- Ақпарат
- 07 Ақпан, 2013
Келелі мәселелер қамтылған кеңес
Қазақстан Республикасының Президенті Нұрсұлтан Назарбаев еліміздің ағымдағы даму мәселелері жөнінде кеңес өткізді.
Кеңеске Премьер-министр Серік Ахметов, Президент Әкімшілігінің Басшысы Кәрім Мәсімов, Премьер-министрдің орынбасары Қайрат Келімбетов, Президент Әкімшілігі Басшысының орынбасары Бақыт Сұлтанов, «Самұрық-Қазына» ӘАҚ АҚ басқарма төрағасы Өмірзақ Шөкеев, Мұнай және газ министрі Сауат Мыңбаев қатысты. Басқосуда банк секторының, зейнетақы реформасының жай-күйі және мұнай-газ саласын одан әрі дамыту мәселелері талқыланды, сондай-ақ Мемлекет басшысының қатысуымен өткен Үкіметтің кеңейтілген отырысында берілген және «Қазақстан – 2050» Стратегиясында қарастырылған тапсырмалардың орындалу барысы қаралды. Мемлекет басшысы Н.Назарбаев банк жүйесіндегі сыртқы қарыздарды төмендету жөнінде бірқатар шара қабылданғанын және бұл үдерісті жалғастыру қажет екенін атап өтті. Сонымен қатар Қазақстан Президенті зейнетақы жүйесінің тиімділігін арттыру үшін тиісті шаралар қабылдау қажеттігін айтып, мұнай-газ саласындағы өзекті мәселелерді шешу жөніндегі бұдан кейінгі қадамдарды анықтау керектігіне тоқталды. Кездесудің қорытындысы бойынша өткен брифингте Ө.Шөкеев қайта құрылымдау жүргізудің және өзге іс-шаралардың нәтижесінде «БТА Банк» АҚ-ның сыртқы қарызы 9 миллиард доллардан 750 миллион долларға дейін қысқарғанын, қаржы институттарын басқарудың жаңа жүйесі құрылғанын атап өтті. Кеңестің қорытындысы бойынша Мемлекет басшысы қаралған жұмыс бағыттары аясында бірқатар нақты тапсырмалар берді.
2342 рет
көрсетілді0
пікір