- Тіл
- 15 Қараша, 2012
Жұмыла әрекет ететін шақ
Тәуелсіздіктің 21 жылын тойлағалы отырған Қазақстан атты мемлекетіміздің жерінің де, елінің де атам заманнан бергі түпкілікті егесі – қазақ халқы екеніне ешкімнің таласы болмас. Сондықтан да еліміздің атадан қалған асыл мұрасына, бабадан қалған барша мирасына егелік етіп, «өз үйім – өлең төсегім» деп жантаятын да, керек десе шалқаятын да біздер – қазақтар емес пе? Бірақ осы жиырма бір жыл бойы жантаюын жантайып жатқан шығармыз, ал шалқая алмай жүргеніміз анық қой. Әртүрлі себептермен келіп, елімізде ондаған жылдар бойы тұрып жатқан немесе соңғы жылдары келген басқа ұлт өкілдерінің бәрінің дерлік өз атажұрты, отаны бар. Баяғыда Жиренше шешен өзінің тар лашығына келіп көсілгенде, аяғы сыртқа шығып жатқандағы жан рақатына, ханның бас уәзірі болып хан сарайында көрген сый-сияпатын да, қошеметін де теңгермей: «Ой-қой, менің өз үйім – кең сарайдай боз үйім!» деген екен. Міне, әрбір қазақтың тәуелсіздіктің алғашқы күнінен бастап, осы Жиренше сияқты: «Ой-қой, менің атадан қалған қайран кең-байтақ жерім-ай, ешкімге есесін жібермеген қайран тілім-ай!» деп жеріне де, тіліне де қауышудың рақатын сезініп, барынша көсілуіне болатын еді ғой. Соңғы санақтан бергі өскенін қоса есептегенде еліміздегі халықтың 70 пайыздайы қазақтар екен, ал солар өз ана тіліне, ата-бабамыздан мирас болып қалған жеріне, оның асты-үсті байлықтарына толық демей-ақ қояйық, сол сандық үлесіне (70%) сай қожалық етіп отыр ма? Біз ана тілімізді әңгіме еткенде, бабалардан бізге мирас болып қалған ұлтық құндылықтарымыз бен жеріміздің байлығын бірімен-бірі тығыз байланыстағы құндылықтар болғасын әдейі айтып отырмыз. Бірінен айырылсақ, екіншісінен де айырылатынымыз анық. Бұл, әрине, өзінше арнайы талқылайтын тақырып. Әзірше тіл мәселесін қаузай түсейік. Биыл қазақ тілінің мемлекеттік мәртебеге ие болғанына, дардай жігіт жасы – 23 жылды толтырғанын тойлап жатырмыз. 23-ке келген адамның өсу жолына ой жүгіртсек: 3-ке дейін тілі шығып, 6-7 жасында оқу-білімге ден қойып, 17-18-де жоғары оқу орнына түсіп, немесе әйтеуір бір мамандық алып, 22-23-те елге қызмет етуге дап-дайын азамат болып шығады екен. Ал біздің ана тіліміз елге еркін қызмет ететін осы 23-ке толған азаматтық жасында мемлекеттік мәртебесіне көтеріле алмағаны сол, оның көп салаларда екінші кезекте қалып отырғанына, сөйлеген сөздеріміздің шұбарланған күйінде қалып, елді мекендердің аттары мен ғимараттарымыздың маңдайша жазуларының басым бөлігінің басқа тілдерде жазулы екендігіне және Астанамызда орналасқан Үкімет пен министрліктердегілердің тілді меңгеру деңгейі әлі де бастауыш сынып оқушысының дәрежесінде қалып отырғанына куә болып отырмыз. Сөйтіп отырып, кейбір жоғарғы биліктегі басшылардың осы мәселелерге бейжай қарай алмай, әрекет етуге шақырған қоғам белсенділерін қолдаудың орнына, жұртты жайбарақаттыққа шақыратынына қайран қаласың. Біз ұзақ жылдар бойы ана тіліміз бен ұлттық құндылықтарымыздың есесін жіберіп алған халықпыз. Сондықтан да ендігі жайбарақаттығымыздың ині келмейді. Ел Президенті Н.Ә.