- Руханият
- 29 Шілде, 2020
Қазақ ғылымының бәйтерегі еді
Мемлекет және қоғам қайраткері, ғалым, экономист, Қазақстан ғылымы мен техника саласының құрметті қызметкері Кенжеғали Сағадиев өмірден озды. Кенжеғали Сағадиев 1938 жылы 18 ақпанда Қостанай облысы, Ақкөл ауылында дүниеге келген. 1960 жылы Қазақ мемлекеттік университетінің экономика факультетін бітірген. 1977 жылы экономика ғылымының докторы, 1978 жылы профессор, 1994 жылы Қазақстан Республикасы Ұлттық ғылым академиясының академигі атағын алған. Қазақстандағы 5 ірі жоғары оқу орнын басқарды. Целиноград ауылшаруашылық институты мен Т.Рысқұлов атындағы Қазақ экономикалық университетінің ректоры болып жұмыс істеді. Қазақ ұлттық аграрлық университеті мен Халықаралық бизнес университетінің және Халықаралық ақпараттық технологиялар университетінің президенті болды. Ұлттық ғылым академиясының бас ғалым-хатшысы және президенті болып сайланды. Технологиялық даму жөніндегі ұлттық агенттіктің директорлар кеңесінің төрағасы атанды. Парламент мәжілісінің үшінші (2004–2007 жылдар) және төртінші (2007–2011 жылдар) шақырылым депутаты болып сайланып, Мәжілістегі қаржы және бюджет комитетінің төрағасы болды (2004–2007 жылдар). Ол өзінің ғылыми мектебін құрған академик. 445-тен аса ғылыми жұмыстың, оның ішінде 20 монография мен оқулықтардың авторы. АҚШ-тың Нью-Йорк академиясы мен Америкалық экономикалық ғалымдар қауымдастығының мүшесі, Пәкістан ғылым академиясының академигі, Халықаралық жоғары білім академиясының академигі болып сайланған. Ардақты ғалымның отбасына, туған-туыстарына қайғырып көңіл айтамыз.
«Қазақ газеттері» ЖШС
903 рет
көрсетілді0
пікір