрермен болып қатысты. №4 оқушылар үйі директорының оқу-тәрбие ісі жөніндегі орынбасары Шарапат Нұрелова келген қонақтарды таныстырған соң, желтоқсаншылар халқымыздың басына түскен сол бір ауыр да сын сағаттар туралы әңгіме шертіп, бірқатар тарихи-танымдық тұрғыдан ақпараттар мен мағлұматтар беріп өтті. Олардың тебірене айтқан естеліктері оқушыларға көп ой салды. Сосын сөз тізгінін қолына алған оқушылар бірінен соң бірі сахна төріне шығып, тәуелсіздік, бостандық, еркіндік жайлы өлеңдерін толғана оқи жөнелді. Олардың рухтана оқыған жыр шумақтарына риза болған қонақтар өздерінің ақ баталарын берді. Аталған шараға әсіресе №24 мектептің оқушылары айрықша үлестерін қосты. Диана Молшанова мен Аружан Мұсаева «Туған жер» әнін шырқағанда тебіренбеген жан қалмады. Мәдина Рахатова мен Аружан Жапарбекованың домбырамен орындаған әндері кештің көрігін кіргізді. Ал Мирас Мақсымов «Көк тудың желбірегені» әнін келістіре орындап, оның шығу тарихын баяндап берді. Сондай-ақ оқушылар өздерінің көкейде жүрген сұрақтарын қойып, ойларымен бөлісті. Кеш баршаның сүйіктісіне айналған «Атамекен» әнімен аяқталды.
Кеңескүл ОРМАНОВА, №4 оқушылар үйінің бөлім меңгерушісі АЛМАТЫ
7832 рет
көрсетілді0
пікір