• Ақпарат
• 31 Қазан, 2024

Ядролық сынақты тоқтату күні деп белгіленсе...

Семей ядролық сынақ полигонындағы соңғы ядролық жарылыстың 35 жылдығына арналған халықаралық конференциясына қатысушылар және «Невада-Семей» халықаралық антиядролық қозғалысының белсенділері мен ардагерлері Қазақстан Президенті Қасым-Жомарт Кемелұлына үндеу жариялады. 

«1989 жылдың 19 қазанында Кеңес Одағында планетадағы ең ірі Семей сынақ полигонында соңғы ядролық жарылыс болды, оған биыл 35 жыл толды. 40 жылдық сынақта бас-аяғы 468 ядро бомбасы жарылыпты. 
Полигон 1989 жылдың 28 ақпанында құрылған «Невада-Семей» халықаралық антиядролық қозғалысының қуатты іс-қимылының арқасында Қазақстаннан, Ресейден және басқа рес­публикалардан алғашқы апталарда-ақ өз қатарына екі миллионнан астам белсенді қатысушыны қабылдаған. Қозғалыс жаңа модельді – халықтық және парламенттік дипломатияның өзара іс-қимылын қолдана отырып, жалпыға бірдей ядролық қарусыздануға алғашқы қадам жасап, жетістікке жетті. Біз сол кезде жұмыс істеп тұрған барлық бес сынақ полигонына мораторий қойдыруға қол жеткіздік. 
Сол тарихи күндерде халық бірігіп, бүкіл әлемді іс-әрекетіміз бен сөзімізді естуге, жауап беруге мәжбүр етті. Бүгінгі тарихи тәжірибені түсіну бізге болашаққа – саналы өзара тәуелділік дәуіріне жол ашуға мүмкіндік береді. Тарих халықты жолдың осындай формуласына алып келеді.
Бүгінде «Невада-Семей» халықаралық антиядролық қозғалысы жұрт санасында бейбітшілік мұратын бекітуді жалғастырып отыр. Қозғалыстың халықаралық қауымдастық мойындаған еңбегін ескере отырып, оның архиві ЮНЕСКО-ның шешімімен 
ЮНЕСКО-ның «Бейбітшілік жады» деректі мұрасының Дүниежүзілік тізіміне енгізілді. 
Біз 19 қазанды атаулы күн деп санауды және бұл күнді Семей полигонындағы ядролық сынақты тоқтату күні ретінде Қазақстанның атаулы күндерінің күнтізбесіне енгізуді ұсынамыз» делінген үндеуде.

Мөлдір ҒАБИТҚЫЗЫ