• Ақпарат
• 13 Маусым, 2019

Қазақстан Президенті Қасым-Жомарт Тоқаев: ӘР АЗАМАТТЫҢ МҮДДЕСІН ҚОРҒАУ – БАСТЫ МАҚСАТЫМ

Кеше Елордада жаңадан сайланған ­Президент Қасым-Жомарт Тоқаевтың Ұлықтау рәсімі өтті. Салтанатты шараға Тұңғыш Президент Нұрсұлтан ­Назарбаев, Үкімет және Конституциялық Кеңес мүшелері, Парламент депутаттары, қоғамдық ұйымдар мен БАҚ өкілдері және құрметті меймандар қатысты. Ұлықтау рәсімінде Қазақстан Республикасының Заңына сәйкес, Қасым-Жомарт Тоқаев Конституцияға қолын қойып ресми түрде ант қабылдады. Ант берілгеннен кейін Орталық сайлау комиссиясының төрағасы Берік Имашев Президент куәлігін табыстады. Қасым-Жомарт Тоқаев Қазақстан Республикасының Президенті қызметіне кірісті. Ұлықтау шарасында жаңадан сайланған Мемлекет басшысы жұртшылыққа сөзін арнады.

– Аса қадірлі Елбасы! Құрметті отандастар! Ең алдымен, маған зор сенім артып, қолдау көрсеткен барша Қазақстан халқына алғыс айтамын! Бұл сайлау, шын мәнінде, демократия талаптарына сай өтті. Сайлау алаңында, нағыз ашық бәсекеге түсу мүмкіндігі болды. Барлық саяси күш өкілдері қатысты. Саяси бағдарламалар сайысқа түскен әділ дода болды. «Сайлау – бұл қатысушылардың пікірі ғана жеңіске жететін жарыс» дейді. Расында, әділ пікір. Осы өте маңызды саяси бәсекеде біздің халқымыздың даналығы, парасаты жеңді. Сондықтан бұл жеңіс – халқымыздың жеңісі! Біз бір ел болып, халық болып Қазақстанның алдағы даму жолын бірге айқындадық. ­9 маусымда Қазақстанның жарқын болашағы үшін дауыс берген Әрбір азаматтың пікірі – Біз үшін өте маңызды! Өйткені халқымыздың татулығы, ынтымағы, бірлігі – біздің ең басты құндылығымыз. Осы құндылықты көздің қарашығындай сақтау – баршамызға ортақ парыз. Сондықтан Президент ретінде халқымызға мынаны айтқым келеді: Еліміздің әр азаматының мүддесін қорғау – менің басты мақсатым. Оларды саяси көзқарастары мен ұстанымдарына қарай бөлуге жол бермеймін! Түрлі саяси және қоғам қайраткерлерінен келіп түскен құнды ұсыныстарды, бастамаларды мен өз жұмысымда міндетті түрде ескеремін. Ашық және әділ жұмыс істейміз. Біз үшін ең маңызды міндет – заңға сай адал қызмет ету. Біздің бір ғана Отанымыз бар! Тағдырымыз – бір! Біз халқымыздың жарқын болашағы үшін бәріміз бірге еңбек етеміз! Ақиқатын айтуымыз керек, бұл сайлауда біздің азаматтарымыз Елбасының стратегиялық бағдарын қолдап дауыс берді! Нұрсұлтан Әбішұлы Назарбаев бүкіл әлем мойын­даған даму моделін жасады. Қазақ­станның көк туын дүниежүзінің түкпір-түкпірінде желбіретті. Осы күндері менің атыма азаматтарымыздан көп­теген өтініш-тілектер келіп түсуде. Олардың бәріне ортақ бір ғана тілек бар: Елбасымыздың жолын, Стратегиясын сақтау және оны одан әрі нығайту. Шын мәнінде, халықтың дәл осындай өтініш-тілек айтуы – заңды, орынды. Себебі қазіргі дамыған Қазақстан – бұл, ең алдымен, Елбасының арқасы. Елбасы – қазақ мемлекетінің негізін қалаушы ұлы тұлға. Ол жаһандық деңгейдегі мемлекет қайраткері. Әлем тарихына дәл осылай жазылды. Елбасының халқымыз үшін және әлем қауымдастығы үшін сіңірген орасан зор еңбегін Әрқашан құрметтеу – бәрімізге ортақ парыз. Қадірлі қауым! Менің сайлауалды үгіт-насихат жұмыстарым – бұл үлкен мін­деттің алдындағы халықпен кеңесу болды. 