- Мәдениет
- 23 Ақпан, 2017
Қор жұмысы жүйеленіп келеді
Семей қаласының облыстық тарихи-өлкетану музейінде археологиялық қордың тұңғыш каталогының тұсаукесер салтанаты өтті. Шараға профессор Амантай Исин мен белгілі шежіреші, этнограф Молдабек Жанболатұлы қатысып, тұсаукесер рәсімінің лентасын қиды.
Қазақстандағы ең көне, 1883 жылы құрылған тарихи-өлкетану музейі қызметінің бастапқы кезеңінен өз қорын археологиялық материалдармен толықтыруды көздеді. Ұлы Абайдың досы Е.П.Михаэлис музейдің археологиялық қорын құруға бастамашы болып, 15 жәдігер тапсырған. Музейдің археологиялық қорын толықтыруға жергілікті өлкетанушылар лайықты үлес қосты. Олардың ішінде Ф.Педашенко мен Н.Коншин бар. Музей археологиялық қорының патша заманында құрастырылған каталогтарының ғылыми маңызы жоғары. Олардың біріншісі ХІХ ғасырдың 80-жылдарының соңында музей қорын сақтаушы М.Суворцевтың кезінде құрастырылып, облыстық статистикалық комитет каталогты 1888 жылы музей көнеліктерінің сипаттамасы түрінде, ал патша заманындағы соңғы каталогты музей қорын сақтаушы Е.Рычков 1914 жылы жариялады. ХХ ғасырдың 70-80 жылдарында қазба жұмыстарды жүргізген Л.Чалая мен Л.Ермоленконың да қазба материалдары музей қорына аз түскен. 1988-1990 жж. Кемерово мемлекеттік университетінің Ю.Алехин мен А.Илюшин басқарған Семей археологиялық экспедициясының материалдары ғана музей қорына едәуір толық көлемде түскен. ХХ ғасырдың 80-90 жылдарымен ХХІ ғасыр басында музей қорын сақтаушы О.Чайко, М.Ғалиев және музейдің бүгінгі қызметкерлері археологиялық қордағы материалдарды молайтып, сақтауға зор үлестерін қосты. Тәуелсіздік жылдарында археологиялық материалдарға деген қызығушылық Абай ауданындағы Шыңғыстау, Зайсан ауданындағы Шілікті, Катонқарағай ауданындағы Берел қазба жұмыстарына байланысты арта түсті. Музей жоспарына сәйкес өлкеміздегі археологиялық материалдарды жинап, ескерткіштерді зерттеу бағытында әр жылдары зерттеушілер мен өлкетанушылар А.Исин, А.Долгушев, В.Колбин, П.Жуков, Ю.Занарин, Х.Илиуф экспедицияға шығып тұрды. Соңғы жылдары музейдің археологиялық қорын жүйелеу жұмыстары жандана түсті. Музейдің алғашқы каталогтарының шығуынан кейін жүз жылдан астам уақыттан соң мыңға жуық жәдігерлер енгізілді. Сонымен қатар ескі және өте сирек басылымдар қатарындағы патша заманы каталогтарының көшірмесі жарияланып отыр. Шара барысында Шәкәрім атындағы мемлекеттік университетінің профессоры, тарих ғылымының кандидаты Мұхтарбек Қарпықұлы, Қазақ гуманитарлық инновациялық заң университетінің тарих және география кафедрасының аға оқытушысы Ұлан Құрметқалиұлы, өлкетанушы, зейнеткер Мұхаметқазы Мұхамедиұлы, «Прииртышье» өлкетану қоғамының мүшесі Павел Жуков, бұрынғы музей қызметкері, зейнеткер Зере Оразалиналар каталогқа талдау жасап, өз ойларын ортаға салды.
Гүлнұр ШАЛАТАЙҚЫЗЫ, музей қызметкері Семей
1475 рет
көрсетілді0
пікір