• Ақпарат
  • 12 Қараша, 2021

Халық Қаһарманы мәңгі есте

Қарашаның 12-і күні Алматы қаласы бойынша Қылмыстық- атқару жүйесі департаменті және оған қарасты барлық мекеме қызметкерлері бүгінгі күннің батыры Ғазиз Байтасовты бір минут үнсіздікпен еске алды. Халық Қаһарманы Ғазиз Байтасов ішкі істер органына берген антына адалдық танытып, небәрі қырық жасында қауіпті террористі ұстау барысында ерлікпен қаза тапты. Биыл Ғазиз Байтасовтың ерлігіне 10 жыл толды. Бүгінде оның ерлігі Отан алдында қасиетті борышын атқарып жүрген және құқық қорғау саласында қызмет істеп жүрген әрбір азамат үшін ерліктің үлгісі.     Батыр әріптесіміз Ғазиз Байтасов  2011 жылы 12 қарашада Тараз қаласында қауіпті лаңкес ұстау барысында, қылмыскердің қолындағы гранатаны халыққа қарай лақтыруға жол бермей, өз денесімен жауып қалған болатын. Ол осы әрекетімен қаншама бейбіт тұрғынның өмірін құтқарып қалды. Сондай -ақ Алматы қаласы бойынша ҚАЖД жеке құрамы бүгін ЛА-155/6 мекемесінде қызмет атқарып жүріп, қылмыскерлердің қашуына жол бермеймін деп, өзі солардың қолынан қаза тапқан ішкі қызмет лейтенанты Айдарбек Сабырбековке қойылған ескерткішке гүл шоқтарын қойып, антына адал әріптестерін де еске алды. 

Айдарбек Сабырбеков ЛА-155/6 жасөспірімдер жазасын өтейтін мекемесінің фельдшері лауазымында қызмет істейтін, жасы небәрі 26 болған. 2000 жылдың 30 қарашасында ол қызметтік міндетін атқару кезінде сағат 22.30 шамасында сотталғандардың қашуын тоқтату барысында сотталған жасөспірімдердің қолынан қаза тапты. Артында небәрі үш жастағы қызы Аяулы мен үш айлық ұлы Ұлан қалды. Әрине, Айдарбекті өлтіргендердің барлығы бұрынғы жазаларына тағы да 10 жыл қосылып сотталғанмен жазықсыз төгілген қан, мезгілсіз үзілген өмір, естерін білмей жатып жетім қалған сәбилердің тағдыры, бесік таянып егілген жарының қасіреті мұнымен жеңілдеген жоқ.

А. Сабырбековке қаза тапқаннан кейін «ішкі қызмет лейтенанты» арнайы атағы берілді және Қазақстан Республикасы Президентінің Жарлығымен «Ерлігі үшін» медалімен марапатталды.

Алматы қаласы бойынша Қылмыстық- атқару жүйесі

департаментінің орынбасары

әділет полковнигі Ерлан Ұзақов

14794 рет

көрсетілді

248

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ANA TILI №12

28 Наурыз, 2024

Жүктеу (PDF)

Редактор блогы

Ерлан Жүніс

«Ана тілі» газетінің Бас редакторы