- Ақпарат
- 24 Қазан, 2024
БАСПАСӨЗ ТАРИХЫНЫҢ ЭЛЕКТРОНДЫ ҚОРЫ САҚТАЛАДЫ

«Қазақ газеттері» ЖШС Алматы филиалында Қазақстандық Ұлттық электронды кітапхананы (ҚазҰЭК) толықтыру бойынша ынтымақтастық туралы келісімге қол қойылды.
Меморандумға Ұлттық академиялық кітапханасының директоры Ғазиза Құдайбергенқызы мен «Қазақ газеттері» ЖШС бас директорының орынбасары – Алматы басылымдарының жетекшісі Серік Әбікенұлы қол қойды. Ынтымақтастықтың негізгі мақсаты – құжаттарды электронды форматқа аудару арқылы Қазақстан халқының тарихи-мәдени мұраларын сақтау; кітапхана құжаттарын интернет желісіне орналастыру. Келісім «Қазақ газеттері» ЖШС-іне қарасты газет-журналдардың PDF нұсқасын қазақстандық Ұлттық электронды кітапханасының архивінде сақтауға мүмкіндік береді.
Ғазиза Құдайбергенқызы Ұлттық академиялық кітапханаcы ұйымдастырып жатқан электронды қорды жинау, сақтау, оқырманға тарату мәселесін қысқаша таныстырды. Оған қоса кітапхана ұжымы атқарып жатқан бастамаларға да тоқталды. «Қазір барлық технологияны пайдалана отырып, оқырманды кітап оқуға ынталандыруға болады. Air Astana-мен бірлесіп жасап жатқан жобамыздың аяқталуына аз қалды. Медиақұрылғыға аудиокітап, қазақтың жырын, ауыз әдебиетін жүктедік. Бұған дейін сол медиақұрылғыда ересектерге, балаларға арналған фильмдер болатын. Әуе компаниясына хат жазып, 50 контент ұсындық. Компания оның 25-ін таңдап алды. Олар кезінде «Мәдени мұра» бағдарламасымен жарыққа шыққан рухани қазынамыз. Батырлар жырын тыңдап өскен бала жыр атын ұмытып қалуы мүмкін, көкірекке жиылған рух уақыты келгенде көктейді. Сондықтан осы жобаны ерекше таныстырғымыз келеді. Одан бөлек, штрих-код арқылы кітап оқу жобасы дайындалып жатыр. Саябақтардағы орындықтарда түрлі жанрда жазылған кітаптардың штрих-коды орнатылып, оқырман кез келген жерде кітап оқи алады. Жастар аудиокітап тыңдағысы келсе, аудиокітап әзірлеп, видеосын дайындап, қалауын толық орындауымыз керек», – деген Ғ.Құдайбергенқызы 24 қазан – Кітапханашылар күнінің мән-маңызына да тоқталды.
«Қазақ газеттері» ЖШС Бас директорының орынбасары – Алматы басылымдарының жетекшісі Серік Әбікенұлы мұндай келісім қазақ баспасөзін сақтаудағы маңызды қадам екенін атап өтті. «Бұл істің ұтымды тұсы көп, ең бастысы, интернет жоқ заманда шығып, цифрланбаған газет сандарының болашақта көшірмесі жасалып, халық ашық дереккөзден оқи алатын болады, үйде отырып-ақ, әр жылды жеке парақтап шығуға мүмкіндік туады. Берідегі PDF нұсқалары да жүктеледі. Газеттің бір саны жоғалса, бір күннің, бәлкім, бір жылдың тарихы жоғалады. Сайт, порталдар жиі жойылып кетіп, ертеңге алаң көп тұста мемлекет тарапынан сирек құжаттарды сақтау үшін арнайы ашылған Kaznebке көшірмелер өткізу баспасөз тарихын сақтайды», – дейді ол.
Басқосуда «Ана тілі», «Ақиқат», «Мысль», «Үркер», «Ұйғыр авази», «Ұлан», «Ақ желкен», «Дружные ребята» басылымдарының бас редакторлары газет-журналдардың алдағы мерейтойлары туралы айтып, басылымның тарихи шежіресі электронды кітапханаларда да оқырманын көбейтеріне сенім білдірді.
Қарагөз СЕРІКҚЫЗЫ

1547 рет
көрсетілді0
пікір