- Мәдениет
- 09 Желтоқсан, 2011
АНА АМАНАТЫ
Күй дүлдүлі Дина Нұрпейісованың туғанына – 150 жылҚаршадайынан Нарындағы атақты күйшілердің күйлерін нақышына келтіре тартып, төңірегі «домбырашы қыз» атандырған қыздың есімін естіп, күй атасы Құрманғазының өзі арнайы іздеп барыпты. Оның даңқына ғана емес, домбыра тартысына сүйсінген күйші батасын беріп, ақ жол тілеген екен. Бұдан кейін де жас дарыннан көз жазбай, үнемі ат басын бұрып, додалы күй айтыстарына ертіп барып, домбыра тартудың қыр-сырын меңгертіпті деседі. Сол қаршадай қыз тоғыз жасынан бастап, он тоғыз жасына дейін, қашан ұзатылғанша Құрманғазының баулуында болыпты. Бүгінде оның «Әсемқоңыр», «Тойбастар» , «Ана аманаты», «Байжұма» , «Қосалқа» сынды күйлері көпшілікке белгілі. Домбырашы қыз Құрманғазыдай қас шебердің шәкірті атанып қана қоймай, кейін өзі де қазақтың маңдайын жарқыратар жұлдыз атанарын біліп пе?!
Биыл күй дүлдүлі Дина Нұрпейісованың туғанына 150 жыл толды. Ел Тәуелсіздігінің жиырма жылдығымен тұспа-тұс келген Дина анамыздың бұл тойын дүйім ел дүрілдете атап өтті. Өзі туған топырақтан басталған той еліміздің түкпір-түкпірінде өтіп, қазақ мәдениетінің ордасы – Алматыда жалғасты. Абай атындағы мемлекеттік академиялық Опера және балет театрында өнер шеберлерінің қатысуымен өткен концерт те – соның айғағы.
Сахнаның шымылдығы ашылғанда көрерменге Дина шешейдің күй тартып отырған бейнесі көрініп, таспаға жазып алынған сөзі ұсынылды. Өнер иесінің алғаш сахнаға қалай көтерілгенінен бастап, кимешегін келістіре киген келіншектің киіз шетінедегі кербез отырысын, домбыра қағысын әсерлі әңгімелеген жүргізушілер көрерменнің көз алдына Дина Нұрпейісованың бейнесін әкелді.
Салтанатты кешті Алматы қаласы әкімінің орынбасары С.Сейдуманов ашты. Ол: «Құрманғазыдан тәлім алған күй өнерінің төлтума таланты Дина Нұрпейісова қазақ даласын күйге бөледі. Қазақ мәдениеті мен руханиятына зор үлес қосқан ол күй өнерінің өрісін ұзартты. Ел Тәуелсіздігінің жиырма жылдығы шеңберінде еліміздің аса көрнекті қайраткері Дина Нұрпейісованың 150 жылдығы кеңінен аталып өтуде», – дей келе бауырлас Түркия елінде күй дүлдүлінің атында саябақ ашылғандығы жайында сүйіншілеген жаңалықты жеткізді.
Сахнада оркестр күйшінің күйлерін төгілдірсе, Динаның ізін жалғап жүрген, өнер дүлдүлінің бүгінгі сіңлілері саналатын Айгүл Үлкенбаева бастаған бір шоғыр өнерпаздар күйден тарту жасады. Ал Сәуле Жанпейісова бастаған дәстүрлі ән өнерінің шеберлері әннен шашу шашты. Кеште өнерлі қыз-келіншектердің түгелі дерлік сахнаға Дина шешейдің келбетін елестетер кимешек киіп шыққандығына көз сүйсінді.
Бұл өнер шеберлерінің кешіне күйшінің туған өлкесі Ақжайық өңірінен арнайы өкілдер келіп, өңір басшысы Б.Ізмұхамбетовтің құттықтауын оқып, сия-сияпатын жасады. Сондай-ақ сахнада Динаның 150 жылдығына орай өткізілген домбырашылар байқауында жүлдегер атанған жас дарындар да өнер көрсетті. Бұл кешке арнайы келген төлтума таланттың туыстары да сахнаға көтеріліп, күйшісін ардақтаған еліне алғысын білдірді. Күй өнеріне мейірі қанған көпшілік «қазағының қанында күй ойнатқан Дина күйшінің мұрасы – ұрпаққа аманат» десіп тарасты.
Динара ІЗТІЛЕУ
4972 рет
көрсетілді0
пікір