• Білім және ғылым
• 07 Ақпан, 2013

Ғылымға қамқорлық

Жетпіс жылдан астам өмір сүрген Кеңес Одағы ыдырап, әр республика тәуелсіздігін алған алғашқы күндерінде «Енді қандай күйде боламыз?» деген дүдәмал ой болғаны рас. Біздің ел де осы күйді бастан кешті. Өйт­кені зауыт, фабрика, басқа өндіріс орындары тоқтап, бұрынғы Кеңес Одағын­дағы бар­лық байлық «үлкен үй» Ресейде қалған бо­латын. Дәл осы кезде елді тығырықтан алып шығатын тұлғаны халық өзі таңдап, ел тағ­дырын Нұрсұлтан Әбішұлы Назарбаевқа тапсырды. Содан бері қыруар істер атқарыл­ғандығына бәріміз де куә болып отырмыз. Елбасы өз Жолдауында білім-ғылым саласына баса мән берді. Мен осы салада 45 жылдан ар­тық еңбек еткен­діктен, оқу жүйесінің бұрынғысы мен бүгінгісін салыстырып отырамын. Соңғы он жыл ішінде, әсіресе әл-Фараби атындағы Қазақ ұлттық уни­верситетінде ауыз толтырып айтарлықтай жаңалықтар бар. Атап айтар болсақ, ғылым саласында университет әлем елдерінің оқу орындарымен тығыз қауымдастыққа еніп жұ­мыс атқарып келеді. Мысалы, биология және биотехнология факультетінде биотехнология, биофизика, биомедицина, нанотехнология, генетика, молекулалы биология салалары бойынша атқарылып жатқан жұмыстар сан алуан. Осының бәрі Елбасының ғылымға деген қамқорлығының арқасында. Астанадағы Н.Ә.Назарбаев университеті халықаралық стандартпен оқытатын оқу орындарының ішіндегі білім ордаларының үлгісі деп айтуға болады. Келешекте еліміздегі жоғары оқу орындары осы үлгіге көшулері керек. Біз осыдан 15 жыл бұрын қабылдаған Қа­зақстан дамуының 2030 жылға дейінгі бағдарламасында белгіленген межені мерзімінен бұрын орындадық. Еліміз толық қалыптасқан, бүкіл әлем танитын мемлекетке айналды. Енді дамудың 2050 жылға дейінгі жаңа бағытын белгілеп, іске кірісіп отырмыз. Осының барлығы көңіл қуантарлық жақсылықтар. Нұртай Торманұлы, әл-Фараби атындағы ҚазҰУ-дың биофизика және биомедицина кафедрасының профессоры