- Ақпарат
- 22 Желтоқсан, 2012
Бірлескен қимыл ғана уақыт қысымына жауап береді
Мәскеуде жұмыс сапарымен болған Елбасы Нұрсұлтан Назарбаев Ұжымдық қауіпсіздік шарты ұйымның Ұжымдық қауіпсіздік кеңесінің, ЕурАзЭҚ-тің Мемлекетаралық кеңесінің және Мемлекет басшылары деңгейіндегі Жоғары Еуразиялық экономикалық кеңестің отырыстарына қатысты. ҰҚШҰ Ұжымдық қауіпсіздік кеңесінің сессиясында ұйымға мүше мемлекеттер халықаралық қауіпсіздік және мемлекетаралық ынтымақтастықты нығайту мәселелерін кеңінен талқылады. Оған Қазақстан Республикасының Президенті Нұрсұлтан Назарбаев, Армения Республикасының Президенті Серж Сергсян, Қырғыз Республикасының Президенті Алмазбек Атамбаев, Беларусь Республикасының Президенті Александр Лукашенко, Ресей Федерациясының Президенті Владимир Путин және Тәжікстан Республикасының Президенті Эмомали Рахмон қатысты. Елбасы Нұрсұлтан Назарбаев өз сөзінде Ұйымның бір жыл ішінде атқарған жұмыстары жайында әңгімеледі. Бұдан кейін сөз сөйлегендер Ұйымға Қазақстанның төрағалық еткен тұсында атқарылған жұмыстар нәтижелі болғанын атап өтті. ҰҚШҰ Ұжымдық қауіпсіздік кеңесінің сессиясы барысында халықаралық және өңірлік өзекті проблемалар талқыланды. Әскери ынтымақтастықты жетілдіру және ҰҚШҰ-ның әскери басқару жүйесін оңтайландыру мәселелері қаралды. Басты назарда Ауғанстандағы жағдай және осы аймақтан тарайтын қауіп-қатердің алдын алу мәселелері болады. Жиында сондай-ақ Өзбекстан Республикасының ҰҚШҰ-ға мүшелігін тоқтату туралы өтініш айтылып, оң шешімін тапты. Басқосуда Ұйымның биылғы атқарған жұмыстарының қорытындысы шығарылып, келесі 2013 жылы атқарылу керек міндеттер анықталды. Алдағы жылы Ұйымның тізгіні Қырғызстанның қолына тиетін болады. Кезекті сессия келесі жылы мамыр айында Бішкекте өтеді. Бұдан кейін Елбасы Еуразиялық экономикалық қоғамдастығы Мемлекетаралық кеңесінің кеңейтілген мәжілісіне қатысты. Мәжілісте Ресей, Беларусь, Қазақстан және Тәжікстан Президенттері болды. Елбасы Нұрсұлтан Назарбаев өз сөзінде аймақтық бірлестіктерді дамытудың беретін нәтижелерін, осы төңіректе туындаған мәселелерге талдау жасау керектігін, ЕурАзЭҚ аясында жұмыла атқарған жұмыстың тиімділігін, ортақ энергетикалық жүйе, бейбіт атом энергиясы саласында алдағы уақытта атқарылатын бірқатар жобалар бар екендігін атап өтті. Сондай-ақ Елбасы «Инновациялық биотехнологиялар» мен «Уран өндіруші өндіріс ықпалына ұшыраған аумақтарды сүзгіден өткізу» атты екі бағдарлама арқылы қоғамдастықтың ғылым және экология салаларындағы байланысы нығайып келе жатқандығын тілге тиек етіп, интеграцияның аталмыш кезеңінде ЕурАзЭҚ әлеуетін іске қосу қажеттігіне тоқталды. Бұдан кейін Еуразиялық зкономикалық одақ мемлекеттердің ерікті, тең интеграциялы, бірлескен тиімді экономикалық дамуы негізінде құрылуы тиіс екенін айтты. Кеден Одағы мен Біртұтас экономикалық кеңістікке жаңа мемлекеттердің кіруі сауда-саттықты ұлғайтып, өнеркәсіп пен ауылшаруашылығы өндірісінің көлемін арттырады. Жоғары Еуразиялық экономикалық кеңестің кезекті жиынында сөз сөйлеген Нұрсұлтан Назарбаев алдағы уақытта барлық мәселелер бойынша бір келісімге келетіндеріне сенімді екенін айтты. Экономикалық кеңес шеңберінде біртұтас сыртқы саясат жүзеге асырылып келе жатқанын атап көрсетті. Еуразиялық экономикалық комиссияның өз жұмысын бастағанына бір жылға жақындап қалды. Сол уақыт ішінде мемлекеттер арасындағы өзара байланысты нығайтуға бағытталған 17 келісім қабылданыпты. Алдағы уақытта халықаралық келісімдерді жүзеге асыру үшін қыруар жұмыстар атқарылуы керек. Елбасы Нұрсұлтан Назарбаев Қазақстанның Біртұтас экономикалық кеңістік аясындағы интеграциялық үдерістерді кеңейтуді қолдайтынын айта келіп – «Бұл туралы мен өткен аптада жариялаған Қазақстан халқына Жолдауымда да айтып өттім. Біз мұнда экономикалық интеграцияны қазіргі уақыттың талабынан шығарып отырмыз. Одан бастарту бізді әлем экономикасының шет аймағына қарай лақтырып тастар еді. Оның үстіне, қазіргі уақытта 2013 жылы орын алатын орасан зор қаржы дағдарысының кезекті кезеңі туралы болжам жиі айтыла бастады. Қазіргі әлемде бірлескен қимыл ғана уақыттың қысымына лайықты жауап бере алады. Сонымен бірге, интеграциялық жаңарулардың ұдайы жетілдіріп отыруды талап ететін үздіксіз үдеріс екенін ұмытпауымыз керек» деді. Алдағы уақытта атқарылуға тиісті жұмыстар аз емес. Ауыр жүкті жұмыла көтергенде ғана көп істі еңсеруге болады. Сонда халықтардың өркендеуіне жол ашылады. Еуразиялық экономикалық кеңестің мәжілісі барысында «Интеграцияның негізгі бағыттарын жүзеге асыру туралы», «Еуразия экономикалық комиссиясының 2013 жылға арналған бюджеті туралы» және «Кеден Одағы комиссиясын жою туралы» сияқты барлығы 9 түрлі құжатқа қол қойылды. Исатай Қорғанбаев
2398 рет
көрсетілді0
пікір