• Ақпарат
• 28 Қараша, 2024

Ақын қыздар Атырауда

Көрнекті ақын, Қазақстанның Халық жазушысы, Мемлекет және қоғам қайраткері, Мемлекеттік сыйлықтың лауреаты Фариза Оңғарсынованың туғанына 85 жыл толуына орай, ақынның туған жерінде «Фариза және ақын сіңлілері» атты республикалық жыр кеші өтті. Поэтикалық кешті Атырау облыстық Мәдениет және тілдерді дамыту басқармасының тапсырысымен, Азаматтық бастамаларды қорғау орталығының қолдауымен Қазақстан Жазушылар одағы ұйымдас­тырды.

Поэзия падишасының мәңгі өлмес даңқын ұлықтауға арналған бұл жобаның авторы Фариза ақынның өзі болатын. Ақынды білетіндер оның ақиқатшыл асқақ поэзиясымен ғана емес, жас дарындарды қамқорлап, қанат бітірген бірегей болмысымен де жақсы таныс. 2009 жылы Фариза Оңғарсынова елорда төрінде «Фаризаның ақын сіңлілері» деген үлкен кеш ұйымдастырып, оған еліміздің әр түкпірінен ақын қыздарды шақырған еді. Биыл Қазақстан Жазушылар одағы ақынның бастамасын жалғастырып, Атырау қаласында Алматы, Астана, Шымкент, Тараз қалаларынан ақын қыздарды Жайық бойындағы өлеңсү­йер жұртшылыққа таныстырды. Поэтикалық кеште белгілі ақындар Оңайгүл Тұржан, Жанат Әскербекқызы, Танагөз Ілиясова, Бақытгүл Бабаш, Гүлманат Әуелхан, Ғайни Әлімбекқызы, Жанайым Ауғанбай, Эльмира Есқожаевалар өлең оқыды. 
М.Асаубаева атындағы креативті орталыққа алты жүзден аса жырсү­йер оқырман жиналды. Жыр кешін Атырау облысы әкімінің орынбасары Дарын Шамұратов ашып, Фариза ақынды өмірге әкелген өлкенің атынан ұйымдастырушыларға алғыс білдірді. Қазақстан Жазушылар одағының басқарма төрағасы Мереке Құлкенов ақындарды құттықтап, алғыс хат табыс етті. Кеште ақынның сөзіне жазылған әндер орындалып, Махамбет атындағы академиялық қазақ драма театрының артистері өнер көрсетті.
 «Фариза және ақын сіңлілері» поэтикалық кешінің аясында 
Х.Досмұхамедов атындағы Атырау университетінде және С.Өтебаев атындағы мұнай-газ университетінде ақын қыздармен кездесу және шеберлік сыныптары өтті. Сондай-ақ өңірдің киелі орындары Алтын Орданың көне астанасы Сарайшыққа, қазақ рухының алдаспаны Махамбеттің сүйегі жерленген Қарой даласына экскурсия ұйымдас­тырылды.
Ақын қыздардың жыр кеші «Фариза – рух жанартауы» атты респуб­ликалық әдеби-танымдық конференция мен салтанатты жиынға ұласты.

Әлия ДӘУЛЕТБАЕВА