- Ақпарат
- 07 Ақпан, 2013
Еселі еңбектің лайықты бағалануы
Жақында белгілі ғалым, философия ғылымдарының докторы, профессор, еліміздің саяси ғылымының негізін салушылардың бірі Раушанбек Әбсаттаров Диаспоралардың жаһандық зерттеулерінің әлемдік ассоциациясының вице-президенті болып сайланды. Бұл жағымды жаңалықты ести салып, ғалымның өзімен хабарластық.
– Жаңа қызметіңіз құтты болсын!
– Рахмет. Бұл менің еңбегімнің ғана емес, еліміздің саяси ғылымының бағалануы, соған берілген жоғары баға деп есептеймін.
Былтыр жазда Оңтүстік Кореяда әлемдік диаспоралардың жиыны өткен болатын. Оған әлемнің 15 елінен уәкілдер қатысты. Орта Азиядан қатысқан жалғыз мен болдым. Сол жиында Диаспоралардың жаһандық зерттеулерінің әлемдік ассоциациясын құру туралы шешім қабылданды.
Ал осыдан бірнеше ай бұрын мені осы ұйымға вице-президент етіп тағайындау туралы ұсыныс келіп түсті. Мен «Егерде сіздер Қазақстанның ұлтаралық саясаттағы жетістіктерін жоғары бағалап отырсаңыздар, қарсы емеспін» деген пікірімді білдірдім. Жақында осы ұйымға вице-президент болып сайланғаным туралы хабар келді.
– Ассоциация қандай қызметтер атқарады? Алдағы жоспарлары туралы айтып өтсеңіз?
– Бүгінгі таңда этносаралық, ұлтаралық мәселелер бүкіл әлем қауымдастығын алаңдатып отыр. Түрлі шиеленісті оқиғалар, қақтығыстар – осылардың негізінде ұлтаралық келіспеушілік мәселелері жатыр. Осы күрделі мәселелерді қалай шешеміз? Тығырықтан шығудың жолы бар ма? Біз бұған ғылыми тұрғыдан жауап іздейміз. Ұйым құрудағы бірден-бір мақсат та осы. Сонымен қатар әлемдік жаһандану жағдайындағы түрлі этностардың, диаспоралардың дамуы, оларды толғандырып отырған мәселелер де назардан тыс қалмайды деп сенемін. Биыл халықаралық ұйымның алғашқы съезін өткізу жоспарланып отыр.
Елімізде жеке саяси мектебін қалыптастыруда зор еңбек сіңіріп жүрген Раушанбек Әбсаттаровтың ғылыми еңбектері тек елімізде ғана емес, сондай-ақ әлемнің көптеген елдерінде жоғары бағаланып жүр. Еселі еңбектің тағы бір лайықты бағалануы осы болса керек.
Дәуіржан ТӨЛЕБАЕВ
4032 рет
көрсетілді1
пікір