- Мәдениет
- 25 Ақпан, 2021
«Менің пірім – Сүйінбай»
Абай атындағы Қазақ ұлттық педагогикалық университетінің ұйымдастыруымен Жыр алыбы – Жамбыл Жабаевтың 175 жылдығына арналған «Менің пірім – Сүйінбай» халықаралық жас ақындар айтысы өтті. Дәстүрлі өтіп келе жатқан айтыс биыл халықаралық дәрежеге көтеріліп Қытайдан, Моңғолиядан, Қырғызстаннан ақындар қатысты.
Екі күнге созылған айтыстың соңы ҚазҰПУ-дың физмат корпусының концерт залында өтті. Айтыстың басында университет басшысы, айтыстың өтуіне басты себепкер Такир Балықбаев бастаған бір топ зиялы қауым лебіздерін білдірді.
Ақырғы кезеңге шыққан 12 жас жүйрік «ә» дегеннен-ақ айтыстың көркін қыздырды. Әдемі өрнектеген шумақтарымен жырға сусаған жұрттың айызын қандырды. Сонымен, айтыс қорытындысы бойынша «Nur Otan» партиясының арнайы жүлдесі Гүлжан Ықыласқа, «Сүйінбай Аронұлы» атындағы арнайы жүлде Жанарыс Тілеубекке, Халықаралық Жабыл қорының жүлдесі Қайырхан Жұбаниязовқа, Жүрсін Ерман атындағы арнайы жүлде Бекарыс Оспановқа, Оразалы Досбосынов атындағы арнайы жүлде Жамали Айбынға, Есенқұл Жақыпбек жүлдесі Расул Сауытбекке тапсырылды. Ал жүлделі орындарға келсек: III орын Шынарбек Тұрсынға (Қытай), Қабдолла Бейсханға (Моңғолия) және Абай атындағы ҚазҰПУ-дың студенті Алтынай Қанапияға, II орын Нұрбол Жауынбаевқа (Әл-Фараби атындағы ҚазҰУ) пен Данияр Нысанғалиевке (Абай атындағы ҚазҰПУ) бұйырды. I орынды қырғыздың жас айтыскер ақыны Нұрсұлтан Малдыбаев (Бішкек мемлекеттік университетінің студенті) жеңіп алса, бас жүлдені оңтүстіктің өрені Бекжан Базарбек (Әл-Фараби атындағы ҚазҰУ) иеленді. Ақшалай сыйлығы 350 000 теңге.
Нұрболат Жексенбай,
Абай атындағы Қазақ ұлттық университетінің студенті
1622 рет
көрсетілді104
пікір