- Әдебиет
- 17 Қаңтар, 2019
«360 ӘУЛИЕЛІ МАҢҒЫСТАУ»
Қазақстан Республикасының Президенті Н.Назарбаевтың: «Маңғыстау тұрғындарына көп адамдар өмірінде тым құрығанда бір рет болып көруді армандайтындай жерде тұру бақыты бұйырған. Осы бір қасиетті жерде көптеген әйгілі адамдар, әулиелер жаны тыныштық тапқан. Лайым олардың рухы сіздерді қоршап-қорғап жүрсін. Сіздерді қолдап жүрсін, бақытты өмір жолына бағдар берсін!» деген сөздерін жолбасшылыққа алған авторлар үштігі – Сақып Керелбаев, Нұрлан Құлбаев, Бақытжан Қосбармақовтың «360 әулиелі Маңғыстау» еңбегі жарық көріпті. Әулиелер туралы мәліметтер әр кітапта, әр мақалада кездескенімен, толық күйінде тұңғыш топтастырылуы десек, асыра айтқандық болмас.
Бұл туралы: «...Республика бойынша тіркелген ескерткіштерінің жартысынан астамы Маңғыстау аймағында шоғырланған, сондықтан «Болашаққа бағдар: рухани жаңғыру» бағдарламасы аясында туған жеріміздің тарихи-мәдени ескерткіштері мен нысандары, киелі әулиелері туралы кітап-альбом жазуды ұйғардық» дейді авторлар аталған еңбекті шығару мақсаты туралы. «Информ-А» баспасынан 2000 данамен 74 баспа табақ көлемде шыққан жаңа еңбекте «Маңғыстау мемлекеттік тарихи-мәдени қорығы» мемлекеттік мекемесінің мұрағаттық фотосуреттері, С. Әжіғали құрастырған Маңғыстау мен Үстірттің архитектуралық және негізгі тарихи-мәдени ескерткіштерінің картасы, С.Майемеров фотосуреттері пайдаланылған. Рухани жаңғырудың арқасында жарық көрген кітаптың қаржылық шығынына демеушілік көмек көрсеткен имангершілігі мол, қайырымды азаматтар «Ақтау ВS строй» ЖШС басшысы Сұңғат Мұңалбаев, «АС құрылыс» ЖШС басшысы Жұмабай Әділбеков, «СМК-4» ЖШС басшысы Самат Мұсабаев, «Айком ЛТД» ЖШС басшысы Иса Бимырзаев, «Оңдасын строй» ЖШС басшысы Бердіқожа Боранбаев, «Ақжол құрылыс» ЖШС басшысы Асылбек Жолдыбаев, «Альянс ЛТД» ЖШС басшысы Асқарбек Керелбаев, «Макс-КМ» ЖШС басшысы Ильяс Нұрбайқосов, жеке кәсіпкер Аманжол Нұғымановтарға авторлар алғыс білдіріпті. Маңғыстаудың 360 әулиесі, кейде 362 әулиесі аталып, адамзат санасында өлке тарихымен бірге жасап келе жатқанымен, осы уақытқа дейін оның санын түгендеп, әліппелік рет бойынша атын тізбектеп мәлімет берген кітап болмағанын айттық. Ел аузында әулиелер саны 360, кейде 362 болып екі түрлі айтылып, жазылып келуінің басын ашып, осы еңбек біржақты нақты жауабын бергендей. Ал қасиетті түбектің киелі 360 немесе 362 санына қатысты филология ғылымының докторы, профессор Жұмат Тілеповтің тұжырымына сүйенген автор: «Әулие» деп түрлі жағдайда адам баласына ерекше көмегі тиген, бойларында Алланың құдіретімен дарыған зайырлы қасиеттері бар адамдардың жекелеген топтары айтылады. Олар – көріпкелдер, сынықшылар, құмалақшылар, емшілер, аруағы қозғанда жауына мың адам болып көрінетін батырлар, кітап ашып сөйлейтін, адамның, перінің дуасын қайтаратын ғұлама молдалар, сөйлескенде перінің тілін табатын, т.б. ерекше дарын иелері» дей келіп, олардың (әулиелердің) адамзат қауымын жақсылыққа, рухани тазалыққа, мейірімге, иманға үндеушілер екенін, ауру-сырқаудан айығуға көмек бере алатын айырықша қасиет иесі болғандықтан халық оларды тірісінде құрмет тұтып, о дүниеге аттанған соң да зираттарына түнеп, есімдеріне «ата», «баба» сөздерін тіркеп атауды қалыптастырғанын айтады. Кітап-альбом түрлі-түсті фотосуреттермен безендірілген және өңірдің географиялық жағдайы, тарихы мен экономикасы, мәдениеті туралы мәліметтік мақалалар берілген.
Үміт ЖӘЛЕКЕ
1693 рет
көрсетілді0
пікір