- Қоғам
- 19 Мамыр, 2022
Халықтың 66,4 пайызы референдумға қатысуы мүмкін
Қазақстанда 5 маусым күні Ата Заңды өзгертуге қатысты бүкілхалықтық референдум өтетіні белгілі. Ал аталған маңызды мәселеге халықтың қатысуы қандай болмақ?
Халық арасында жүргізілген әлеуметтік сауалнамаға сенсек, отандастарымыздың 76,4 пайызы Мемлекет басшысы Қасым-Жомарт Тоқаевтың референдум өткізу туралы идеясын қолдайды. Бұл туралы Президент жанындағы Қазақстан стратегиялық зерттеулер институтының директоры Еркін Тұқымов мәлім етті.
Институт басшысының айтуынша, 9-12 мамыр аралығында халық арасында телефон арқылы сауалнама жүргізілген.
– Әлеуметтік сауалнамаға барлық өңірден 1200 респондент қатысты. Оның нәтижесінде қазақстандықтардың 66,4 пайызы референдумға қатысады. Осы тұста айта кетсек, заңға сәйкес халықтың 50 пайыздан астамы қатысқан жағдайда референдум өткен болып есептеледі. Жалпы аталған сауалнаманың нәтижесіне сәйкес, қазақстандықтардың 70 пайызы референдум өтетінінен хабардар. Сондай-ақ институт жүргізген зерттеудің нәтижесі бойынша, Президенттің референдум өткізу туралы бастамасын отандастарымыздың 76,4 пайызы қолдайды. Яғни қазақстандықтардың дені референдум өткізіп, Конституцияға тиісті өзгерістерді енгізудің маңызды екенін түсінеді, – дейді Еркін Тұқымов. Орталық сайлау комиссиясының төрағасы Нұрлан Әбдіровтың мәліметінше, «қазірдің өзінде учаскелік референдум комиссиялары жұмысқа толығымен кіріскен. Жалпы айтқанда, 10013 референдум учаскесі іске қосылады. Референдумға қатысатын адамдардың тізімінде шамамен 11 млн 722 мың 536 адам бар». Тиісті заңнамаға сәйкес, референдумда 11 өңірдің халқы жақтап дауыс берсе, Конституцияға өзгеріс енгізіледі.
Ал референдум өткізуге арналған 16,4 млрд теңгенің 79 пайызы осы ауқымды іс-шараға жұмылдыратын адамдардың жалақысын төлеуге жұмсалады. Бұл туралы Орталық сайлау комиссиясының мүшесі Сәбила Мұстафина мәлім етті.
– Референдум қаржысының 79 пайызы комиссия мүшелерінің жалақысын төлеуге бағытталады. Не себепті бұл бағытқа қомақты қаражат қарастырылған? Бұл Президент, Мәжіліс сайлауы сияқты ауқымды науқанды өткізу кезінде жұмсалған қаражат сомасының деңгейінде. Аталған 79 пайыз учаскелік және аумақтық комиссиялардың 71 мыңға жуық мүшесінің жалақысын қамтамасыз етуге бөлінеді, – деді ол.
527 рет
көрсетілді0
пікір