- Әдебиет
- 22 Қаңтар, 2009
Ата-баба мұрасына адалдық
Халқын сүйген – салтын да сүйеді
Расул
Қазақстан Республикасы Ұлттық Қауіпсіздік Комитеті Әскери институтының мемлекеттік тіл басқармасында М.Мақатаев атындағы әдеби-өнертану бірлестігі жұмыс жасайды. Бірлестік институт бастығы генерал-майор Бауыржан Елубаевтың қолдауымен ашылған. Мұнда айтыс, шешендік өнер, жас ақындар, жас прозашылар, термешілер, әнші-күйшілер, актерлер, ұлттық қолөнер шеберлері және «Мемлекеттік тіл менің тілім» атты өзге ұлт өкілдерінің, барлығы 9 үйірме жұмыс істеп тұр. Мұның ішінде «Ұлттық қолөнер шеберханасының» қазақ құндылықтарын насихаттаудағы орны бөлек.
– Шеберхананың негізгі мақсаты болашақ шекара шебінде еліміздің
қауіпсіздігін сақтайтын сардарларға, яғни бүгінгі жас курсанттарға ұлттық қолөнерімізді насихаттау арқылы қазақи тәлім-тәрбие беру. Қазір қылқобыз, домбыра жасауды үйретіп жатырмыз. Алдағы уақытта адалбақан, кебеже, сандық сияқты үй бұйымдарын және батыр бабаларымыздың бес қаруын, сондай-ақ жетіген, адырна, асатаяқ, сылдырмақ, сазсырнай секілді саз аспаптарын жасауды үйретіп қана қоймай, олардың пайда болу тарихымен де таныстыру жоспарымызда, – дейді осы шеберхананың жетекшісі Расул Төлеуов.
Түркістанның 1500 жылдық мерейтойында белгілі сатирик Көпен Әмірбек:
Расул!
Ата-баба мұрасын,
Жалағастырып тұрасың,
Болсаң егер рас ұл, – деп қолтаңба берген Расул бірнеше қолөнер байқауларының жеңіпазы екен. Оның айтуынша Қылқобызды жасау тарихпен, философиямен, биологиямен, математикамен, физикамен, медицинамен тығыз байланысты болса керек.
– Қобыз аспабы әр үйдің, әр мектептің, әр мекеменің төрінде ілулі тұрса,
жас жеткіншектердің қазақ өнеріне, төл тарихына, мәдениетіне қызғушылығын арттырып, отансүйгіштекке тәрбиелейді. Ана тілінде білім алып, ұлттық салт-дәстүрін терең меңгерген азамат қана отанына шын беріліп қызмет етеді, – дейді ол.
«Ел үмітін ер ақтар, ер атағын ел сақтар» деген осы. Салтын ұмытпаған сарбаздардың ата-баба мұрасын ардақтап, ана тілін қасиет тұтқаны Қазақ елінің қай бағытқа қадам басатынының куәсі болса керек.
Біләл ҚУАНЫШ
3867 рет
көрсетілді31
пікір