- Тіл
- 17 Желтоқсан, 2009
Тіл саясатын байыптылықпен жүзеге асырайық
Жағымды жаңалық құлаққа жылы естілетіні бар ғой. Біздің жанымызға жаққаны Мемлекеттік тілді дамыту Президенттік қоры Қамқоршылық кеңесінің ІІ отырысында мәлім болған 24 сағат бойы мемлекеттік тілде хабар тарататын 3 телернаның дүниеге келетіні. Ол туралы Қамқоршылық кеңестің төрағасы, Мемлекеттік хатшы-Сыртқы істер министрі Қанат Саудабаев жария етті. Оның айтуынша, жақын уақытта қазақ тіліндегі ақпараттар мен түрлі бағыттағы бағдарламаларға шөлдеп тұрған еліміз үшін тәулік бойы туған тілімізде түрлі хабарлар тарататын үш телеарна сандық телевидениеге көшу аясында жүзеге асырылмақ. Олар ақпараттық-танымдық, әлеуметтік-мәдени, тарихи-патриоттық бағыттағы телеарналар болады деп болжанып отыр.
Мемлекеттік тілді дамыту Президенттік қорының есебі мен «Қазтест» қазақ тілін білу деңгейін бағалау жүйесінің мәселесі талқыға түскен алқалы жиынды ашып, сөз сөйлеген Қамқоршылық кеңестің төрағасы, дүйім жұртты еліміздің ең басты мерекесі – Тәуелсіздік күнімен құттықтай келіп, Қазақстанның жақында ғана халықаралық аса беделді ұйым – ЕҚЫҰ-ға төрағалық ету міндетін қабылдап алғанын айрықша атады. Қазақстанның бұл ұйымға ТМД елдері мен жалпы Азия бойынша тұңғыш төрағалық етуі ұлтымыз үшін зор мақтаныш болумен қатар әрі үлкен сын екенін ескертті.
Еліміздің бұл ұйымға төрағалық етуі халқымыздың басына ғасырда жалғыз-ақ рет қонатын бағы мен ырысы. Біз ең алдымен соны түсініп бағалай білуге тиіспіз. Осындай құрметке жеткізген Елбасымыздың өлшеусіз еңбегін ел мен жұртқа дұрыстап көрсетуіміз керек, – деп нақтылаған Қанат Саудабаев «Алтау ала болса ауыздағы кетеді, төртеу түгел болса төбедегі келеді» деген халқымыздың қанатты сөзіне сүйене отырып, әріптестерінен бірін-бірі сынап кемшілік іздегеннен гөрі, мынадай сирек тарихи сәтті ұтымды пайдаланып, Қазақстанды әлемге таныту ісіне күш жұмсауға шақырды.
Еліміз аумағында қазақ тілінде сабақ беретін мектептер мен балабақшалар саны да күн санап өсіп келеді. Ана тілімізде дәріс беретін мектептер саны қазргі таңда төрт мыңға жуықтайды. Бұның өзі үлкен көрсеткіш. Мемлекет тарапынан сондай-ақ өзге этнос өкілдерін мемлекеттік тілге оқыту мақсатында этно-мәдени бірлестіктерге былтырдың өзінде 5,1 миллиард теңге қаржы бөлініпті. Бүгінгі таңда елімізде 4 мыңға жуық мектепте сабақ мемлекеттік тілде жүргізілсе, осы тілде білім алатын оқушылар саны 61 пайызды құрайды. 25 мың өзге этнос өкілдерінің балалары қазақша білім алып, 20 мың бүлдіршін қазақ балабақшаларына барып жүр. Мұнымен қоса екі жүз жексенбілік мектепте жеті мыңнан астам түрлі ұлт балалары қазақ тілін үйренуде. Бұл көрсеткіштер мемлекеттік тілдің өркендеп келе жатқанының айқын көрінісі.
Мемлекеттік хатшы осыған орай мемлекеттік тілді дамытудағы жетістіктерімізге тоқмейілсіп қалмай, бұл бағыттағы нақты істерді ұдайы жалғастыра беруге тиіспіз деп тұжырымдады.