Назарбаев 2011 жылғы Қазақстан халқына Жолдауында мемлекеттік тілдің мәртебесін көтеруге байланысты: «Біздің міндетіміз – 2017 жылға қарай мемлекеттік тілді білетін қазақстандықтардың санын 80 пайызға дейін жеткізу. Ал 2020 жылға қарай олар кемінде 95 пайызды құрауы тиіс. Енді он жылдан кейін мектеп бітірушілердің 100 пайызы мемлекеттік тілді біліп шығатын болады» деген тапсырмасы бекерден-бекер берілмеген шығар. Қазіргі кезде ана тілімізге байланысты ел арасында мынандай екі түрлі көзқарас бар: Жоғарыдағылар: Заң бар, бағдарлама жасалды, қаржы бөлініп жатыр. Енді сендерге не керек? Неге тіл, тіл деп зарлай бересіңдер? – дейді. Төмендегілер: Заң осал, декларативті. Бағдарлама нақты емес жалпылама. Жоғарыдағылардың ана тіліне ықыласы шынайы емес, егер олар қазақша сөйлеуді өздерінен бастаса, баяғыда тіліміз төрге шығар еді дейді. Осы екі көзқараста да шындық бар деп ойлаймын. Осындай әрі-сәрі жағдайдың бұрынғы Мәскеуге бағынған кеңес кезеңінде емес, тәуелсіз елде өмір сүріп жатқанымыздың 21 жылын тойлағалы отырған кезеңде болып отырғаны «Жиырма бір жыл» деп айта салу оңай. Бірақ 21 жыл – бұл 21 күн емес, 21 жыл – бұл 20 апта емес, 21 жыл – бұл 21 ай емес қой! Бұл – 7665 күн, 1022 – апта, 255,5 ай емес пе?! Осы мезгілде өз ана тілі түгілі, жер бетіндегі барлық халықтың тілдерін үйреніп алуға болатын еді ғой. Кеңес кезінде толық емес 4 жылда немесе 1447 күнде, яғни 46,5 айда барлық бес қаруын асынған, әскер күші де көп неміс фашистерін Мәскеуден Берлиндегі бункеріндегі көріне апарып тығып едік. Ал біз бейбітшіліктің жайма-шуақ кезінде, тәуелсіз елімізде өмір сүріп отырып, өз ана тілімізді төрге шығаруымызға 21 жыл әлі аз деп әрі-сәрі жағдайда отырғанымыз мынау. Тіліміздің осындай жағдайында, осылай бір-бірімізге өкпелеп жүре береміз бе? Әлде төмендегі біздер, қолдан келетін іс-қимылға көшіп, тілімізге егелік жасап, жоғарыдағыларға: Біз өз тарапымыздан істейтінімізді істеп болдық, енді сендердің жайбарақаттықтарыңа не жорық деп, оларға ықпал ету үшін әрекет етеміз бе? Ешкім сырттан келіп, тілімізді төрге шығармайтыны анық болған соң, меніңше осы жолды ұстанғанымыз дұрыс деп ойлаймын. Сондықтан да Халықаралық «Қазақ тілі» қоғамының жұмысын қайта жандандырып, соның төңірегіне топтасып, қауымдасуымыз керек сияқты. Қайсыбір жоғарыдан басталған керемет идея, егер төмендегі көпшіліктің қолдауына сүйенбесе, оның іске асуы екіталай екені белгілі. Оны іске асырудың бірден-бір кілтипаны – ол барлық мекемелердегі тіл жанашырларының басын біріктіретін Қоғамның бастауыш ұйымдарын құрудан бастау. «Қазақ тілі» қоғамының бастауыш ұйымдарын жаппай құру керек дейтініміз – бұл қазақ елі болып ұйысу үшін қауымдасуымыздың шарты деп ұғынуымыз керек. Ұйым – тілімізге арашашы болудың, оны тірілтудің, дамытудың, сөйте жүріп, еліміздің біртұтас ел болуының ұйытқысы болып, осы істі батыл жүргізіп, баянды етуде көпшілікке сүйенуі үшін керек. Қоғамның Қызылорда облыстық филиалы «Қазақ тілі» қоғамының бастауыш ұйымдарын, меншік нысандарына қарамастан, облыстағы бүкіл ұжымдарда құруды пәрменді түрде жүргізіп келеді. Алдымен, облыс тұрғындарына қызмет ететін коммуналдық (су, жылу, жарық, қоқыс, т.