• Ақпарат
• 08 Тамыз, 2024

Сенатор журналистермен кездесті

ҚР Парламенті Сенатының депутаты Нұртөре Жүсіп «Егемен Қазақстан», «Казахстанская правда», «Ана тілі», «Ақиқат», «Мысль», «Үркер», «Ұлан», «Балдырған», «Ұйғыр авази» басылымдарын біріктіретін «Қазақ газеттері» ЖШС-нің Алматыдағы филиалы қызметкерлерімен кездесті.

Сенатор дәстүрлі бұқаралық ақпарат құралдарын трансформациялау, сөз бостандығын қорғау, журналист мәртебесін бекіту жөніндегі мемлекеттік реформалар және Парламент қабылдаған «Масс-медиа туралы» заңдағы жаңалықтар жөнінде айтып берді.

Кездесуге қатысушылар баспасөзді дамыту, бұқаралық ақпарат құралдарының жас қызметкерлері мен блогерлерді және ықпалды тұлғалар сияқты жаңа кезең журналистерін қолдау мәселелерін талқылады.

Нұртөре Жүсіп қоғамның іргетасы сапалы ақпарат екенін атап өтті. Ақпарат таратудың негізгі құралының бірі ретінде мерзімді баспасөз қоғамдық пікір қалыптастыруда және өзекті оқиғаларды жариялауда маңызды рөл атқарып келеді.

«Газеттер мен журналдардың адам құндылықтарын қалыптастыруда маңызы зор. Мемлекет тиісті заңдарды қабылдау арқылы отандық бұқаралық ақпарат құралдарының дамуын белсенді түрде қолдап келеді. Парламент қабылдаған «Масс-медиа туралы» заң осы жолдағы маңызды қадамның бірі, ол бұқаралық ақпарат құралдары саласындағы қолданыстағы бірнеше заңның ережелерін біріктіріп отыр. Онда мемлекеттік емес бұқаралық ақпарат құралдарына арналған грант арқылы мемлекеттік ақпарат саясатын қаржыландыруды жетілдіру, сауалдарды қарау мерзімін қысқарту, журналистің кәсіби қызметіне құқықтық кепілдік беру, сондай-ақ бұқаралық ақпарат құралдарының өзін-өзі реттеуі және журналистің әдеп кодексін әзірлеу жөніндегі қоғамдық-кәсіби кеңес құру сияқты негізгі жаңалықтар бар. Бұл заң еліміздің медиа кеңістігін дамытудағы маңызды қадам болып отыр», – деді Нұртөре Жүсіп.

Кездесуге қатысқандар журналистерді даярлау, мамандық этикасы және журналистикада жасанды интеллекті пайдалану келешегі мәселелерін де талқылады.