- Ақпарат
- 29 Қараша, 2012
Қазақ баспасөзінің бүгіні мен болашағы талқыланды
Абай атындағы Қазақ ұлттық педагогикалық университетінде «Қазақ газеттері» ЖШС-ның Бас директоры – Редакторлар кеңесінің төрағасы Жұмабек Кенжалин, осы Серіктестікке қарасты «Ана тілі», «Ақиқат», «Мысль», «Экономика», «Үркер» басылымдарының редакторлары «Қазақ баспасөзінің бүгіні мен болашағы» тақырыбында университеттің профессор-оқытушылар құрамымен, студенттерімен кездесу өткізіп, аталған тақырып төңірегінде өз ойларымен бөлісті. Кездесуді ашқан оқу орнының аппарат жетекшісі Бақтияр Сманов «Қазақ баспасөзінің бүгіні мен болашағы» тақырыбына байланысты сөзін бұқаралық ақпарат құралдарының өміріміздегі қандай орын алатынынан, олардың қаншалықты маңызды екенін айтып өтті. – Бұл тұрғыдан алғанда «Қазақ газеттері» ЖШС-ға қарасты басылымдар өздерінің бағыт-бағдарына сәйкес әртүрлі тақырыптарға қалам тербеп, біздің рухани әлемімізді байытып келеді, – деді Бақтияр Өрісбайұлы. Жазушы-публицист Жұмабек Кенжалин қазақ баспасөзі төңірегінде ой қозғап, «Қазақ газеттері» ЖШС-ның құрылу тарихына, жүріп өткен жолына, қазіргі таңдағы жасап жатқан жұмыстарына, Серіктестіктің алда тұрған келелі міндеттеріне тоқталды. – Бүгінгі таңда біздің Серіктестіктің құрамында «Ана тілі», «Ақиқат», «Мысль», «Үркер», «Экономика», «Уйғур авази» басылымдары бар. Әр басылымның өз ерекшелігі бар. Өздерінің көтеріп жүрген тақырыптары бар. Заман ағымына сай ғаламтор беттерінде электрондық нұсқалары да жарияланып отырады. Біздің ендігі мақсатымыз, Елбасының «Жалпыға Ортақ Еңбек Қоғамына қарай 20 қадам» мақаласында айтылғандай, бұқаралық ақпарат құралдарын модернизациялау бойынша, жұмысымызды жаңа сапалық деңгейге көтеру. Бұл үшін басылым ұжымдары оқырмандардың талғамынан шығатын материалдар жариялау, халықтық маңызы бар мәселелерді тереңірек қозғау, оқырмандармен, авторлармен жан-жақты нәтижелі жұмыс жүргізу, өзіндік жобалар әзірлеу сынды көптеген жұмыстарды атқарып жатыр, – деді ол. Жұмабек Омарұлы кездесуде қазақ баспасөзінің жай-күйіне байланысты қойылған сауалдарға да жауап берді. Университеттің оқу ісі жөніндегі проректоры, философия ғылымдарының докторы Ақтолқын Құлсариева қазақ баспасөзінде ұстаздар қауымының тыныс-тіршілігін көбірек жазу, олардың мәртебесін жоғарылатуға байланысты өз ойын білдірді. – Қазіргі таңда елімізде ұстаз мәртебесін жоғарылатуға арналған көптеген іс-шаралар жасалып жатқаны белгілі. «Қазақ газеттері» ЖШС-ға қарасты басылымдар өз тарапынан осы мәселеге көңіл бөліп, ұстаздардың атқарып отырған еңбектерін баспасөз беттерінде жиі көтерсе деген тілегім бар, – деді. Кездесуде, сондай-ақ «Мысль» журналының бас редакторы Сейдахмет Құттықадам, «Ақиқат» журналының бас редакторы Аманхан Әлімұлы, «Ана тілі» газетінің бас редакторы Самат Ибраим, «Үркер» журналының бас редакторы Қуандық Түменбай, «Экономика» газеті бас редакторының орынбасары Амангелді Шопан көтеріліп отырған тақырыпқа байланысты пікірлерін білдіріп, көпшілік тарапынан қойылған сауалдарға жауап берді. Дәуіржан Төлебаев
3283 рет
көрсетілді0
пікір