• Руханият
  • 02 Қыркүйек, 2020

Қазақ автономиясына 100 жыл

Алматыда Қазақ Республикасының 100 жылдығына орай «Кеңестік Қазақ автономиясының құрылуы – Ұлы даладағы мыңжылдық мемлекеттілік дәстүрдің жаңғыруы» атты халықаралық ғылыми-тәжірибелік онлайн-конференция өтті. Ш.Уәлиханов атындағы Тарих және этнология институты ұйымдастырған онлайн шараны институт директоры Зиябек Қабылдинов ашты.

Аталған онлайн конференцияға ҚР Білім және ғылым министрлігі Ғылым комитетінің төрайымы ­Жанна Құрманғалиева, ҚР Парла­менті Сенатының депутаты Мұрат ­Бақ­тиярұлы, ҚР Парламенті Мәжілісінің депутаты Азат Перуашев қатысты. Сонымен бірге әл-Фараби атындағы ҚазҰУ-дың «Орталық Азиядағы дәс­түрлі өркениеттерді зерттеу» орта­лығының директоры Талас Омарбеков «Қазақ автономиясының теориялық мәселелері» тақырыбында баяндама жасады. Ал Қырғыз Респуб­ликасы Сыртқы істер министрлігінің Дипломатиялық академияның проректоры Зайнидин Курманов «ХХ ғасырдың 20-30 жылдарындағы қырғыз және қазақ саяси элитасының ұлттық мемлекеттілікті жаңғырту жолындағы күресі» тақыбырында сөйледі. Мемлекет тарихы институтының директоры Еркін Әбіл «Қазақстан автономиясы үшін күрес: тарихы және оның қазіргі саясатта қолданылуы» деген тақырып бойынша баяндама жасаса, Өзбекстан Республикасы Ғылым академиясы ­Тарих институтының жетекші ғылыми қызметкері К.Раджабов «Түркістан АКСР-і мен Қырғыз (Қазақ) АКСР-і қатынасы (1920-1924)» атты тақырыпқа баяндама жасады.
Ал Л.Н.Гумилев атындағы Еуразия ұлттық университетінің проректоры, академик Диқан Қамзабекұлы «Смағұл Сәдуақасұлы – Қазақ автономиялық рес­публикасының көрнекті қайрат­кері» атты тақырыпта баяндама жасап, жалынды қайраткер С.Сәдуақасұлының тарихи рөліне, өмірі мен қызметіне қатысты фотоларды көрсетті. Ал Мемлекет тарихы инс­титутының бас ғылыми қызметкері, заң ғылымының кандидаты, профессор Е.Қалиұлы «Қазақстандағы «жоғарыдан төменге» принципі бойынша автономия­ландыру» атты тақырып бойынша баяндама жасап, ҚАКСР билік орындарының Орталықтың қаулы-қарарлары мен бұйрықтарын мүлтіксіз орындауға тиіс болғанын ашып берді.
Тарих ғылымының кандидаты Сәбит Шілдебай «ҚАКСР Кеңестерінің Құрылтай съезі: автономияны жариялау және оның бүгінгі таңдағы та­рих­намалық мәселелері» деген тақырып бойынша ­баяндама жасап: «Себебі, дәл осы күні ҚАКСР Кеңес­тері Құрылтай съезінің кешкі мәжілісінде 2 «қарсы» және 5 «қалыс» дауыспен «ҚАКСР еңбекшілері құқы­ғының декларациясы» атты бірінші Конституциялық құжат қабылданып, съезд ҚАКСР-ды жұмысшылардың, еңбекші қазақ халқының, шаруалар, казактар, қызыл әскерлер депутаттары Кеңестерінің республикасы деп жариялады. Кеңестік Қазақ автономиясы – байырғы қазақ жерлерін бір республика құрамына біріктіруге тарихи негіз болды. Сондықтан жыл сайын 6 қазанда ҚАКСР-ның құрылған күнін атап өтсек дұрыс болар еді» деді.

Индира СӘТІМ

158 рет

көрсетілді

0

пікір
Алдыңғы мақала Адалдықтың үлгісі еді...
Келесі мақала Жақсылықта жәрдемші болсақ

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

ANA TILI №39

24 Қыркүйек, 2020

Жүктеу (PDF)

Редактор блогы

Жанарбек Әшімжан

Бас редактор