- Қоғам
- 02 Желтоқсан, 2021
АЛМАТЫДА АЗАМАТТЫҚ ФОРУМ ӨТТІ
Алматы қаласында X Азаматтық форум өз жұмысын қорытындылады. Форум қатысушыларына Мемлекет басшысы ел Тәуелсіздігінің 30 жылдығына және форумның 10 жылдық мерейтойына орай құттықтау хат жолдады. Аталған форумда Мемлекет үкіметтік емес ұйымдарды қаржыландыру тетіктерін қайта қарап, оның тиімді жолдарын ұсынды.
Сонымен қатар осы салада кадр дайындау мәселесіне де назар аударылды. Яғни жергілікті қоғамдастық менеджерлерін, қалалық модерация әдістерін оқытуды күшейту қажет. Бұл туралы ҚР Президенті Әкімшілігі басшысының бірінші орынбасары Дәурен Абаев тілге тиек етті.
«Еліміз бастан кешірген қиын кезде үкіметтік емес ұйымдар белсенділік көрсете білді. Қаншама қайырымдылық шаралары жасалды. Халқымыз өзгенің басына түскен қиындыққа бейжай қарай алмайтынын байқатты. Волонтерлар саны еселеп өсті. Қазір волонтерлік қызмет пен қайырымдылық туралы заң жобасы Парламент қарауында жатыр», – деді ол.
Сонымен қатар форумда ауылдағы азаматтық бастамаларды дамыту, адам құқықтары мен бостандықтарын қорғау, халықаралық ынтымақтастық, экология мен инклюзия мәселелері де қаралды. ҚР Ақпарат және қоғамдық даму министрінің айтуынша, мұндай маңызды форумдар жалғаса бермек.
«Форум өңірлік емес ұйымдардың маңызын аша білді. Кәсіби үкіметтік емес ұйымдар тек ірі қалаларда ғана емес барлық өңірде, соның ішінде шалғай аудандарда белсенді екенін көрсетті. Ең бастысы, Елбасы барынша қолдап келе жатқан бұл игілікnі үрдіс келешекте де өз жалғасын табады», – деді Аида Балаева.
Форум аясында үкіметтік емес ұйымдар арасында жарияланған «Таңдау» сыйлығының жеңімпаздары марапатталды. Бұл марапат форум тарихында алғаш рет табысталды. Оған 10 жылдан бері үкіметтік емес ұйымның жұмысын жүргізіп келе жатқандар қатысты. Ең үздіктері жеңімпаз атанды.
Айта кетейік, қазір мемлекет тарапынан 2500 үкіметтік емес ұйым әлеуметтік тапсырыс пен қолдауға ие болып отыр. Жалпы елімізде 23 мыңға жуық ұйым бар. Олар шама-шарқыларына қарай билік пен қоғам арасында диалог құрып, көптеген түйіткілді мәселені шешуге атсалысып жүр.
Ақбота ҚУАТОВА
1259 рет
көрсетілді9
пікір