- Ақпарат
- 17 Қаңтар, 2013
«Ауа райының» болжамы қандай?
Бұл заман ақпараттың заманы, ақпаратқа сүйенген, ақпаратқа қалтқысыз сенген заман. Ақпаратсыз күн көре алмайсың. Сондықтан күн сайын, тіпті сағат сайын беріліп жататын сан түрлі ақпарат еш күмәнсіз ақиқат болуға тиіс. Ақиқаттан сәл алшақ шыққан ақпарат халықты сан соқтыртып, алдап соғады. Ағын судай тасқындап жататын сол ақпараттардың бірі – ауа райы туралы мәлімет. Ауа райы туралы ақпаратқа тыңдарман һәм көрермен жұрттың әбден етене болып алғаны сонша, таңертең ерте сол мәліметке қарап сән түзейді, киімін де сол күні болатын ауа райының жағдайына қарай киіп шығады. Ауа райы туралы мәліметте жылы болады делінсе, жеңіл киініп, суық болады делінсе, жылы киімін киіп алады. Күн ашық болады деп жатса, қолына қосалқы ештеңе ұстамай тарта береді. Ал жауын-шашын болады десе, жейдесінің сыртынан тағы бір киім киіп, қол шатырын ала шығады. Ауа райы туралы мәлімет әншейін жай айта салатын, атасы басқа ақпарат емес. Бұл тылсым қасиеті жоқ, әр адам үшін өте қажет. Солай бола тұра еліміздің телеарналары ауа райы туралы мәлімет таратуға салғырт қарайды. Бір мезгілде сөйлеген әртүрлі арна бірі бас десе, екіншісі құлақ деп жатады. Тіпті республикамыздағы басты-басты он шақты телеарнаның әрқайсысы ауа райын өзінше құбылтып отырады. Теледидарға күн құрғатпай үңілетін қарттар мұны жиі байқап қалады. Нақты мысал келтірер болсақ, 2013 жылғы 8 қаңтар күні кешкісін «Хабар» телеарнасынан ертең, 9 қаңтарда күн ашық, температура күндіз -3, түнде -12 градус болады деп хабарлады. «Еуразия» телеарнасы күндіз +3, түнде -9 градус деді, 31-ші телеарна күндіз 5 градус жылы болады деп болжады. Осы хаттың авторы «Хабар» арнасының айтқанына сеніп, 9 қаңтар қүні таңертең үйден жылы киініп шыққан еді. Түске қарай терлеп-тепшіп, ыстықтап келді. 31-ші телеарнаның болжамы дұрыс болған сияқты. Өйткені күн өте жылы болып, қар күрт еріп жатты. Ауа райын болжап айту еріккеннің ермегі емес. Сондықтан әр телеарна ауа райы мәліметіне жауапкершілікпен қарауға міндетті деп білемін. Е.Мұхамбетов Алматы
3617 рет
көрсетілді0
пікір