• Әдебиет
  • 16 Желтоқсан, 2021

Қазақстан – түркі дүние Отаны!

«Қазақстан – жалғыз ұлы қазақтың!»-
дейді Сабыр, саралы ой ғажап тым.
Үні шықпас дейді-ау бірақ Жалғыздың,
Уысыңда тұрғанымен азат күн!.

...Ойлар, ойлар,
Ой шіркінің көп менде,
Орамды оймен оралайық өткенге.
Қазақстан жалғызы ма қазақтың,
Жалғыз деуге кесімді уәж жоқ менде.

Қазақ деген менше қас сақ – тек-тұқым,
Қас сақ деген арғы қазақ, текті ұғым.
Қыпшақ – көп сақ, арғын деген –арғы ғұн,
Бәрі түркі, ақиқат ой бек мұным.

Өзің ойла, бәрі сақтың баласы,
Түркі біткен бөрі сақтың баласы.
Бәрінің де қас сақ болар бабасы,
Бәрінің де Ұлы Дала – анасы.
 
Ұлы Дала күндер кешіп арпалыс,
Ұлы Баба тындырды сан тарпаң іс!
Қазақ деген – бас имейтін бөрілер,
Қазақ деген – жалғыз жортқан жолбарыс!

Тереңіне бойлай білсек қас сақтың,
Мен де өзімше саф алтындай сөз таптым:
Қазақ-Баба – түркі әлемнің атасы,
Қазақстан – жалғызы емес қазақтың!
Бар әлемге жайылғаны соншалық,
Түлеп ұшқан түркілерім енші алып.
Беу, түркілер, Түркістанда басың қос,
Ата-бабаң құшақ жайып қарсы алып!

Замананың сабақ алып зәрінен,
Өткен жайлы сан ойланам әлі мен.
Бір ауызды болса Қас Сақ баласы,
Бүкіл әлем айыл жияр кәрінен!

Бұзылмаса бірлігінің жүйесі,
Қорғап жүрер әулиелер киесі.
Қазақстан – кенже ұлы қас сақтың,
Қазақстан –шаңырақтың Иесі!

Тәуелсіздік!
Тәубе, тәубе!
Күткенім,
Бірте-бірте еңсемді әбден тіктедім.
Қазақстан –ТҰҒЫРЫ бол түркінің,
Отаны бол түркі әлемнің құтты елім!

Түркі деген
Тұлпар мінген
Ержүрек,
Туысқан жұрт
Төс қағысқан елжіреп.
Түркі дүние, тынысыңды жаза бер,
Тоғыз тулы-
Көкбайрағың желбіреп!

 

Түркі дүниесіне тіл қату

Мағжан рухына

Тұранның түлесе дер кең даласы,
Түркінің тікте бойды бел баласы.
Түріміз, діліміз бір, түбіміз бір,
Туың тік, түркі дүние – Алты Алашы!

Тірлікте біз кешпелік арзан-ғұмыр,
Тін тартып тереңдерден арман-тұғыр.
Түркістан ұлағатын ұран еткен,
Текті ұлан - тұталық та Мағжанды пір!

Тынысты келді, туыс, жазар шағың,
Толағай жүзеге аспақ әз-арманың.
Тарихын тани білсе түркі жұрты,
Тегінде сейілер-ді жанарда мұң.

Тағдырдан ескен кезде жылымшы леп,
Түркіге толғаналық ғұмыр тілеп.
Тәуелсіздік Қазаққа бұйырғанда
Түркия таныған-ды бірінші боп!

Тәңір-ай, толғайыншы, толғайыншы,
Түркінің намысын бір қорғайыншы.
Теңіздей тебіреніп, еміреніп,
Тылсымнан қобыз-үнмен сарнайыншы.

Тынымсыз домбырам да бебеулесін,
Тоныкөк, Күлтегіндер жебей берсін!
Түркіге түңілместей РУХ берген –
Тарланым – Мағжан сынды елеулі есім!

Түріктер тастан сомдап нар тұлғасын,
Төрінде асқақтаған алтын басын.
Түркістан
тәлім алып
Анкарадан,
Төрінде ер мүсіні жарқылдасын.

Түркістан – мұқым түрік қағанаты,
Түркінің осында ұран – жағар оты.
Мағжанды ұлықтасақ, ұлықтайық,
Түркіге шексіз болған махаббаты!

Ғалым ӘРІП

АҚТАУ

2161 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ANA TILI №12

28 Наурыз, 2024

Жүктеу (PDF)

Редактор блогы

Ерлан Жүніс

«Ана тілі» газетінің Бас редакторы