Қазақ тілін білу деңгейін бағалаудың “Қазтест” жүйесін енгізу бойынша нақты жұмыстар жалғасын тауып келеді. Соның ішінде “Азаматтардың қазақ тілін меңгеру деңгейін «Қазтест» жүйесі арқылы бағалау технологиясы” атты мемлекеттік стандарттар бекітілмек. Аталмыш стандарттарға сәйкес келешекте мемлекеттік қызметке келетін үміткерлерден мемлекеттік тілді білу қатаң талап етілетін болады. Бүгінгі таңда мемлекеттік тілдің қолданыс аясын кеңейту мақсатында бірқатар заңнамаларға өзгерістер мен толықтырулар енгізу жөнінде тиісті жұмыс жүргізіліп келеді.
Бұдан кейін Мемлекеттік тілді дамыту Президенттік қорының 2009 жылғы қызметі туралы, алдағы жылы атқарылатын жұмыстарға байланысты қордың директоры Берік Әбдіғалиев баяндама жасады. Оның айтуынша қордың мақсаты мемлекеттік тілді дамытуға бағытталған қоғамдық бастамаларды ынталандыру мен қолдау болып табылады. Бүгінгі күні қор негізгі қызметтерін үш бағытта жүзеге асырып отыр. Үстіміздегі жылдың қаңтар айында құрылған қор бірден бірнеше республикалық байқауларға гранттар жариялаған-ды. Қор гранттарына жарияланған байқау қоғамның ерекше қызығушылығын туғызып, аталған байқауға еліміздің түкпір-түкпірінен мемлекеттік тілді дамытуға бағытталған 100-ден астам түрлі жобалар келіп түскен.
Тіл саясаты басты бағыттарының бірі болып саналатын Мәдениет және ақпарат министрлігінің жауапты хатшысы Жанна Құрманғалиева жыл сайын мемлекеттік тілді дамытуға арналған іс-шаралардың саны артып бұл ретте министрлік өз жұмысын бірнеше бағытта жүргізіп отырғанын талдап көрсетті. Әсіресе, оқу-әдістемелік құралдарды шығару жыл сайын артып отырғанын, биылғы жылдың өзінде 60-тан астам сөздіктер мен әдістемелік оқулықтардың, бағдарламалар мен әдебиеттердің жарық көргенін, техникалық, медициналық, спорттық, құқықтық, экономикалық сөздіктер жаңадан шығарыла бастағанын атап өтті.
Білім және ғылым министрі Жансейіт Түймебеав болса елімізде мемлекеттік тілді дамытудың “Қазтест” жүйесін қалыптастыру үшін әлемдік халықаралық тәжірибелерге сүйену керектігіне тоқталды.
Тілдің жілігін шағып, майын ішкен ана тіліміздің жалауын желбіретіп жүрген тілжанашырларының алқалы басқосуында алғашқы болып пікір қосқан ҚР Парламенті Сенатының депутаты Қуаныш Сұлтанов Мемлекеттік тілді дамыту Президентттік қорының жұмысына оң баға берді. Қазақ гуманитарлық заң академиясының профессоры Амангелді Айталы мемлекеттік тілге деген көзқарастарды әлі түгел зерттеп біткен жоқпыз деген пікір білдірсе, жазушы, “Мемлекеттік тіл” қоғамдық қозғалысы төрағасының орынбасары Смағұл Елубай «телеарнаң қандай болса, ұлтың да сондай» деген қағиданы мысалға келтіре отырып, қазақ тіліндегі телехабарлардың көлемін көбейту, сапасын арттыру қажеттігін көлденең тартты. Мемлекеттік тілдің мәртебесін орыс тілінде насихаттау мәселесіне көңіл аударды. Қазақстан Жазушылар одағы басқармасының төрағасы Нұрлан Оразалин, Ғылым Академиясының президенті Мұрат Жұрынов, Президенттік мәдениет орталығының директоры Мырзатай Жолдасбеков және т.б. талқыланған мәселелерге орай өз ойларын ортаға салды.
Туған тіліміздің мәселесі жан-жақты талқыға түскен жиынды Мемлекеттік хатшы-Сыртқы істер министрі Қанат Бекмырзаұлы Саудабаев қорытындылады.
Бейбітгүл ӘБДІҒАППАРҚЫЗЫ
2714 рет
көрсетілді0
пікір