• Ақпарат
• 17 Шілде, 2025

Мәдениеттер байланысы берік

Түркі мәдениеті және мұрасы қорының кеңсесінде Мажарстан Үкіметінің түркі мәдени ынтымақтастығы және Мажарс­тан-Түркия ғылым мен инновация жылы мәселелері жөніндегі өкілі Петер Хоппал мырза мен Мажарстанның Әзербайжан республикасындағы төтенше және өкілетті елшісі Тамаш Торма мырза кездес­ті.

Қор президентімен өткен кездесуде ұйым мен Мажарстан арасындағы ынтымақтас­тықтың қазіргі жағдайы, бірлесіп жүзеге асырылған бастамалар және болашақтағы даму перспективалары жөнінде пікір алмасты. Мажарстанның бақылаушы ел ретінде Қордың қызметіне қосқан үлесі ерекше атап өтілді.
Кездесу барысында түрік және мажар халықтарының тарихи байланыстары мен мәдени дипломатияны нығайтудың маңызы айрықша атап өтілді. Сарапшылар алмасу, академиялық ынтымақтастық және бірлескен баспа жобаларын дамыту жолдары талқыланды.
Түркі мәдениеті және мұрасы қорының президенті Ақтоты Райымқұлова Мажарстанның ұйым жұмысына тұрақты қызығуы мен мәдени жобаларға белсенді қатысуын жоғары бағалады. Ол Мажарстанмен ынтымақтас­тықтың мәдени көпір ретіндегі маңызын және түрік пен еуропалық халықтар арасындағы өзара түсіністік пен мәдени жақындасу тұрғысынан ерекше мәнге ие екенін атап өтті.
Петер Хоппал мырза Мажарстанның Түркі әлемімен ынтымақтастыққа дайын және Қордың ауқымды қызметіне қатысуға ниетті екенін білдірді. Ол алдағы ынтымақтастық перспективаларына қатысты ұсыныстарын бөлісті.
Екі тараптың жүзеге асырып жатқан табысты жобаларының ішінде түркі халықтарының фольклорына арналған көптомдық басылымның дайындығы ерекше атап өтілді. Жобаның басты мақсаты – түрік халықтарының мол рухани мұрасын – ертегілерді, аңыздарды, мақал-мәтелдерді, баянаттарды, эпостар мен басқа да фольклор жанрын жүйелеу және оны болашақ ұрпаққа жеткізу. Мажарстанның бұл іске қатысуы мен көрсеткен қолдауы жоғары бағаланды.

Мөлдір Ғабитқызы