- Ақпарат
- 07 Ақпан, 2013
«Мәңгілік Ел» – ортақ мұрат
Ел тәуелсіздігі мерекесінің қарсаңында Елбасы Қазақстан халқына Жолдауын арнады. Бұл Жолдау Қазақстан халқының болашақтан күтетін нәтижелерін анықтаумен ерекшеленді. «Қазақстан – 2030» Стратегиясы отыз үш жылдың ішінде емес, он бес жылдың ішінде орындалғанына бүгін куә болып отырмыз. Елбасы атап өткендей, Қазақстан Республикасы әлемдік деңгейде қалыптасып үлгерді. Енді Елбасы дамыған 30 елдің қатарынан көрінетін Қазақстан қандай болуы керек, қандай басымдықтар жүзеге асырылуы тиіс деген сұрақтарға жауап іздеп, ел алдына жоғары міндеттер қойды. Бұл міндеттердің орындалуына, Қазақ елінің тыныштығының сақталуына, экономикасының күшеюіне әрбір қазақ азаматы мүдделі екеніне тоқталды. Елдің мықты экономикасы мемлекеттің алғышептілігін көрсетеді. Кез келген бастамада рухани күш-жігер, ортақ мұратқа ұмтылу, туған елге деген шынайы, шексіз сүйіспеншілік те жатыр. Қалыптасқан мемлекеттің жаңа саяси бағытында қазақстандық патриотизм көпұлтты және көпконфессиялы қоғам табысының негізі екені айтылған. Осы бағытта атқарылатын шаралар мемлекеттік бірлікті, қоғамдық келісімді нығайтуға арналмақ.
Осы ретте Елбасы Қазақ елінің барлық азаматтарына алты үлкен міндет артты. Біріншіден, артымыздан еріп келе жатқан ұрпақтың жат жұртта емес, өз елінде өсіп, өмір сүруге құмартуын арттыру, соған жағдайлар жасау, туған жерінің иесі екендігін сіңдіру. Екіншіден, барлық этностар құқықтарының теңдігін сақтау. Үшіншіден, қазақ тілі мен үштұғырлы тіл саясаты. Елбасы қазақ тілі біздің рухани негізіміз екенін, еліміздің болашағы қазақ тілінде екенін, қазақ тілі 2025 жылға қарай өмірдің барлық саласында үстемдік етіп, кез келген ортада жаппай қолданыс тіліне айналып, шын мәніндегі мемлекеттік тіл мәртебесіне көтерілгенде, біз елімізді «Қазақ мемлекеті» деп атай алатынымызды атап өтті. Мұндай сөздер көпшіліктің күткені еді. Сондай-ақ ағылшын және орыс тілдеріне де терең мән беру алда тұрған міндеттердің бірі саналады. Төртіншіден, мәдениет, дәстүр және даралық. Елбасы қазақтың күрделі мәселелерін ашық айтып, ішкі тұтастықты бұзуға дәмеленген рушылдық, жершілдік секілді алып-қашпа әңгімеден бойды алыс ұстауға шақырды. Қарға тамырлы қазақтың түбі бір екенін әрқашан есте ұстау керек. Бесіншіден, ұлттық интеллигенцияның рөлі. Алтыншыдан, ХХІ ғасырдағы Қазақстандағы дін туралы ойлану керек.
Дін туралы сөз қозғалса көптеген тақырыптар ортаға шыға келетіні белгілі. Өйткені қазіргі кезде дін мәселесі ушығып кетейін деп тұр. Жастар дәстүрімізде жоқ діни ағымға салынуды әдетке айналдырып барады. Қолжетімді ақпараттар легі, жаһандық әлемнің әсері терең иммунитетті қалыптастыруды қажет етеді. Елбасы атап өткендей, діни таңдау жасауда ішкі «сүзгінің» болуы – ең басты қажеттілік. Ішкі сүзгі қалыптасуы адамның өмірлік салты, тұрмысына байланысты. Оны қалыптастыруда, әсіресе қазақ аналардың орны ерекше. Ежелден қазақ халқы өз қызын еркін өсіріп, сонымен қатар ибалы етіп тәрбиелеген. Ал қазіргі кездегі тұмшаланған қыз-келіншектердің ерсі көрінісі, әрине, біздің мәдениетке жат екенін түсінуіміз керек. Сондай-ақ Елбасы Қазақстандағы экстремизм мен терроризмнің өзіндік ерекшелігін нақты айтты. Бұл теріс пиғылды әрекеттерде идеялық емес, қылмыстық негіз бар. Сондықтан кез келген дін атын жамылған экстремистік, террористік әрекеттерді бірінші кезекте қылмыстық іс ретінде қарастыруға назар аудару қажет.
Қазақстанның алдағы қырық жыл тәуелсіз дамуы қандай болады? 2050 жылғы Қазақстанның жаңа келбетін танытатын, болашақтың ақиқатын Елбасы қалай көретініне көз жүгіртсек, біріншіден, 2050 жылғы Қазақстан үш тілде сөйлейтін білімді, еркін адамдардың қоғамы. Екіншіден, 2050 жылғы Қазақстан – жалпыға ортақ еңбек қоғамы. Жер жаһанды еркін кезіп, ғылым-білім іздеп, өз елінің табыстарын әлемге әйгілі ететін патриот қазақ азаматтары еңбекке негізделген қоғам құрады және еңбектің арқасында алдыңғы қатарлы 30 елдің құрамына кіреді.
Жолдауда айтылғандай, біз бәріміз бір атаның ұлымыз. Бәріміздің де туған жеріміз біреу – ол қасиетті қазақ даласы.
Бұл дүниеде біздің бір ғана Отанымыз – тәуелсіз Қазақстан.
Біз болашаққа көз тігіп, тәуелсіз елімізді «Мәңгілік Ел» етуді мұрат қылдық. Осы идеяны әрқайсысымыз сезініп, өмірлік сабақ ретінде түйсек, осы жолда бар әлеуетімізді салсақ, 2050 жылы мұрат еткен «Мәңгілік Елге» жететінімізге сенімдімін.
Айнұр ҚҰРМАНАЛИЕВА,
әл-Фараби атындағы ҚазҰУ-дың
дінтану және мәдениеттану кафедрасының меңгерушісі,
философия ғылымдарының докторы, профессор
8660 рет
көрсетілді0
пікір