- Руханият
- 09 Қыркүйек, 2020
Жақсылықта жәрдемші болсақ
Аса қамқор ерекше мейірімді Алланың атымен бастаймын!
Кез келген саланы тиісті деңгейде дамытып, мемлекеттің әлемдік қауымдастық алдындағы игі бастамаларын ілгерілету жолында уәдесіне адал, жұмысына жанашыр, өз мамандығын кәсіби түрде меңгерген кадрлардың рөлі өте маңызды.
Қасым-Жомарт Тоқаев «Жаңа жағдайдағы Қазақстан: іс-қимыл кезеңі» атты Жолдауында осы мәселеге тоқталып, бізге жаңа кадрлар, яғни кәсіби білікті, озық ойлы және бастамашыл мамандардың аса қажеттігін атап өтті.
Біз ауылына қарап, азаматын таныған халықпыз. Елдің ертеңі жолында ерлікке татитын істерге ұйытқы болатын нағыз ерлер емес пе? Халқымыз
«Жаман ердің қайғысы,
Өз отының қасында.
Жақсы ердің қайғысы,
Ауылының басында» демей ме?
Демек, біз өз отының қамын ойлаумен қатар, Отанның ортақ игілігіне қызмет ететін, мемлекеттік бастамаларды алға сүйрейтін азаматтарды тәрбиелеп, қанаттандырып отыруымыз керек. Баршамыз осы бағытта жұдырықтай жұмылып, бір үйдің баласындай, жақсы істерде бір-бірімізге көмекші болғанымыз абзал.
Алла Тағала қасиетті Құранда: «...жақсылыққа, тақуалыққа жәрдемдесіңдер. Күнәға және дұшпандыққа жәрдемдеспеңдер» («Мәида» сүресі, 2-аят) деп әмір еткен. Жақсылықта тізе біріктіріп, халыққа қызмет етуден асқан бақыт жоқ. Өйткені адам жаны сауапты істен ерекше қуат алып, қуанышқа бөленеді.
Ардақты Пайғамбарымыз (оған Алланың салауаты мен сәлемі болсын): «Араларыңда ең жақсыларың – айналасына пайдалы болғандарың» деген. Жақсы адамның бір сипаты – өзгелерге жақсылық жасау.
Президент отбасылық-демографиялық ахуалға алаңдаушылық білдіріп: «Өкінішке қарай, Қазақстанда әрбір алтыншы отбасы бала сүйе алмай отыр. Сауалнама көрсеткендей, отандастарымыздың 20 пайызға жуығы мұны ажырасуға негіз болатын елеулі себеп деп санайды.
Біріккен ұлттар ұйымының еліміздегі халық санының өсіміне қатысты болжамы Орталық Азиядағы көршілес мемлекеттермен салыстырғанда көңіл көншітпейді.
Үкіметке 2021 жылдан бастап «Аңсаған сәби» арнаулы бағдарламасын жүзеге асыруды тапсырамын» деді.
Бұл бастама Жаратқанның қалауымен бала сүйе алмай сарылып, үмітсіздікке бой алдырған қаншама ананың үмітіне қанат бітірді. Бала – отбасы берекесі мен қуанышы. Халқымызда «Балалы үй – базар» деген нақыл бар. Сәби үні қаншама жанның өмірін жақсылыққа өзгертіп, отбасы берекесін сақтап қалуда. Бұл ретте «Аңсаған сәби» бағдарламасының жүзеге асуы кейбір отбасындағы ажырасу мәселесіне нүкте қояды деген сенімдеміз.
«Біздің қоғам еңбек құндылықтарына деген көзқарасты өзгертуі керек. Жас буынға еңбекті бағалауды, оны абыройлы және абыройлы емес деп бөлмеуді үйреткеніміз жөн. Өкінішке қарай, жастарымыз әп-сәтте байып кеткісі келеді. Олардың лотереяға, бәс тігуге және букмекер агенттіктеріне жаппай әуестігінің себебі осында.
Алаңдаумен өткен соңғы айларда еңбек етудің баға жетпес қадір-қасиетін жете түсіндік. Кіші медицина қызметкерлері, коммуналдық және қызмет көрсету саласында еңбек ететін азаматтар қыруар жұмыс атқарды. Бұл – нағыз еңбектегі ерліктің жарқын үлгісі» деді Қасым-Жомарт Тоқаев.
Жасыратыны жоқ, карантин кезінде қаншама азамат жалақысыз демалысқа шығып, отбасы нәпақасына алаңдап қалды. Бұл жағдай кез келген жұмыстың қадірін білу қажеттігін ұқтырды. Біз қашан да өскелең ұрпақтың санасына еңбекпен тапқан нан тәтті екенін сіңдіріп отыруымыз керек.
Алла Тағала ел қамындағы барша азаматқа жар болсын. Ел аман, жұрт тыныш болғай! Әмин!
Наурызбай қажы ТАҒАНҰЛЫ,
ҚМДБ Төрағасы, Бас мүфти
829 рет
көрсетілді0
пікір