- Қоғам
- 09 Қаңтар, 2020
«АЙМАҚТАР АЛАМАНЫ»
Қармақшы ауданында «Болашаққа бағдар: рухани жаңғыру», «Ұлы даланың жеті қыры» бағдарламалық мақаласы аясында ауыл өнерпаздарының шығармашылығын қолдау мақсатында «Аймақтар аламаны» байқауы өз мәресіне жетті.
Шараның мақсаты – ұлттық дәстүр, рухани ұстаным, ұлттық құндылықтарды дәріптеу, ауыл жастарының шығармашылығына серпіліс жасау. Ақтық сайысқа дейін ауданға қарасты 14 ауылдық округтің өкілдері өзара бақ сынасып, одан 8 ауыл жартылай финалға жолдама алған болатын. Жалпы өнер фестиваліне 200-ден аса танылмай жүрген таланттар, ерекше дарын иелері жарқырай көрінді. Ш.Төлепова атындағы аудандық мәдениет үйінде өткен гала-концерт жоғары деңгейде ұйымдастырылды. Ақтық додада аудан әкімінің орынбасары Омаров Жарқын Тұрмаханұлы қатысушы өнерпаздарға сәттілік тілеп, сөз сөйледі. Төретам кенті, Ақай, Жаңажол, Ақтөбе ауылы өнерпаздарының өнерлерін арнайы жасақталған қазылар алқасы сарапқа салды. Қазылар алқасының шешімімен «Ұлағат» аталымы бойынша Төребай би және Ақжар ауылының «Әжелер» ансамбльдері, «Шабыт» аталымында Тұрмағамбет ауылдық клуб үйінің жанынан құралған «Драма» үйірмесі жүлделі болды. Қармақшы ауылының өнерпазы Әділет Бимұратұлы – «Алтын дауыс», ІІІ Интернационал ауылының өнерпаздары Назым Абуқасымова және ұстазы Гүлжан Әбдірова – «Муза», Қызылтам ауылының өнерпазы Жомарт Рақымжанов – «Үздік көрме», Ақай ауылының өнерпазы Дәріқұл Махамбетов – «Ұлт құндылығы», Иіркөл ауылының «Ағалар» ансамблі – «Ағалар жолымен» аталымымен марапатталды. Сайыстың нәтижесінде ІІІ орынға – Төретам кенті, ІІ орынға – Ақтөбе ауылы, І орынға – Ақай ауылының өнерпаздары лайық деп танылды. Ал Бас жүлде мен 300 000 теңге сыйақыны Жаңажол ауылының өнерпаздары жеңіп алды.
Диана ІЗБАСАР Қызылорда облысы
1650 рет
көрсетілді0
пікір