2019 жылдың 13 мамырында #BIRGE жал­пыхалықтық акциясы басталды. Оның ­басты мақсаты – ел дамуындағы ең маңызды міндеттерді анықтау. Қазақстанның барлық аймақтарынан түрлі ұсыныстар жиналды. Бүгінге дейін 540 мыңға жуық ұсыныс-тілек келіп түсті. #BIRGE акциясына қатысып, азаматтық белсенділік танытқан барша халыққа шын жүректен алғысымды білдіремін. Енді біз қоғамдағы өзекті мәселелерді айқын көріп отырмыз. Оның шешу жолдарын білеміз. Бүгін халықты, ең алдымен, не мазалайды? Ең бірінші, азаматтар барлық жерде әділдік орнауын қалайды. Әлеуметтік саясаттан бастап мемлекеттік ор­гандардың халыққа әділ қызмет көрсетуін талап етеді. Халықты толғандырып отырған басты мәселе – табыс көлемінің азаюы. Халықаралық қаржы нарықтарының тұрақсыздануы, теңгенің девальвациясы халықтың табысына кері әсер етті. Миллионнан астам азаматтарымыз банктен несие алуға мәжбүр болды. Табысы жоғары және төмен азаматтардың арасындағы алшақтық – біздің қоғамды мазалайтын тағы бір өзекті мәселе. Әрине, мұндай құбылыстар бүкіл әлемде бар, дегенмен, тоқмейілсіп отыра беруге болмайды. Сондықтан дәл осы өткір әлеуметтік-экономикалық және саяси мәселені шешу үшін ортамерзімді кешенді шаралар қабылдау қажет. Қоршаған ортаның қазіргі мүшкіл хәлі – көпшіліктің көкейіндегі мәселе. Сондықтан елімізге бірыңғай экологиялық саясат қажет. Қоршаған ортаны қорғау жүйесіне серпін беретін жаңа Экологиялық кодекс қабылдау керек. Келесі өзекті мәселе – халықты сумен қамтамасыз ету. Таза ауыз су әрбір үйде, әрбір отбасында болуы міндет. Тағы бір маңызды, халықты мазалайтын мәселе бұл – жолдардың сапасы. Сол себепті автожолдардың жағдайын жақсарту – біздің негізгі мақсаттарымыздың бірі. Келесі маңызды бағыттарға баса мән беруіміз керек. Бірінші бағыт. Халықтың табысын арттыру. Тұрақты және қарқынды экономикалық өсім арқылы ғана бұл мәселені шешуге болады. Ең алдымен, өсім бізге не үшін қажет екенін терең түсінуіміз керек. Азаматтарымыз өз елінде алаңсыз өмір сүріп, еңбек етіп, ұрпағын тәрбиелеп, халқымыздың жетістіктеріне бірге қуанып, мақтан тұту үшін Экономикалық өсім болуы тиіс. Таяу арада Үкіметтің кеңейтілген отырысында біз еліміздің әлеуметтік-экономикалық дамуына арналған нақты міндеттерді айқындаймыз. Екінші бағыт. Сыбайлас жемқорлықты жою. Бірінші қыркүйекке дейін жемқорлықтың деңгейін мейлінше төмендетуге бағыт­талған реформалар топтамасы дайындалады. Жемқорлық – мемлекеттің дамуын тежейтін кесел. Бұл қо­ғамдағы өзара сенімге, жалпы мемлекетіміздің қауіпсіздігіне қатер төндіретін құбылыс. Сыбайлас жемқорлыққа қарсы жүйелі жұмыс жүргіземіз. Үшінші бағыт. Сот және құқық қорғау жүйесін реформалау. Сот – заң үстемдігінің кепілі. Сондықтан судьялар жоғары кәсіби және адамгершілік талаптарына сай болуы – бұл үлкен міндет. Судьялар мен осы қызметке үміткерлерді бағалау және іріктеу жүйесін қатаңдату керек. Сот – әділдіктің соңғы шегі болуы тиіс. Құқық қорғау жүйесінің басты міндеті – халықтың сеніміне ие болу. Төртінші бағыт. Жаңа жұмыс орындарын ашу және халықты лайықты жалақымен қамту. Ұлттық табысты әділ бөлу мәселесі бұл – стратегиялық маңызды дүние. Мемлекеттік