б.), байланыс, банк, зейнетақы мен сақтандыру қорлары, жұмыс күштері көп шоғырланған мұнай, теміржол компанияларының басшыларында болып, оларға ісқағаздарын жүргізуде қазақ тіліне басымдық беруге, Қоғамның бастауыш ұйымдарын құруға атсалысуларын сұрап, хат жазудан бастадық. Ондағы мақсатымыз, егер осы мекемелердің басшылары мен қызметкерлері ұлтжандылықтың үлгісін танытып, ісқағаздарын қазақ тіліне көшіруді өздері бастаса, оларға келетін тұрғындар мен клиенттерінің біртіндеп қазақшаланатыны да сөзсіз ғой дегендік еді. «Біз бәріміз де қазақпыз, ісқағаздарымыз қазақ тіліне көшкен бізге «Қазақ тілі» қоғамына мүше болудың керегі не» дейтіндер де болды. Оларға: «Жалғыз ағаш орман болмайды», «Төртеу түгел болса – төбедегі келеді» деген қағидаларды басшылыққа ала отырып, ең бірінші сол тілді меңгергендер бірігуіміз керек дедік. Біз көп болған үстіне көп бола түссек, алда тұрған кедергілерді жеңу, ана тілімізге, ұлттық дәстүрімізге мұрнын шүйіргендерді орнына қою мүмкіндігіміз арта түседі. «Көп қорқытады, терең батырады» дегендей, Президентімізге де, әкімдерімізге де арқа сүйер осындай мықты, қауымдасқан, намысшыл ұлттық ұйым керек деп ойлаймыз. Шынтуайтына келгенде, қазақ ұлты болып ұйысуымыз үшін, әрқайсысымыз әр бұрышта дара-дара болып жүргеннен бір ұйымға топтасып, жабыла іске кірісуіміз керек екенін өмір көрсетіп отырғанын түсіндірдік. Осындай жұмыстардың нәтижесінде, соңғы екі жылда облыста 1000-ға жуық, Қызылорда қаласы бойынша 200-ден аса бастауыш ұйымдары құрылды. Жарнапұлдан жиналған алғашқы қаржыға көшелер мен мекемелердің көрнекті жерлеріне азаматтарымыздың намысын оятатын тақырыптар бойынша билбордтар мен плакаттар жасатып іліп қойдық. Осы үрдіс аудандық филиалдарда да жалғасын табуда. Соның арқасында, ана тіліне арашашы болатын ұйым келді деген қоғамдық пікір қалыптасып, бізді қолдаушылар саны күннен-күнге көбеюде. Қоғамның қажеттілігін көпшілігі мойындап, үлкен бетбұрыс басталды деуге болады. Белсенді қолдаушылар мүмкіндіктері мен ұлтжандылығына байланысты әртүрлі мөлшерде демеушілік жасауда. Мұнан да басқа қаржы көздерін іздестіріп: «Азаматтық альянс» қауымдастығының облыстық филиалы мен «Игілік» корпоративтік қорынан 550 мың теңгелік жобаны ұтып алдық. Облыс әкімдігі біздің әрбір бастамамызға үнемі қолдау көрсетіп келеді. Олар өздері бас болып әкімшілік аппаратында бастауыш ұйымын құрып, жарнапұл төлеуді қолға алғасын, қала, аудан әкімдіктері мен басқарма, департамент басшылары да осы үрдісті жалғастырып, біздің жұмысымызға үлкен серпіліс бергенін ризашылықпен айтуымыз керек. Облыстық ішкі саясат басқармасы, жергілікті БАҚ өкілдері қазақ тілін дәріптеу, біздің ұйымды қолдау мәселесінде жоғары саяси түсіністік деңгейін көрсетуде. Облыстық тілдерді дамыту басқармасымен қарым-қатынасымыз «Илегеніміз бір пұшпақтың терісі» деген қағидаға сай, сенікі, менікі жоқ, біте қайнасып жұмыс істеудеміз. Нәтижесінде құрылған бастауыш ұйымдары тұрақты түрде ай сайын: 30, 50, 100 теңге мөлшерінде жарнапұл төлеуде. Ірі-ірі кәсіпорындарды басқаратын ұлтжанды басшылар демеушілік жасауда. Мұндай нәтижеге жету үшін, біраз күресуге тура келді. Хатымызды жауапсыз қалдырған 53 мемлекеттік органдардың тізімін «Тәртіптік кеңеске», 63 үкіметтік емес ұйымдардың тізімін прокуратураға жіберіп, оларға шара көруді талап еттік. Солардың ішінде ірі компаниялар мен банк филиалдарының басшыларының кабинетіне «Қоғам ТВ» тілшілерін алып барып, «судың да сұрауы бар» дегенді есіне салып, сұхбат алдық, ол телеарна арқылы жұртқа жария етілді. Осындай рейдтерден кейін олардың да, басқалардың да көзқарастары өзгергенін айтуым керек. Қай мәселеде де жариялылық пен ашықтық өз нәтижесін беретіні анық. Республикалық «Ана тілі», «Қазақ елі», «Жас қазақ үні», «Төртінші билік», облыстық «Сыр бойы», «Кызылординские