- Әдебиет
- 22 Ақпан, 2018
Биыл – Мағжан жылы
Анкара қаласындағы Гази университетінде Алаштың ақиық ақыны Мағжан Жұмабайдың 125 жасқа толуына орай халықаралық конференция өтті.
Мағжан Жұмабайдың қаламгерлігі мен қайраткерлігі туралы сөз сөйлеген Қазақстанның Түркиядағы елшісі А.Сапарбекұлы ақынның түркі бірлігіне, түркі ынтымақтастығына қосқан зор үлесін атап өтті. Ақынның «Түркістан», «Алыстағы бауырыма», «Пайғамбар» сынды өлеңдерінің қазақ пен түрік халықтарының ортақ мұрасына айналғандығын жеткізді. Сондай-ақ Мағжан мұраларының екі бауырлас елді елдестіретін, жұртты жалғайтын алтын көпір екендігін айтты. Қайраткер ақынның Тәуелсіздік жолындағы атқарған ерен еңбектерін атап өткен А.Сапарбекұлы Қазақстанның ширек ғасырда қол жеткізген жетістіктері мен «Рухани жаңғыру» бағдарламасы аясында атқарылған іс-шаралар туралы егжей-тегжей мәлімет берді. Сөз соңында елші биылғы жылды «Мағжан Жұмабай жылы» етіп жариялаған Түркі мәдениетін дамыту ұйымына алғыс айтты. Халықаралық жиынға қатысқан әдебиеттанушы ғалымдар мен түрік зиялы қауым өкілдері ақын өмірі мен шығармашылығы туралы баяндама жасады. Сонымен қатар аталған шара аясында Қазақстаннан келген қонақтар мен түрік зиялылары Анкараның Кечиөрен муниципалитетінде орналасқан Мағжан Жұмабайдың ескерткішіне гүл-шоқтарын қойып, ақынның биік рухына тағзым етті.
Бағдагүл Мұратқызы
1337 рет
көрсетілді0
пікір