бюджеттің қаражатын, ең алдымен, келешегі зор мақсаттарға және жаңа жұмыс орындарын ашуға бөлу қажет. Бесінші бағыт. Тұрғын үй мәселесін шешу. Түрлі санаттағы азаматтардың қолжетімді баспанаға ие болуына айрықша назар аударамын. Біздің алдымызда Бірыңғай тұрғын үй саясатын жасақтау міндеті тұр. Үкімет осы бағытта нақты шаралар қабылдайды. Алтыншы бағыт. Әділетті әлеуметтік саясат. Біз адам капиталын дамыту саясатын жалғастырамыз. Бұл бағытта, ең алдымен, не істеуіміз қажет? Жаппай білім беруді қолдау. Барлық тұрғындарға сапалы медициналық қызмет көрсету. Бұл мәселелер бойынша біздің тұтас бағыт-бағдарымыз бар. Біз мұғалімдердің және дәрігерлердің мәртебесін көтеретін жаңа заңдар қабылдаймыз. Олардың құқығын қорғап, материалдық жағдайын жақсарту үшін тиісті жағдай жасаймыз. Жетінші бағыт. Өңірлерді дамытудың жаңа бағдары. Біздің қағидамыз баршаңызға мәлім: Қуатты аймақтар – Қуатты Қазақстан. Азаматтарымызды толғандырған нақты мәселелер жергілікті деңгейде шешілуі тиіс. Жергілікті өзін-өзі басқару жүйесін нығайтамыз. Аймақтағы қордаланған мәселелерді шешуге халық белсене араласатын болады. Сегізінші бағыт. «Рухани жаңғыру» құндылықтары біздің басты рухани бағдарымыз болып қала береді. Тарихқа құрметпен қарау, Отанға адал болу, ғылым-білімге деген ұмтылыс – мұның барлығы біздің халқымыздың бойындағы асыл қасиеттер. Бұл қасиеттер біздің халқымыздың бірлігін және ұлтымыздың жасампаздығын нығайтады, бәсекеге қабілетті ел болуға жол ашады. Қазақстанды болашаққа бастайтын – жастар. Сондықтан бұл бағдарламаны жас ұрпақты тәрбиелеуге бағыттауымыз қажет. Тоғызыншы бағыт. Сыртқы саясат. Біз көп­векторлы сыртқы саясат бағдарын жалғас­тырамыз. Әлемдік аренада ұлттық мүддемізді ілгерлетіп, қорғайтын боламыз. Елдің сыртқы саясаты мемлекетке, ұлттық бизнеске, әрбір азаматқа нақты табыс әкеледі. Оныншы бағыт. Сөзімді жастарға арнағым келеді. Сіздерге Қазақстан дамуында шешуші рөл атқару міндеті тұр. Елбасы 2019 жылды «Жастар жылы» деп жариялады. «Жастар – ел тірегі» арнаулы жобасы іске қосылды. Біз жастардың бизнес бастамаларын дамытуға бағытталған «Жас кәсіпкер» жастар стартапын қолдаймыз. Жастарды жұмыспен қамту бағдарламасын жүзеге асырамыз. Талантты жастарды мемлекеттік басқарудың барлық деңгейлеріне тарту үшін «Президенттік кадрлық резерв» қалыптасатын болады. Біздің жастарымыз мақсат­шыл, еңбекқор, креативті. Сондықтан Қазақстанның болашағы сенімді қолда. Қымбатты отандастар! Алдымызда ауқымды жалпыхалықтық міндеттер тұр. Мақсатымыз – айқын, жолымыз – ашық! Қазақстан жаңа мүмкіндіктер мен перспективалар еліне айналды. Оның игілігін жастар мен келешек ұрпақ көреді. Біз бабалар дәстүрін қастерлейтін, жаһанның озық жетістіктеріне ұмтылатын халықпыз. Бұл – біздің күш-қуатымыздың діңгегі. Біз алдымыздағы барлық қиындықтарды бірге еңсереміз. Біз қуатты әрі гүлденген Қазақстанның өркендеуі үшін Бірге еңбек етеміз. Антқа адал болу, сертке берік болу – менің халық алдындағы парызым. Қазақстанның жарқын болашағы үшін, халық үшін аянбай еңбек етуге серт беремін. Баршаңызға амандық, құт-береке тілеймін. Қасиетті Отанымыз – Қазақстан Республикасы жасай берсін!

