- Ақпарат
- 26 Желтоқсан, 2012
Мемлекеттік қызметші қазақ тілін білуі тиіс
Қазақстан Республикасы Президентінің жанындағы Мемлекеттік басқару академиясында Елбасының «Қазақстан – 2050» Стратегиясы – қалыптасқан мемлекеттің жаңа саяси бағыты» атты Жолдауын талқылау бойынша алғашқы онлайн-конференция өтті. Елбасының «Қазақстан – 2050» Стратегиясы – қалыптасқан мемлекеттің жаңа саяси бағыты» атты Жолдауы – бағдарламалық құжаттың негізгі ережелерін түсіндіру бойынша баяндама жасаған Қазақстан Республикасы Президенті Әкімшілігі Басшысының орынбасары Бауыржан Байбек еліміз бойынша стратегияны жүзеге асыру жұмыстары әлдеқашан басталғандығын және бұл бағытта көптеген шаралардың атқарылғандығын атады. Ауыл әкімдерін сайлау, олардың жұмысын жергілікті жерде мұқият қадағалау тетіктерін енгізу, жалпы әкімдер жұмысына мониторинг жүргізу сияқты көптеген игі бастамалар жүзеге асатынын сөз етті. Б.Байбектің айтуынша, жаңадан қабылданған Жергілікті өзін-өзі басқару концепциясына сай, ауылдық жерлерде әкімдерді 2013 жылдан бастап халық сайлайтын болады. Ал әкімқараларға мемлекет тарапынан үлкен құзыр мен билік берілмек. Сосын мемлекеттік қызметтің «А корпусындағы» мемлекеттік қызметкерлерге қазақ тілін білу міндетті болмақ. – Мемлекеттік қызметкерлердің әрқайсысы өзінің құзыретін дәлелдеуі қажет, сонымен қатар олар қазақ және орыс тілдерін жетік меңгерген болуы шарт. Соның ішінде қазақ тілін білу – «А корпусындағы» жоғары құзырлы мемлекеттік қызметкерлердің барлығына қойылатын міндетті талап болып табылады, – деді Б.Байбек өз сөзінде. Ағылшын тіліне қойылатын біліктілік талаптары да болады. Ағылшын тілі бүгінде озық білім мен жаңа технологияларды таратушы ақпарат иесі. Бұған қоса Президенттің өңірлерге шетел инвестициясын тарту жөнінде берген тапсырмасы бар. Соның негізінде әкімдер жағымды инвестициялық жағдай жасап, әкімшілік кедергілерді алып тастау бойынша жұмыс істеу үшін ағылшын тілі қажет болады. «Біз бастапқы кезеңдерде ағылшын тілінің жоғары білімін талап етпейміз. Ауызекі деңгейде білсе де болады. Жалпы бұл мемлекеттік қызмет сапасын көтеретін қадамдар» дейді Қазақстан Республикасының Президенті Әкімшілігі Басшысының орынбасары. Өз кезегінде баяндама жасаған Мемлекеттік қызмет істері агенттігінің төрағасы Әлихан Бәйменов биылғы Жолдау тарихи ұзақ мерзімді қамтыған, ұзақ межені белгілеген Жолдау екеніне тоқталды. Жолдауды насихаттау бойынша академияның ұйымдастырып жатқан алғашқы шарасы жаңа технологияларды, жаңа мүмкіндіктерді пайдаланып, жүзеге асырылуының өзі Жолдаудың алғашқы кезеңдерден бастап, белгілі бір дайындыққа негізделгенін көрсетеді дейді. Онлайн режімінде өткен бұл конференция елдің барлық өңірлеріне таратылды. Жібек ҚУАНЫШҚЫЗЫ
3128 рет
көрсетілді0
пікір