- Мәдениет
- 07 Маусым, 2012
«Отаным – махаббатым менің»
Алматыдағы Қазақстан Суретшілер одағының көрме залында белгілі қылқалам шебері Бірғали Байекеевтың шығармашылығына 50 жыл толуына байланысты көрме өтті. Шараның ашылу салтанатында ҚР Суретшілер одағының төрағасы Байтұрсын Өмірбеков, белгілі қаламгерлер Темірхан Медетбек, Мір-Шайыр, өнертанушы Ирина Пен, ғалым Жұмат Тілепов сөз сөйледі. «Отаным – махаббатым менің» деп аталатын көрмеге суретшінің 40-қа жуық туындысы қойылған еді. Журналист, суретші, ақын, сазгер, Қазақстан Журналистер одағының мүшесі Бірғали Байекеев 1953 жылы Маңғыстау облысы, Маңғыстау ауданына қарасты Шайыр ауылында туған. Талантты жастың туындылары қазақтың белгілі қаламгерлері – Сейдахмет Бердіқұлов, Шерхан Мұртаза, Фариза Оңғарсынова және атақты қылқалам шебері Сахи Романның назарына ілігіп, жоғары бағаланды. Ол 1960-1980 жылдардағы республикалық және Бүкілодақтық байқаулардың лауреаты атанады. Махамбет Өтемісұлы атындағы сыйлықтың иегері. Суретшінің тағы бір ерекше қыры – журналистика саласында да қалам тартып, ұзақ жылдар бойы әртүрлі басылымдарда еңбек етті. ҚазМУ-дың журналистика факультетін, Мәскеудегі Халық өнері университетін бітірген. Маңғыстау, Бейнеу аудандарындағы газет редакцияларында әдеби қызметкер, бөлім меңгерушісі, жауапты хатшы, редактордың орынбасары, облыстық «Маңғыстау» газетінің меншікті тілшісі болды. Бүкілодақтық әуесқой суретшілердің және бейнелеу байқауларында жүлделі орындарды иеленген. Ол «Құбыла сөз», «Кісілік кілті» кітабының авторы. – Сегіз қырлы, бір сырлы, жан-жақтылығымен әрі қарапайымдылығымен ерекшеленетін Бірғали Байекеев денсаулығына байланысты көрмеге келе алмады. Көрмедегі суреттердің барлығы газетке басылған. Ол суретші мамандығын арнайы оқымаса да, оның салған суреттері кәсіпқой суретшіден кем емес. Графика ақ пен қара түске негізделген. Оның суреттерінде ұлттық құндылықтар, әлеуметтік мәселелер, нәзіктік байқалады, – деді ҚР Суретшілер одағының төрағасы Б.Өмірбеков. Салтанат ҚАЖЫКЕН
2900 рет
көрсетілді0
пікір