Жақсылық ҮШКЕМПІРОВ, Қазақстанның Еңбек ері: Президентті қолдауымыз керек

Қазақстан Республикасының кезектен тыс Президентін сайладық. Бұл еліміз үшін үлкен жаңалық, тарихи оқиға болды. Жаңа Президент Қ.Тоқаевты бәріміз білеміз. Қаншама жылдар бойы қазақ елінің өсіп-өркендеуіне сіңірген еңбегі аз емес. Еліміздегі барлық жағдайдан хабардар. Қазақ елін әлемге танытып жүрген азаматтың бірі. Еліміз үшін әлі талай еңбек ететініне сенімдімін. Оны инаугурация кезінде өзі де айтты. «Қолымнан келгенше барлық жағдайды жасаймын» деді. Бірақ жалғыз адам соншама жұмысты бір өзі бітіре алмайды ғой. Халықтың қолдауы керек. Бәріміз бір болсақ, алмайтын қамал болмайды. Ата-бабамыздан мұраға қалған ұлан-байтақ жерімізді игеріп, Елбасының бастамаларын ары қарай ауызбіршілікпен жалғастырып кетсек, жаман болмаймыз. Белді бекем буып, бәріміз бір ғана Отанымыз үшін жұмыс істеуіміз керек. Сонда ғана үлкен-үлкен табыстарға жетеміз. Өзімізді-өзіміз көтермесек, бізді ешкім сырттан келіп жарылқамайды. Біріміздің аузымыздан біріміз жырып жүрсек, дамымаймыз. Сондықтан ­Отанымыз үшін, еліміз үшін барымызды салуымыз керек. Кезінде осы ой мені Олимпиада ­чемпионы қылған. Биыл Жастар жылы деп жатырмыз. Жастарымыздың болашағы, дамуы үшін қаншама қаражат бөліп ­жатыр. Қазақстанды көркейтетін де, өсіретін де солар. Жастар аман, ел іргесі бүтін, жұртымыз тыныш болсын!

Арман ЖҮДЕБАЕВ, Құрманғазы атындағы Қазақ ұлттық консерваториясының ректоры:Тарихи сабақтастық сақталады

Қазақстанның жаңадан сайланған Президенті Қ.Тоқаевтың инаугурациясы жоғары деңгейде өтті. Осы тарихи оқиғамен барша қазақстандықтарды шын жүректен құттықтаймын. Қасым-Жомарт Кемелұлы бұл лауазымға лайық тұлға деп білеміз. Қаншама жыл бойы Сыртқы істер министрі болып, еліміздің халықаралық беделін арттыруға көп үлес қосты. Мемлекетіміздің қиын-қыстау кезінде Премьер-Министр болды. Елбасымыздың сенімді серігі. Инаугурация кезінде Тұңғыш Президент Н.Назарбаевтың бастамалары мен бағдарын одан әрі жалғастыратынын айтты. Жастардың дамуына, әлеуметтік мәселелердің шешілуіне, жемқорлықты жоюға қатысты міндеттерді атап өтті. Мәдениет саласы да назардан тыс қалып жатқан жоқ. «Рухани жаңғыру», «Ұлы даланың жеті қыры» мақалаларының аясында мемлекет тарапынан қолдау жыл сайын артып келеді. Димаш Құдайберген, Ержан Максим сынды жас таланттар шығып жатыр. «Вашингтон Холл», «Кеннеди орталығы» сынды әлемнің үлкен сахналарында қазақтың әні шырқалып, күйі күмбірлеуде. Бұрын ол мүмкін еместей көрінетін. Қазір әлем қазақтың ұлттық өнерімен сусындап отыр. Біз соған қуанамыз.