- Тұлға
- 26 Желтоқсан, 2012
Мәдениет саласының үздіктері марапатталды
2012 жыл мәдениеттің бар саласы үшін ерекше жыл болды. Астанада ғажайып опера театры бой көтерді. Алматыдағы опера театры өз тарихында алғаш рет зингшпиль жанрына түрен салып, мұнан бөлек үлкен опереттаны сахналады. Әлемнің әр қиырында алмағайып оқиғалар орын алып отырғанда, біздің театрларда жаңа пьесалардың премьералары жүріп жатты. Төрткүл дүниенің әр қиырында қазақ кинематографиясының жаңа туындылары таныстырылды. Шет мемлекеттерде өткен Қазақстанның мәдени күндерінде сан қырлы өнеріміз салтанат құрды. Жылдың барлық кезінде жазушылардың жаңа кітаптарының тұсаукесер рәсімдері өткізілді. Осының бәрі мемлекетіміздің өркендеуінің айқын көрінісі екені анық. Тәуелсіздік күні қарсаңында Елбасы Жарлығымен бір топ мәдениет пен өнер қайраткерлері де мемлекеттік наградалармен марапатталғаны белгілі. Астанаға келе алмаған азаматтарға марапаттарын Қазақстан Республикасының Мәдениет және ақпарат министрі Дархан Мыңбай Елбасының тапсырмасы бойынша Алматыға келіп тапсырды. Мемлекеттік және қоғамдық қызметте сіңірген еңбегі, елдің әлеуметтік-экономикалық және мәдени дамуына, халықтар арасындағы достық пен ынтымақты нығайтуға қосқан елеулі үлесі үшін Суретшілер одағының, Кинематографистер одағының, Дизайнерлер одағының мүшесі Әмен Хайдаровқа ІІІ дәрежелі «Барыс» ордені тапсырылды. Ғ.Мүсірепов атындағы академиялық балалар мен жасөспірімдер театрының актері, режиссер Мұрат Ахманов пен Құрманғазы атындағы ұлттық консерватория оқытушысы Әділ Мұса, М.Әуезов атындағы академиялық драма театрының актрисасы Рәшида Хаджиева «Құрмет» орденімен марапатталды. Ал «Ерен еңбегі үшін» медаліне Қ.Қожамияров атындағы республикалық мемлекеттік ұйғыр театрының әншісі Тулунай Айсарова, Суретшілер одағының мүшесі, суретші-карикатурашы Еркін Нұразхан лайық деп табылды. «Қазақстанның еңбек сіңірген қайраткері» атағына М.Әуезов атындағы мемлекеттік академиялық драма театрының көркемдік жетекшісінің әдеби кеңесшісі Әлия Бөпежанова және актер Омар Қиқымов, Ғ.Мүсірепов атындағы академиялық балалар мен жасөспірімдер театрының актрисасы Райхан Қалиолдина, «Мюзикола» дуэтінің жетекшісі Болат Сыздықов ие болды. Ал «Мәдениет саласының үздігі» төсбелгісін алғандар қатарында Жексенбек Еркімбеков, Роза Жаманова, Бибігүл Төлегенова, Сәбит Оразбаев, Болат Аюханов, Асанәлі Әшімов, Рубен Андриасян сынды сахна майталмандары мен Алматы қаласы әкімінің орынбасары Серік Сейдуманов болды. Сондай-ақ министр Мемлекеттік сыйлықтың иегері Дулат Исабековке Президент Нұрсұлтан Назарбаевтың Алғысхатын оқып берді. Онда: «Сіз дара қолтаңбаңызбен танылып, әдебиеттің алуан жанрында жемісті еңбек етіп келесіз. Қаламыңыздан шыққан шымыр хикаяттар, шынайы роман және сахналық туындылар оқырмандар мен көрермендерді рухани байытты. Ұлт әдебиетінің игі дәстүрін жалғастырып, қазынасын байытқан шұрайлы шығармаларыңыз үшін сізге алғысымды білдіремін. Мерейлі мерейтойыңыз 70 жасыңызбен құттықтап, мықты денсаулық, шалқар шабыт, отбасыңызға бақыт-береке тілеймін. Алдағы уақытта да жұртшылықты тың туындылармен қуанта беріңіз» делінген. Жиыннан кейін министр денсаулығы мен жастарының ұлғайғанына байланысты жете алмаған Әмен Хайдаров, Хабиба Елебекова, Гүлфайруз Исмаилова сынды майталмандардың үйлеріне барып, құттықтап қайтты. Солардың бірі, Қазақстанның еңбек сіңірген артисі Хабиба Елебекова: «Дархан балам қасымда бір сағаттай отырып, жағдайымды сұрап, әңгімесін айтып, көңілімді көтеріп кетті. Осындай жасқа келгенде ел үшін еткен еңбегімді естеріне алып, мені апалауының өзі үлкен күш, жоғары мәртебе. Көсегелері көгерсін, мені іздеген ел азаматтарына мың алғыс! Халық аман болсын, ыстық сағынышым мен дұғай сәлемімді жолдаймын» деп қуанышымен бөлісті. Салтанат ҚАЖЫКЕН
3094 рет
көрсетілді0
пікір