вести», «Ақмешіт ақшамы», «Халық» газеттерінде көлемді мақалалар мен сұхбаттар жариялап, облыстағы екі телеарнадан да бірнеше мәрте сұхбат бердік, тіл мәселесі талқыланатын мінбердің бәріне де көтерілуге тырыстық. Ондаған ұжымдардың шақыруы бойынша олардың жиналыстарына қатысып, Қоғамның мақсаты жайлы түсіндірме бердік. Сөйтіп, тілімізді төрге шығарудың жолында заң аясындағы тәсілдердің бәрін қолданып әрекет етуді Қоғамның басты мақсаты етіп отырмыз. Біз осындай жұмыстарымызбен қатар, ата-бабамыздан мұра болып бізге жеткен ана тіліміздің ешқашан ешкімге есесін жібермеген тіл екенін әрі бай әрі мағыналы, терең екенін де көпшіліктің санасына жеткізіп отыруды қолға алдық. Былтыр «Тіл мәдениеті және шешендік өнерді дәріптеу» атты облыстық байқау өткізіп, оған барлық аудан филиалдары өз жеңімпаздарын алып келіп, бас бәйгеге 50 мың, 1,2,3 орындарға сәйкесінше 40,30,20 мың теңгеден, басқа қатысушыларға 5 мың теңгеден сыйақы, облыстық филиалдың Дипломдары мен Алғыс хаттарын бердік. Биылдың өзінде, ақпан айында №233 мектепте ондаған мектептердің мұғалімдері қатысқан: «Алаш ұранды идеялар» атты байқау өткіздік. Жүлделі орын алғандар моральдық, материалдық тұрғыда марапатталды. Наурыз айында қазақ халқының ұлы жазушысы Мұхтар Омарханұлы Әуезовтің туғанына 115 жыл толуын республикада бірінші болып атап өтіп, «М.О.Әуезов шығармашылығындағы азаттық идеясы» тақырыбында ғылыми-практикалық конференция, сәуір айында Қоғамның республикалық көшпелі семинарын, тамыз айында Қоғамның аудандық филиал басшыларымен облыстық, қала деңгейінде бастауыш ұйым төрағаларымен семинарларды өткізуге мүмкіндік алғанымыз да осындай игілікті істердің нәтижесі. Облыстың елді мекендерінде орналасқан ғимараттардың маңдайшалары мен көрнекі ақпараттарының шет тілдерінде жазылған атауларын ұлттық менталитетімізге, қазақ тілінің нормаларына сәйкестендіруді талап етіп, сол нысандардың иелеріне бұқаралық ақпарат құралдары арқылы Ашық хат жарияладық. Осы бағыттағы жұмыстарды онан әрі жандандыру және орын алған кемшіліктерді әшкерелеу мақсатында Қызылорда қаласында «Қазақстан-Қызылорда» телекорпорациясымен бірлесіп, «Тіл сақшысы» атты рейд ұйымдастырылып, оны әр аптаның бейсенбісінде жүргізуді қолға алдық. Біздің бұл бастамаларымызға ұлтжанды кәсіпкерлер мен зиялы қауым өкілдері мен жалпы жұртшылық қызу қолдау көрсетіп, ұсыныс-пікірлерін теледидар мен газеттер арқылы білдіруде. Ісіміз оң нәтиже беруде. Осы бастаманы жалғастыру үшін келесі жылдан бастап, «Тіл сақшысы» атты өз газетімізді шығармақшымыз. Кеше ғана өңірімізде орналасқан әрі көп жұмыс қолы шоғырланған ең ірі деген 4 мұнай компаниясының шетелдік басшыларымен үш жақты (Облыс әкімдігі, Халықаралық «Қазақ тілі» қоғамның облыстық филиалы мен әлгі компаниялар) мемлекеттік тілді кеңінен қолданудағы өзара іс-қимыл мен әріптестік жайлы Меморандумға қол қою үрдісін бастадық. Меморандумның баптарына бұл компанияларда «Қазақ тілі» қоғамының бастауыш ұйымдарын құруға мүмкіншілік жасалу керектігі жөнінде арнайы бап кіргіздік. Бұл үрдіс басқа компаниялармен де жалғасын табады деп отырмыз. Қазақ тілінің қуаты күшті екенін және оның тұғыры мықты болу үшін ел болып іс-қимылға көшуіміз керек дер едім. Сәдуақас Аңсатов, «Қазақ тілі» қоғамы Қызылорда облыстық филиалының төрағасы, «Қазақ газеттері» ЖШС-ның облыстағы өкілі
2983 рет
көрсетілді0
пікір