- Білім және ғылым
- 20 Мамыр, 2021
Бастамалардың бесігі болған...
Елбасының көрегенділігінің арқасында Елордамыздың төрінде жайғасқан Л.Н.Гумилев атындағы Еуразия ұлттық университетіне бүгінгі таңда 25 жыл. Өткен ширек ғасырда университет отандық жоғары оқу орындарының алдыңғы қатарына шығып, сонымен қатар әлемдік деңгейде белгілі, танымал білім және ғылым ордасына айналды.
ЕҰУ-да өзіндік дәстүр қалыптасып, оқу орны мақтаныш пен абырой иеленді, сондықтан да грантпен түскен студенттердің саны Республикамыздың көлемінде ең жоғары сатыға шықты. Университет білім мен ғылымның тізгінін бірдей ұстап интеграцияның іргесінде қарқынды жетістіктерге жетті. Заманның талабына сай жаңа методологиялық тәсілдер, заманауи ақпараттық мәліметтер, жаңашыл бағыттар, арнаулы дәрістердің өрістеуі барлық факультетте де орын тапты. Жылдан жылға дамудың динамикасы анық байқалады. Бұл Еуразия ұлттық университетінің шүбәсіз табыстарының көрсеткіші.
Бұл бағытта елеулі жетістіктер жеткілікті деуге әбден болады. ЕҰУ іргесі қаланған уақыттардан бері университеттің профессорлық оқытушылар құрамы мемлекеттік бағдарламалардың жүзеге асуына өзіндік үлестерін қосып келеді. Елдегі мемлекеттік «Мәдени мұра», «Рухани жаңғыру» бағдарламалары аясында атқарылған жұмыстар көлемі ауқымды. Әсіресе осы кезде университет басшылығының қамқорлығы арқасында шетелдік және ішкі мұрағаттардағы ел тарихы мен мәдениетіне қатысты қолжазба және архивтік материалдарды жинақтау, ғылыми талдау жұмыстары біршама жүйеге түсіп отыр.
Атап айтқанда, маңызды табыстардың қатарында ЕҰУ-дың іргесінде жаңашыл (инновациялық) ғылыми бағыттардың бірегейі Дала өркениетіне аса зор көңіл бөлуде. Дала өркениеті егіншілік қоғамдардың өркениетімен қатар, терезесі тең дербес құбылыс ретінде әлемдік тарихи үрдісінде айқын көрініс тапқан. Дала өркениеті пәнаралық зерттеулер іргесінде өтілуде.
ЕҰУ-дың оқу және тәрбие үдерістері де тұрақты түрде ғылыми негіздерде жүргізіледі. Бұл бағытта ғылымның жетістіктерін күнделікті тәжірибеде қолданудың мол мүмкіндіктері оқу үдерісіне жаңа пәндердің енуі арқылы анық көрінеді. Бұл ретте, қазақтың ойшыл ақыны Абай Құнанбаевтың мұраларын ғылыми зерделеу бағытындағы жұмыстар көлемі ауқымды. Бүгінгі күнде университетте жүргізіліп отырған абайтанулық зерттеулер мен сол бағытта арнайы кабинеттердің көршілес және алыс шет елдерінде ашылуы соның айқын бір дәлелі. Келесі, тілге тиек етер аса өзекті «Алаш» қозғалысына байланысты ұлттық бірлікті ңығайтуды меңзеген ұлы тұлғалардың мұраларын тиянақты жинақтап, баспадан шығару жұмыстары кеңінен атқарылған.
Университет өз тарихында білім беру, ғылыми ізденістер және тәрбиелік жұмыстар үшін маңызы ерекше мерейтойлық атаулы даталарды халықаралық және республикалық көлемде, жоғары деңгейде өткізіп келеді. Атап айтқанда, Қазақ хандығының 550 жылдығы, Алтын Орда мемлекетінің 750 жылдығы және үстіміздегі жылы Тәуелсіздігіміздің 30 жылдығы аясында көптеген ғылыми, тәрбиелік іс-шаралар жүзеге асырылды.
Университетте ғылымға үнемі ерекше көңіл бөлінеді. Оның айғағы, мыңнан аса ғалым университеттің жұмысына белсенді атсалысып келеді. Біраз ғалымдардың есімдері әлемдік деңгейде танымал. Біртіндеп математика мен биологияда, әдебиет пен тарих салаларында ғылыми мектептер қалыптасып жатыр.
Нәтижелі табыстардың арқасында университеттің өрісі айтарлықтай кеңейді, еуразиялық және әлемдік деңгейде белгі берді. Белсенді шетелдік университеттердің қатарына қосылды. ЕҰУ беделді Еуропалық университеттердің ассоциациясына тұрақты мүшелікке қабылданды. 200-дей университетпен халықаралық келісімге қол қойылды.
«Тарихты тобыр жасамайды, тарихты тұлға жасайды» дегендей, Еуразиялық ұлттық университеттің ректоры, ҰҒА академигі Е.Сыдықовтың ерен еңбек атқарып жатқанына барша куә. Тарихтың қоғам дамуына ықпалы аса зор екендігі сөзсіз. Берік халықтың тарихи сана-сезімі қашанда жоғары. Сондықтан да Е.Сыдықов Қазақстан тарихшылары Ұлттық Конгресінің төрағасы жұмысын атқарып, елдің бірлігі мен татулығын дәріптеп, халықтың санасын одан әрі қалыптастырып, қоғамдағы рухани және өнегелі құндылықтарды насихаттап, жастар өресінің кемелденуіне назар аударып, салиқалы еңбек атқаруда. ЕҰУ зерттеу орталығына айналуына дайын. Олай болса, ғылымның мәртебесі одан сайын биіктеп, ғылым, білім және өндіріс тығыз байланыста болмақ.
Болат КӨМЕКОВ,
ҰҒА академигі
2823 рет
көрсетілді0
пікір