- Тарих
- 09 Желтоқсан, 2010
Болашаққа – кеңейтілген біліммен
Қазақстан Республикасының Президенті Нұрсұлтан Назарбаев Астанадағы «Назарбаев университеті» коммерциялық емес акционерлік қоғамының студенттері мен профессор-оқытушылары құрамы алдында дәріс оқыды.
Мемлекет басшысы дәріс кезінде «Назарбаев университетінің» болашағына да тоқталды. Елбасының атап өткеніндей, бұл жаңа университет АҚШ, Еуропа және Азиядағы әлемдік білім беру орталықтарымен интеграциялануға, ынтымақтастықты нығайтуға мүмкіндік береді. Осыдан жарты жыл бұрын ашылған бұл оқу орнында болашақта 4 мыңнан астам студент білім алатын болады. Ал бүгінде университеттің аудиторияларында 484 студент оқып жатыр. Студенттердің барлығы – оқуға емтихан тапсыру арқылы қабылданғандар. Студенттердің жартысы – «Алтын белгі» медалінің иегерлері, сондай-ақ республикалық және халықаралық олимпиадалардың жеңімпаздары. Бұдан кейін Нұрсұлтан Назарбаев жаңа университетті құру идеясы қалай туындағаны туралы айтты. Президенттің атап өткеніндей, осыдан 5 жыл бұрын Мемлекет басшысы Қазақстанды әлемдегі бәсекелестікке қабілетті 50 елдің қатарына қосу міндетін қойды. Сол міндеттердің бірі – елдегі білім және ғылым саласына терең өзгерістер енгізу болды. Қазақстан Президенті өз дәрісінде Астанадағы жаңа университетті Еуразиядағы ірі ғылыми білім беретін орталыққа айналдыру керектігін айтты. Маңызды ұлттық жоба ретінде танылатын бұл оқу орнын құруды Елбасының өзі жеке қадағаламақ. Ол Астананы дамытуға, сондай-ақ біздің еліміздің барлық салаларын дамытуға жүйелі түрде әсер етеді. Жаңа университет ерекше мәртебеге ие болады, ол арнайы заңнамалық актілерге негізделіп, іс-әрекет етпек.
Мемлекет басшысы бұдан соң елдегі индустриялық жобалардың жүзеге асырылу барысына, оларға мемлекет тарапынан қаншалықты қаржы қарастырылғанына көңіл бөліп, университетті бітіретін түлектерді жұмысқа орналастыру жайына тоқталды. Осыған байланысты Елбасы Үкіметке нақты тапсырмалар берді. Студенттердің ауқымды бөлігі 1 жыл базалық курста оқығаннан кейін оларды инженерлік мамандықтарға оқыту жоспарланып отыр. Үкімет қазірдің өзінде жаңа университеттің түлектерін жұмысқа орналастыру мәселелерін шешуі тиіс. Президент жаңа университеттің бірде-бір түлегі назардан тыс қалмайтындығын атап өтті. Бұл мәселелерді Президент Әкімшілігі бақылауда ұстайтын болады. Мемлекет басшысы сондай-ақ білім беруді дамытудың 2020 жылдарға дейінгі кезеңге арналған мемлекеттік бағдарламасымен де таныстырды. Жаңа бағдарламаның мақсаты – кез келген қазақстандықтың кеңейтілген жүйеде білім алуына және кәсіби біліктілігін арттыруға қолжетімділік тудыру. Бұлардан бөлек Қазақстан Президенті өз дәрісінде физика саласы бойынша жоғары энергиялық, энергия үнемдеуші технологиялық-энергетикалық зерттеу орталықтарын, жел және күн энергиясын көптеп пайдалану қажеттігіне тоқтала келіп, жаңа университетте өмір туралы ғылыми орталық құрылғандығын атады. Сонымен бірге елімізде медицина саласын дамытудың болашағына тоқталып өтті. Елбасы студенттер тарапынан қойылған сұрақтарға жауап қайтарды. Назарбаев университетінде Лондоннан келіп, студенттерге дәріс беріп жүрген Кристина Хоффман ханым осынау оқу орнының бүгінгі таңда атқарып отырған маңызы мен рөліне тоқталды. Назарбаев университетінде өткен лекцияның тағы бір ерекшелігі – оған Еуропа елдерінің бұрынғы басшылары қонақ ретінде қатысып, сөз сөйледі. Олар – Герхард Шредер, Романо Проди, Марселино Агирре Орейа, Альфред ГузенБауэр. Нұркен ЖАНДӘУЛЕТҰЛЫ
2780 рет
көрсетілді0
пікір